அரியலூர்: தமிழகத்தில் தொடர்ந்து குழந்தைகள் காணாமல் போகும் சம்பவங்கள் கவலை அளிப்பதாகவும், காணாமல் போன அனைத்து குழந்தைகளையும் விரைந்து கண்டுபிடித்து பெற்றோரிடம் ஒப்படைக்க வேண்டும் என்றும் தேமுதிக பொதுச் செயலாளர் பிரேமலதா விஜயகாந்த் வலியுறுத்தினார்.
அரியலூர் மாவட்டத்தில் சுற்றுப்பயணம் மேற்கொண்ட தேமுதிக பொதுச் செயலாளர் பிரேமலதா விஜயகாந்த், அரியலூரில் செய்தியாளர்களைச் சந்தித்துப் பேசினார். அப்போது அவர் கூறியதாவது:
தமிழகத்தில் செஞ்சி, கோவை, திருப்பூர் உள்ளிட்ட பகுதிகளில் சமீபகாலமாக குழந்தைகள் தொடர்ந்து காணாமல் போகும் சம்பவங்கள் நடைபெற்று வருகின்றன. செஞ்சியில் சிறுமி காணாமல் போய் 12 நாட்கள் ஆகியும், அந்தக் குழந்தையின் நிலை என்னவானது என்பது இதுவரை தெரியவில்லை.
ஸ்காட்லாந்து யார்டு போலீசாருக்கு இணையாகப் பேசப்படும் தமிழக காவல்துறை, காணாமல் போன செஞ்சி சிறுமியைக் கண்டுபிடிக்க முடியாமல் திணறுவது வேதனை அளிக்கிறது. எனவே, காணாமல் போன அனைத்துக் குழந்தைகளையும் விரைந்து கண்டுபிடித்து அவர்களின் பெற்றோரிடம் ஒப்படைக்க காவல்துறை நடவடிக்கை எடுக்க வேண்டும்.
தமிழகத்தில் ஆட்சிப் பொறுப்பேற்று ஆறு மாதங்கள் ஆகியுள்ள நிலையில், இந்த அரசு உண்மையிலேயே மாற்றத்தை ஏற்படுத்தியுள்ளதா என்பதைத் தேர்தலில் வாக்களித்த மக்கள்தான் தெரிவிக்க வேண்டும். மின்கட்டண உயர்வு, விலைவாசி உயர்வு, விவசாயிகள் பிரச்சினை உள்ளிட்ட அனைத்து துறைகள் சார்ந்த பிரச்சினைகளிலும் தமிழக அரசு உடனடியாகக் கவனம் செலுத்த வேண்டும்.
இவ்வாறு பிரேமலதா விஜயகாந்த் தெரிவித்தார்.
திருமண வரவேற்பில் பங்கேற்பு
இதைத்தொடர்ந்து, அரியலூர் மாவட்ட தேமுதிக செயலாளர் ராம ஜெயவேலின் மகன் கே. விக்ரம் – கே.கே. சௌமியா ஆகியோரின் திருமண வரவேற்பு நிகழ்ச்சியில் பிரேமலதா விஜயகாந்த் கலந்து கொண்டு மணமக்களை வாழ்த்தினார்.
இந்நிகழ்ச்சியில் மாவட்டக் கழகத் துணைச் செயலாளர்கள் கே. தெய்வசிகாமணி, கே. பாண்டியன், எம். ராஜீவ் காந்தி, எஸ். தேன்மொழி, மாவட்டக் கழகப் பொருளாளர் சக்திவேல், தலைமைச் செயற்குழு உறுப்பினர் ஆனந்தன், நகரச் செயலாளர் தாமஸ் ஏசுதாஸ், நகரக் கழகப் பொருளாளர் மோனிஷா, கன்ஸ்ட்ரக்சன் டி.ஆர். ரமேஷ் உள்ளிட்ட கட்சி நிர்வாகிகள் மற்றும் ஏராளமானோர் கலந்து கொண்டனர்.