இறால் வளர்ப்பு மற்றும் மாற்று வாழ்வாதாரத்தை பெருக்க மீனவர் நலத்துறை அமைச்சருக்கு மீனவர் கோரிக்கை மனு

பேராவூரணி அக் 4
தஞ்சை மாவட்டம் பேராவூரணி அருகே உள்ள மல்விப் பட்டிணம்
தமிழ்நாடு மீனவர் பேரவை பொதுச்செயலாளர் தாஜுதீன், மீன்வளம் மற்றும் மீனவர் நலத்துறை அமைச்சருக்கு மீனவர் கோரிக்கை கடிதத்தில் கூறப்படுவதாவது,

இறால் பண்ணைகள் புனரமைப்பதற்கு மானியம் வழங்குதல்:
தற்போது இறால் வளர்ப்புத் தொழிலில் தீவன விலை தொடர்ந்து உயர்ந்து வருவதுடன், உற்பத்தி செய்யப்படும் இறாலுக்கு உரிய சந்தை விலையும் கிடைப்பதில்லை. இதனால் பெருமளவான இறால் வளர்ப்போர் இத்தொழிலை கைவிட்டு வேறு தொழில்களுக்குச் செல்லும் நிலை ஏற்பட்டுள்ளது. எனவே, இறால் வளர்ப்போரின் வாழ்வாதாரத்தைப் பாதுகாக்கும் வகையில், இறால் பண்ணைகளைப் புனரமைப்பதற்கு தமிழக அரசு உரிய மானியம் வழங்க வேண்டும். இதன் மூலம் அதிகப்படியான இறால் வளர்ப்போர் மீண்டும் இத்தொழிலில் ஆர்வத்துடன் ஈடுபட முன்வருவார்கள்.

மின்சாரக் கட்டணத்தைப் பயன்படுத்தும் அளவிற்கு ஏற்ப
இறால் பண்ணைகளில் இறால் வளர்ப்பு நடைபெறாத மாதங்களிலும் அதிகப்படியான மின்சாரக் கட்டணம் செலுத்த வேண்டிய நிலை உள்ளது. இது தொடர்பாக மின்வாரிய அலுவலகத்தில் கேட்டபோது, ஒதுக்கீடு செய்யப்பட்ட மின்சாரத்திற்கான கட்டணத்தைப் பயன்படுத்தித்தானாலும் செலுத்த வேண்டும் எனத் தெரிவிக்கப்படுகிறது. எனவே, இறால் பண்ணைகளில் உண்மையில் பயன்படுத்தப்படும் மின்சார யூனிட்டுகளின் அடிப்படையில் மட்டுமே கட்டணம் வசூலிக்க அரசு உரிய நடவடிக்கை எடுக்க வேண்டும்.

அரசு புறம்போக்கு நிலங்களை இறால் வளர்ப்பிற்கு குத்தகைக்கு வழங்குதல்:
குறிப்பாக, தஞ்சாவூர் மாவட்டம் மரவக்காடு கிராமத்தில் சுமார் 600 ஏக்கர் அரசு புறம்போக்கு நிலம் உள்ளதாகத் தெரிவிக்கப்படுகிறது. அந்த நிலத்தை இறால் வளர்ப்போருக்கு குறைந்த குத்தகைக் தொகையில் வழங்கினால், இறால் வளர்ப்புத் தொழில் விரிவடைவதுடன், வேலைவாய்ப்பும் அதிகரிக்கும். எனவே, இதனை அரசு பரிசீலித்து உரிய நடவடிக்கை எடுக்க வேண்டும்.

மாற்று வாழ்வாதாரமாக சாலிகார்னியா வளர்ப்பை ஊக்குவித்தல்:
தற்போது கடற்பாசி வளர்ப்பு ஒரு மாற்று வாழ்வாதாரமாக இருந்து வருகிறது. குறிப்பாக, கப்பாபிகஸ் வகை கடற்பாசி வளர்க்கப்பட்டு வருகிறது. இதற்கு மாற்றாக, இயற்கையாகக் கடற்கரை பகுதிகளில் கிடைக்கக்கூடிய சாலிகார்னியா இல்லென்ஸ் வகைகளைப் பயன்படுத்தி மாற்று வாழ்வாதாரத் திட்டத்தை உருவாக்குவதற்கான சாத்தியக்கூறுகளை அரசு ஆய்வு செய்ய வேண்டும்.

இவ்வகை வளர்ப்பின் மூலம் குறுகிய காலத்தில் அறுவடை செய்து வருமானம் ஈட்ட முடியும் என்பதைப் பரிசோதனை முறையில் செயல்படுத்தலாம். எனவே, கப்பாபிகஸ் வளர்ப்பிற்கு மாற்றாக இத்தகைய புதிய முயற்சிகளை ஊக்குவித்து, அதற்குத் தேவையான தொழில்நுட்ப மற்றும் நிதி உதவிகளை அரசு வழங்க வேண்டும்.

ஏரிப்புறக்கரையில் உள்ள அரசு இறால் பண்ணையைச் செயல்படுத்துதல்:
தஞ்சாவூர் மாவட்டம் ஏரிப்புறக்கரை பகுதியில் அரசுக்குச் சொந்தமான இறால் பண்ணை ஒன்று நீண்ட காலமாகச் செயல்படாமல் உள்ளது. அந்தப் பண்ணையைப் புனரமைத்து, இறால் வளர்ப்போருக்கு உரிய நிபந்தனைகளுடன் குத்தகைக்கு வழங்கினால், ஒருபுறம் இறால் வளர்ப்போருக்கு தொழில் வாய்ப்பு கிடைப்பதுடன், மறுபுறம் அரசுக்கும் குத்தகை வருவாய் கிடைக்கும்.

மேற்கண்ட கோரிக்கைகளை அரசு கவனத்தில் பரிசீலித்து, இறால் வளர்ப்போரின் வாழ்வாதாரத்தைப் பாதுகாக்கவும், இறால் உற்பத்தியை அதிகரிக்கவும் உரிய நடவடிக்கைகளை மேற்கொள்ள வேண்டும் என மனுவில் தெரிவித்துள்ளார்.

பேராவூரணி நீலகண்டன் .