மதுரை: ஆண்டுதோறும் நவம்பர் 14-ஆம் தேதி கொண்டாடப்படும் குழந்தைகள் தின விழாவை முன்னிட்டு, பள்ளிக்கல்வித்துறையின் கீழ் பயிலும் மாணவர்களுக்கு கேக் மற்றும் வாழ்த்து அட்டைகள் வழங்கும் திட்டத்தைப் போலவே, பள்ளி வளாகங்களுடன் இணைந்து செயல்படும் அங்கன்வாடி மையங்களில் பயிலும் குழந்தைகளுக்கும் கேக் மற்றும் வாழ்த்து அட்டைகள் வழங்க தமிழ்நாடு அரசு நடவடிக்கை எடுக்க வேண்டும் என தமிழ்நாடு ஆரம்பப்பள்ளி ஆசிரியர் கூட்டணியின் மதுரை மாவட்டக் கிளை கோரிக்கை விடுத்துள்ளது.
மறைந்த முன்னாள் இந்தியப் பிரதமர் ஜவஹர்லால் நேருவின் பிறந்தநாளான நவம்பர் 14-ஆம் தேதி ஒவ்வொரு ஆண்டும் குழந்தைகள் தினமாகக் கொண்டாடப்பட்டு வருகிறது. இந்நிலையில், நடப்பாண்டு குழந்தைகள் தின விழாவை அனைத்துக் குழந்தைகளும் மகிழ்ச்சியுடன் கொண்டாடும் வகையில், பள்ளிக்கல்வித்துறையின் கீழ் பயிலும் மாணவர்களுக்கு ரூ.9 கோடி செலவில் கேக் மற்றும் வாழ்த்து அட்டைகள் வழங்கப்படும் என தமிழ்நாடு முதலமைச்சர் அறிவித்துள்ளார். இதற்கான நிதி ஒதுக்கீடு செய்யப்பட்டு, தற்போது அனைத்துப் பள்ளிகளுக்கும் கேக் மற்றும் வாழ்த்து அட்டைகள் வழங்கும் பணிகள் நடைபெற்று வருகின்றன.
இத்திட்டத்தின் மூலம் பள்ளிகளில் பயிலும் குழந்தைகள் மகிழ்ச்சியடையும் அதேவேளையில், பள்ளி வளாகங்களிலேயே பள்ளிகளுடன் இணைந்து செயல்படும் அங்கன்வாடி மையங்களில் பயிலும் இளம் சிறார்களுக்கும் கேக் மற்றும் வாழ்த்து அட்டைகள் வழங்கப்பட வேண்டும்.
அங்கன்வாடி மையங்களில் பயிலும் குழந்தைகளுக்கு மட்டும் இத்தகைய வாய்ப்பு மறுக்கப்படும்போது, பள்ளி மாணவர்களுடன் இணைந்து ஒரே வளாகத்தில் இருக்கும் அந்த இளம் சிறார்களின் மனதில் ஏமாற்றம் ஏற்பட வாய்ப்புள்ளது. இது குழந்தைகளிடையே சமத்துவ உணர்வைப் பாதிக்கும் சூழலையும் உருவாக்கக்கூடும்.
மேலும், தொடக்கக் கல்வித்துறையின் மாணவர் சேர்க்கையை உறுதி செய்வதில் அங்கன்வாடி மையங்கள் முக்கியப் பங்காற்றி வருகின்றன. எனவே, பள்ளிக்கல்வித்துறையின் ஒரு அங்கமாகச் செயல்படும் அங்கன்வாடி மையங்களில் பயிலும் குழந்தைகளையும் இத்திட்டத்தில் இணைத்து, அவர்களுக்கும் இந்த ஆண்டே குழந்தைகள் தினத்தை முன்னிட்டு கேக் மற்றும் வாழ்த்து அட்டைகள் வழங்க உரிய நடவடிக்கை எடுக்க வேண்டும்.
அனைத்துக் குழந்தைகளும் சமமாகவும் மகிழ்ச்சியாகவும் குழந்தைகள் தினத்தைக் கொண்டாடும் வகையில் மாண்புமிகு தமிழ்நாடு முதலமைச்சர் அவர்கள் இதற்கான உரிய அறிவிப்பை வெளியிட்டு நடவடிக்கை மேற்கொள்ள வேண்டும் என தமிழ்நாடு ஆரம்பப்பள்ளி ஆசிரியர் கூட்டணியின் மதுரை மாவட்டச் செயலாளர் பெ. சீனிவாசகன் கோரிக்கை விடுத்துள்ளார்.