காஞ்சிபுரம் மாவட்டம், ஸ்ரீபெரும்புதூரில் உள்ள வேளாண்மை உற்பத்தியாளர்கள் கூட்டுறவு விற்பனைச் சங்கத்தின் கட்டுப்பாட்டில் செயல்படும் நியாய விலைக் கடையில்
பொதுமக்களுக்கு ஒரு கிலோ சன்னரக அரிசி 30 ரூபாய்க்கு விற்பனை செய்யப்படும் திட்டம் துவங்கப்பட்டது.
தமிழ்நாடு அரசின் நுகர்வோர் நலன் சார்ந்த இந்த நடவடிக்கையின் மூலம், காஞ்சிபுரம் மாவட்டத்திற்கு முதற்கட்டமாக 23 மெட்ரிக் டன் சன்னரக அரிசி ஒதுக்கீடு செய்யப்பட்டுள்ளது. தொடர்ந்து, காஞ்சிபுரம் மாவட்டத்தில் செயல்படும் மாவட்ட நுகர்வோர் கூட்டுறவு மொத்த விற்பனை பண்டகசாலை கடைகள், காஞ்சிபுரம் செட்டித்தெரு நியாய விலைக் கடை, உத்திரமேரூர் கூட்டுறவு பண்டகசாலை மற்றும் பஞ்சரங்க ஐயர் தெருவில் உள்ள முதல்வர் மருந்தகம் உள்ளிட்ட இடங்களிலும் குறைந்த விலை அரிசி விற்பனை செய்யப்படுகிறது.
இந்நிலையில் குடும்ப அட்டைதாரர்களுக்கு தலா 5 கிலோ அரிசி இலவசமாக வழங்கும் திட்டத்தின் கீழ், அரிசி வழங்கும் திட்டத்தை ஸ்ரீபெரும்புதூரில் தமிழக வெளிநாடு வாழ் தமிழர் நலத்துறை அமைச்சர் தென்னரசு தொடங்கி வைத்தார்.
இந்நிகழ்ச்சியில் மாவட்ட ஆட்சித்தலைவர் தி. சினேகா, கூட்டுறவு சங்கங்களின் இணைப்பதிவாளர் கோ. யோக விஷ்ணு, ஸ்ரீபெரும்புதூர் வருவாய் கோட்டாட்சியர் பாலகிருஷ்ணன் மற்றும் கூட்டுறவுத் துறை அதிகாரிகள் உள்ளிட்ட பலர் கலந்து கொண்டனர்.