வடகிழக்குப் பருவமழை பாதிப்புகளிலிருந்து மக்களைக் காக்க போர்க்கால நடவடிக்கை தேவை எனவும் கோரிக்கை
புதுச்சேரி: புதுச்சேரி கடல் பகுதியில் அதிகரித்து வரும் பிளாஸ்டிக் கழிவுகளைக் கட்டுப்படுத்தவும், வடகிழக்குப் பருவமழையால் ஏற்படும் பாதிப்புகளிலிருந்து மக்களைக் காக்கவும் அரசு போர்க்கால அடிப்படையில் நடவடிக்கை எடுக்க வேண்டும் என்று புதுச்சேரி திமுக மாநில துணை அமைப்பாளரும், முன்னாள் சட்டமன்ற உறுப்பினருமான அனிபால் கென்னடி வலியுறுத்தியுள்ளார்.
இதுகுறித்து அவர் வெளியிட்டுள்ள அறிக்கையில் கூறியிருப்பதாவது:
புதுச்சேரி கடல் பகுதியில் பிளாஸ்டிக் பொருட்கள் அதிக அளவில் கலக்கின்றன. சமீபத்தில் மீனவர்களின் வலைகளில் மீன்களுக்குப் பதிலாக பிளாஸ்டிக் பாட்டில்கள் உள்ளிட்ட கழிவுப் பொருட்கள் அதிக அளவில் சிக்கியுள்ளன. அந்த அளவிற்கு பிளாஸ்டிக் பயன்பாடு அதிகரித்துள்ளதுடன், அவற்றை முறையாகக் குப்பைத் தொட்டிகளில் போடுவதும் இல்லை.
புதுச்சேரிக்கு வரும் சுற்றுலாப் பயணிகளிடையே பிளாஸ்டிக் கழிவுகளால் ஏற்படும் சுற்றுச்சூழல் பாதிப்புகள் குறித்து விழிப்புணர்வு ஏற்படுத்த வேண்டும். இன்று மீனவர்களின் வாழ்வாதாரம் பாதிக்கப்படுகிறது. இதே நிலை தொடர்ந்தால் எதிர்காலத்தில் சுற்றுச்சூழல் கடுமையாகப் பாதிக்கப்பட்டு அனைவருக்கும் பாதிப்புகள் ஏற்படும். எனவே, இந்தப் பிரச்சினையில் அரசு உரிய அக்கறை செலுத்த வேண்டும்.
கடலில் கலக்கும் வடிகால் வாய்க்கால்களின் இறுதிப் பகுதிகளில் வலைகளைக் கட்டி, பிளாஸ்டிக் கழிவுகள் கடலுக்குள் செல்வதைத் தடுக்க அரசு நடவடிக்கை எடுக்க வேண்டும்.
மேலும், இரண்டு மணி நேர மழைக்கே புதுச்சேரியின் பல பகுதிகள் பாதிக்கப்பட்டுள்ளன. பல இடங்களில் மழைநீர் தேங்கி நிற்கிறது. எனவே, பொதுமக்கள் பாதுகாப்புடன் இருக்க வேண்டும். வெளியே செல்லும்போது ரெயின்கோட் அல்லது குடையை எடுத்துச் செல்ல வேண்டும். குடிப்பதற்குப் பாதுகாப்பான தண்ணீரைப் பயன்படுத்த வேண்டும்.
வடகிழக்குப் பருவமழையால் ஏற்படும் பாதிப்புகளிலிருந்து மக்களைக் காக்க என்.ஆர்.-பாஜக அரசு போர்க்கால அடிப்படையில் முன்னெச்சரிக்கை மற்றும் நிவாரண நடவடிக்கைகளை மேற்கொள்ள வேண்டும் என்று புதுச்சேரி திமுக சார்பில் கேட்டுக்கொள்கிறேன்.
இவ்வாறு அனிபால் கென்னடி தனது அறிக்கையில் தெரிவித்துள்ளார்.