நோய் தடுப்பு மற்றும் ஆரோக்கியமான வாழ்க்கை முறைக்கு ஊட்டச்சத்து அவசியம்
கரூர்: நோய் தடுப்பு மற்றும் ஆரோக்கியமான வாழ்க்கை முறையில் ஊட்டச்சத்தின் முக்கியத்துவத்தை வலியுறுத்தும் வகையில், கரூர் அப்போலோ மருத்துவமனை சார்பில் இரண்டு நாட்கள் நடைபெறும் “Nourish to Flourish” Nutrition Carnival 2026 என்ற சமூக நல நிகழ்வு நடைபெற்றது.
“சரியான உணவைத் தேர்ந்தெடுத்து சிறப்பாக வாழ்வோம்” என்ற கருப்பொருளில் நடைபெற்ற இந்த ஊட்டச்சத்து திருவிழாவில், நோயாளிகள், மாணவர்கள், சுகாதாரத்துறை நிபுணர்கள் மற்றும் பொதுமக்கள் என ஏராளமானோர் ஆர்வத்துடன் பங்கேற்றனர்.
ஊட்டச்சத்து குறித்த விழிப்புணர்வை ஏற்படுத்துதல், நோய் தடுப்பு நடவடிக்கைகளை ஊக்குவித்தல் மற்றும் ஆரோக்கியமான வாழ்க்கை முறையைப் பின்பற்றுவதன் அவசியத்தை எடுத்துரைத்தல் ஆகியவற்றை நோக்கமாகக் கொண்டு இந்நிகழ்வு ஏற்பாடு செய்யப்பட்டது.
இந்த ஊட்டச்சத்து திருவிழாவை அன்னை மகளிர் கல்லூரி மற்றும் ஸ்ரீ அரவிந்தோ நர்சிங் கல்லூரியின் தலைவர் A.R. மலையப்ப சாமி குத்துவிளக்கேற்றி தொடங்கி வைத்தார். நிகழ்ச்சியில் அப்போலோ மருத்துவமனை மருத்துவர்கள் மற்றும் சுகாதார நிபுணர்கள் கலந்து கொண்டனர்.
நிகழ்வில் அமைக்கப்பட்டிருந்த கண்காட்சியில் முன்னணி பள்ளிகள் மற்றும் கல்லூரிகளைச் சேர்ந்த மாணவர்கள், பல்வேறு நிறுவனங்களைச் சேர்ந்த ஊழியர்கள் உள்ளிட்டோர் ஆர்வத்துடன் பார்வையிட்டனர். மேலும், சுகாதார நிபுணர்களுடன் கலந்துரையாடி, ஊட்டச்சத்து, ஆரோக்கியமான உணவுப் பழக்கங்கள், நோய் தடுப்பு மற்றும் ஒட்டுமொத்த நலவாழ்வு தொடர்பான தங்களது சந்தேகங்களுக்கு விளக்கங்களைப் பெற்றனர்.
பொதுமக்கள் அன்றாட வாழ்க்கையில் பின்பற்றக்கூடிய ஆரோக்கியமான உணவுப் பழக்கங்கள் மற்றும் ஊட்டச்சத்து சார்ந்த நடைமுறை தகவல்களை வழங்கிய இந்த நிகழ்வு, ஆரோக்கியமான வாழ்க்கை முறையை ஊக்குவிக்கும் விழிப்புணர்வு தளமாக அமைந்தது.