ராணிப்பேட்டையில் காணாமல் போன ஒரு வயது பெண் குழந்தை ஆந்திராவில் மீட்பு!

ராணிப்பேட்டை, செய்தியாளர் வெங்கடேசன்:

ராணிப்பேட்டை மாவட்டம், சிப்காட் காவல் நிலைய எல்லைக்குட்பட்ட மாணிக்கம் நகர் பகுதியில், பெற்றோருடன் சாலையோரத்தில் தூங்கிக் கொண்டிருந்த ஒரு வயது பெண் குழந்தை காணாமல் போனது. இதையடுத்து, போலீசார் தீவிர விசாரணை நடத்தி, ஆந்திர மாநிலம் ரேணிகுண்டாவில் இருந்த குழந்தையைப் பத்திரமாக மீட்டனர். இச்சம்பவம் தொடர்பாக 5 பேரை போலீசார் கைது செய்துள்ளனர்.

நள்ளிரவில் மாயமான குழந்தை

ராணிப்பேட்டை மாவட்டம், மாணிக்கம் நகர் பகுதியில் கடந்த செப்டம்பர் 23-ம் தேதி இரவு சுமார் 9 மணியளவில், ஒரு வயது பெண் குழந்தையுடன் அதன் பெற்றோர் சாலையோரத்தில் தூங்கிக் கொண்டிருந்தனர். மறுநாள் 24-ம் தேதி அதிகாலை சுமார் 1 மணியளவில் எழுந்து பார்த்தபோது, குழந்தை காணாமல் போனது தெரியவந்தது.

இதனால் அதிர்ச்சியடைந்த குழந்தையின் தாய் பிரேமா, இதுகுறித்து சிப்காட் காவல் நிலையத்தில் புகார் அளித்தார். அதன் பேரில் போலீசார் வழக்குப்பதிவு செய்து விசாரணையைத் தொடங்கினர்.

5 தனிப்படைகள் அமைத்து தேடுதல்

ராணிப்பேட்டை உட்கோட்ட துணைக் காவல் கண்காணிப்பாளர் தலைமையில், சிப்காட் மற்றும் ரத்தினகிரி காவல் ஆய்வாளர்கள் மற்றும் 5 உதவி ஆய்வாளர்கள் அடங்கிய 5 தனிப்படைகள் அமைக்கப்பட்டன. தனிப்படை போலீசார் சம்பவ இடம் மற்றும் சுற்றுவட்டாரப் பகுதிகளில் தீவிர தேடுதல் வேட்டையில் ஈடுபட்டனர்.

மேலும், அப்பகுதியில் உள்ள 100-க்கும் மேற்பட்ட சிசிடிவி கேமராக்களின் பதிவுகளை ஆய்வு செய்து, தொழில்நுட்ப உதவியுடன் விசாரணையைத் தீவிரப்படுத்தினர்.

ஆந்திராவில் குழந்தை மீட்பு

போலீசாரின் விசாரணையில், குழந்தை இல்லாத மல்லீஸ்வரி, தனக்குக் குழந்தை வேண்டும் என்ற விருப்பத்தைத் தனது தோழி கௌசல்யாவிடம் தெரிவித்ததாகக் கூறப்படுகிறது. இதுகுறித்து கௌசல்யா தனது கணவர் பூபதி மற்றும் பக்கத்து வீட்டைச் சேர்ந்த சந்தோஷிடம் தெரிவித்ததாகவும் தெரியவந்தது.

இதையடுத்து, சந்தோஷ் மற்றும் குமரன் ஆகியோர் காணாமல் போன குழந்தையை எடுத்துச் சென்று மல்லீஸ்வரியிடம் ஒப்படைத்ததாக போலீசார் நடத்திய விசாரணையில் தெரியவந்தது. தொடர்ந்து மேற்கொண்ட விசாரணையில், குழந்தை ஆந்திர மாநிலம், ரேணிகுண்டாவில் மல்லீஸ்வரியிடம் இருப்பது கண்டறியப்பட்டது.

இதையடுத்து, தனிப்படை போலீசார் விரைந்து செயல்பட்டு, குழந்தையைப் பத்திரமாக மீட்டு ராணிப்பேட்டைக்கு அழைத்து வந்தனர்.

5 பேர் கைது

இந்த வழக்கில், ராணிப்பேட்டை மாவட்டம் வாலாஜா பகுதியைச் சேர்ந்த சந்தோஷ் (35), குமரன் (30), பூபதி (42), அவரது மனைவி கௌசல்யா (35) மற்றும் ஆந்திர மாநிலம் ரேணிகுண்டாவைச் சேர்ந்த மல்லீஸ்வரி ஆகிய 5 பேரையும் போலீசார் கைது செய்துள்ளனர்.

இச்சம்பவம் தொடர்பாக போலீசார் தொடர்ந்து விசாரணை நடத்தி வருகின்றனர். காணாமல் போன ஒரு வயது குழந்தையைத் தனிப்படை போலீசார் விரைந்து செயல்பட்டு மீட்ட சம்பவம் அப்பகுதியில் பரபரப்பை ஏற்படுத்தியுள்ளது.