சாத்தூர்: முன்னாள் குடியரசுத் தலைவர் டாக்டர் ஏ.பி.ஜே. அப்துல் கலாம் அவர்களின் பிறந்தநாளை முன்னிட்டு, விருதுநகர் மாவட்டம், சல்வார்பட்டியில் உள்ள மதுரை CEOA பதின்ம மேல்நிலைப் பள்ளி சார்பில், சாத்தூரில் மரம் வளர்ப்பதன் அவசியத்தை வலியுறுத்தி விழிப்புணர்வுப் பேரணி நடைபெற்றது.
“மரம் வளர்ப்போம்! உயிர் காப்போம்!” என்ற முழக்கத்துடன் நடைபெற்ற இப்பேரணியில், பள்ளி மாணவ, மாணவிகள் ஸ்கேட்டிங் மூலம் பங்கேற்றனர். தேசிய மாணவர் படையினர் அணிவகுத்துச் சென்றனர். பள்ளியின் இசை வாத்தியங்கள் முழங்க, சுற்றுச்சூழல் பாதுகாப்பு மற்றும் மரம் வளர்ப்பதன் முக்கியத்துவத்தை எடுத்துரைக்கும் பதாகைகளை ஏந்தி மாணவர்கள் பொதுமக்களிடையே விழிப்புணர்வு ஏற்படுத்தினர். இந்நிகழ்ச்சியில் 200-க்கும் மேற்பட்ட மாணவர்கள் கலந்து கொண்டனர்.
இப்பேரணியை வட்டாரப் போக்குவரத்து ஆய்வாளர் சீமான் கொடியசைத்துத் தொடங்கி வைத்தார். நிகழ்ச்சியில் பள்ளித் தாளாளர் சிவப்பிரகாசம், பள்ளி முதல்வர் தாட்சாயணி தேவி, உதவித் தலைமை ஆசிரியர் ராஜா மற்றும் ஆசிரியர்கள் கலந்து கொண்டு சிறப்பித்தனர்.
இவ்விழாவிற்கான ஏற்பாடுகளை ரமேஷ் செய்திருந்தார். அப்துல் கலாம் அவர்களின் பிறந்தநாளை முன்னிட்டு நடைபெற்ற இந்நிகழ்ச்சி, மாணவர்களிடையே சுற்றுச்சூழல் பாதுகாப்பு, மரம் வளர்ப்பு மற்றும் சமூகப் பொறுப்புணர்வு குறித்த விழிப்புணர்வை ஏற்படுத்தும் வகையில் அமைந்தது.