ஏழை மக்களின் நில உரிமையைப் பாதுகாக்க அரசு நடவடிக்கை எடுக்க வேண்டும் என வலியுறுத்தல்
கோவை: சரவணம்பட்டி பகுதியில் 50 ஆண்டுகளுக்கு முன்பு பொதுமக்கள் வாங்கிய 9.54 ஏக்கர் நிலத்தை அபகரித்து, அடுக்குமாடிக் குடியிருப்புகள் மற்றும் ஐடி பார்க் அமைக்க முயற்சி நடைபெறுவதாக ஓய்வுபெற்ற மாவட்ட நீதிபதி கணேசன் குற்றம்சாட்டியுள்ளார்.
கோவை பத்திரிகையாளர் மன்றத்தில், சரவணம்பட்டி தெய்வீக நகர்மனைப் பகுதி மக்களுடன் இணைந்து செய்தியாளர்களைச் சந்தித்த அவர் கூறியதாவது:
சரவணம்பட்டி தெய்வீக நகர்மனைப் பகுதியில் கடந்த 1976-ஆம் ஆண்டு 96 பேர் இணைந்து மொத்தம் 9.54 ஏக்கர் நிலத்தை வாங்கினர். இந்த நிலம் தலா 2 முதல் 5 சென்ட் வரையிலான மனைகளாகப் பிரிக்கப்பட்டு விற்பனை செய்யப்பட்டது. இந்த மனைப்பிரிவுக்கு சென்னை உயர் நீதிமன்றமும் அனுமதி வழங்கியுள்ளது.
இந்நிலையில், இந்த நிலம் கௌமார மடாலயத்திற்குச் சொந்தமானது எனக் கூறி, 96 நில உரிமையாளர்களுக்கு எதிராக சென்னை உயர் நீதிமன்றத்தில் வழக்கு தொடரப்பட்டுள்ளது. இதன் பின்னணியில், பொதுமக்களுக்குச் சொந்தமான நிலத்தை அபகரித்து, அங்கு அடுக்குமாடிக் குடியிருப்புகள் மற்றும் தகவல் தொழில்நுட்பப் பூங்கா அமைக்க முயற்சி நடைபெறுவதாக அவர் தெரிவித்தார்.
தனியார் கட்டுமான நிறுவனத்தைச் சேர்ந்த சிவராமன் மற்றும் இந்து அமைப்பில் இருப்பதாகக் கூறப்படும் சுரேஷ்பாபு ஆகியோர் இந்த நடவடிக்கையில் ஈடுபட்டு வருவதாகவும் கணேசன் குற்றம்சாட்டினார்.
மேலும், சம்பந்தப்பட்ட நிலம் முன்னாள் மடாதிபதி சுந்தரசாமிக்குத் தனிப்பட்ட முறையில் சொந்தமானதாக இருந்ததாகவும், அவரே அந்த நிலத்தை விற்பனை செய்த நிலையில், தற்போது இந்து சமய அறநிலையத்துறையைச் சமாளித்து ஒட்டுமொத்த நிலத்தையும் கைப்பற்றத் திட்டமிடப்படுவதாகவும் அவர் கூறினார்.
தற்போதைய கௌமார மடாலய மடாதிபதி குமரகுருபர சுவாமிக்கு பணத்தாசை காட்டி சிலர் இந்த நடவடிக்கைகளை முன்னெடுத்து வருவதாகவும் அவர் குற்றம்சாட்டினார்.
அரசு மடாலயத்திற்கு ஆதரவாகச் செயல்படுவதாகப் புகார்
ஏழை மக்களுக்கு அரசு நீதி வழங்கும் என நம்பியிருந்த நிலையில், இந்த விவகாரம் தொடர்பாக இந்து சமய அறநிலையத்துறை அமைச்சர் ரமேஷிடம் கேட்டபோது, மடாலயத்திற்கு வாக்குறுதி அளித்துவிட்டதாக அவர் தெரிவித்ததாகக் கணேசன் கூறினார்.
இதன் காரணமாக, தற்போதைய அரசு மடாலயத்திற்கு ஆதரவாகச் செயல்படுவதாகத் தோன்றுகிறது என்றும், ஏழை மக்களின் வாழ்வாதாரத்தையும் நில உரிமையையும் பாதிக்கும் இத்தகைய முயற்சிகளை அரசு தடுத்து நிறுத்த வேண்டும் என்றும் அவர் வலியுறுத்தினார்.
மேலும், 50 ஆண்டுகளுக்கு முன்பு நிலம் வாங்கிய 96 குடும்பங்களின் உரிமைகளைப் பாதுகாக்கவும், நிலம் பறிக்கப்படுவதாகக் கூறப்படும் முயற்சிகள் குறித்து உரிய விசாரணை நடத்தி நடவடிக்கை எடுக்கவும் அரசு முன்வர வேண்டும் எனக் கேட்டுக்கொண்டார்.
இவ்வாறு ஓய்வுபெற்ற மாவட்ட நீதிபதி கணேசன் தெரிவித்தார்.