தர்மபுரி மாவட்டம், அரூர்:
அரூர் நகராட்சியில் குப்பைகளை முறையாகக் கொட்டுவதற்கு உரிய இடத்தைத் தேர்வு செய்யாமல், தனியார் இடங்களில் குப்பைகள் கொட்டப்படுவதாகப் பொதுமக்கள் புகார் தெரிவித்துள்ளனர். இதனால் ஏற்படும் சிரமங்கள் குறித்து அதிமுக அரூர் சட்டமன்ற உறுப்பினர் வி. சம்பத்குமாரிடம் பொதுமக்கள் தகவல் தெரிவித்தனர்.
இதையடுத்து, சம்பந்தப்பட்ட இடத்திற்கு நேரில் சென்ற சட்டமன்ற உறுப்பினர் வி. சம்பத்குமார், நகராட்சி அதிகாரிகளுடன் இணைந்து ஆய்வு மேற்கொண்டார். அப்போது, குப்பைகளைத் தனியார் இடங்களில் கொட்டுவதால் பொதுமக்களுக்கு ஏற்படும் பாதிப்புகளைத் தவிர்க்கும் வகையில், குப்பைகளைக் கொட்டுவதற்குப் பொருத்தமான இடத்தைத் தேர்வு செய்து, அங்கு குப்பைகளைக் கொட்டுவதற்கான நடவடிக்கைகளை மேற்கொள்ள வேண்டும் என சம்பந்தப்பட்ட அதிகாரிகளுக்கு அறிவுறுத்தினார்.
மேலும், நகராட்சிப் பகுதியில் குப்பைகளை முறையாகக் கையாள்வதற்கும், பொதுமக்களுக்கு ஏற்படும் சிரமங்களைத் தவிர்ப்பதற்கும் உரிய நடவடிக்கைகளை மேற்கொள்ள வேண்டும் என அதிகாரிகளிடம் பரிந்துரைத்தார்.
இந்த ஆய்வின்போது அரூர் நகராட்சி ஆணையர் விஜி, நகராட்சி அதிகாரிகள் மற்றும் பொதுமக்கள் உள்ளிட்டோர் உடனிருந்தனர்.