குண்டடம் அருகே வழிப்பறியில் ஈடுபட்ட இருவர் கைது – மதுரை ரயில் நிலையத்தில் தப்பிச் செல்ல முயன்றபோது தனிப்படை போலீசார் அதிரடி நடவடிக்கை!

தாராபுரம் செய்தியாளர் பிரபு
செல்:9715328420

குண்டடம்,

திருப்பூர் மாவட்டம், குண்டடம் காவல் நிலைய எல்லைக்குட்பட்ட பகுதியில் வழிப்பறியில் ஈடுபட்ட இருவரை, குண்டடம் தனிப்படை போலீசார் மதுரை ரயில் நிலையத்தில் அதிகாலையில் அதிரடியாகக் கைது செய்தனர்.

திருப்பூர் மாவட்டம், பொம்மநாயக்கன்பட்டியைச் சேர்ந்த வேலுசாமி என்பவரது மகன் சதீஷ்குமார் (43). இவர் தற்போது பாரதிநகரில் மளிகைக் கடை நடத்தி வருவதுடன், தனியார் காற்றாலை நிறுவனத்தில் மேற்பார்வையாளராகவும் பணியாற்றி வருகிறார்.

இந்நிலையில், சனிக்கிழமை சம்பவத்தன்று காலை சதீஷ்குமார் கரியகாளிபுதூர் அருகே உள்ள பி.ஏ.பி. வாய்க்கால் சாலை வழியாக முண்டுவேலம்பட்டி நோக்கிச் சென்று கொண்டிருந்தார். அப்போது ஆள் நடமாட்டம் இல்லாத பகுதியில் இருசக்கர வாகனத்தில் பின்னால் வந்த மூன்று பேர், அவரை வழிமறித்து வழி கேட்பது போல் நடித்து திடீரென கத்தியால் தாக்கியுள்ளனர்.

பின்னர் அவரிடம் இருந்த ரூ.5 ஆயிரம் ரொக்கப் பணம் மற்றும் செல்போனைப் பறித்துச் சென்றுள்ளனர். மேலும், அவரது செல்போன் மூலம் ஜிபே (GPay) வழியாக ஸ்கேன் செய்து ரூ.5 ஆயிரத்தைப் பெற்றுக்கொண்டு அங்கிருந்து தப்பிச் சென்றுள்ளனர்.

காயமடைந்த சதீஷ்குமார் குண்டடம் காவல் நிலையத்தில் புகார் அளித்தார். புகாரின் பேரில், திருப்பூர் மாவட்ட காவல் கண்காணிப்பாளர் சிருஷ்டி சிங் உத்தரவின்படி, தாராபுரம் துணைக் காவல் கண்காணிப்பாளர் சிவகுமார். மேற்பார்வையில், குண்டடம் காவல் ஆய்வாளர் விவேக் தலைமையில் தனிப்படை அமைக்கப்பட்டு குற்றவாளிகளைத் தேடும் பணி தீவிரப்படுத்தப்பட்டது.

இதில், உதவி ஆய்வாளர் சரவணகுமார், தலைமைக்காவலர்கள் ராமர், மதியழகன், சக்திவேல் உள்ளிட்ட தனிப்படை போலீசார் தீவிர விசாரணை மேற்கொண்டனர். விசாரணையில், விருதுநகர் மாவட்டத்தைச் சேர்ந்த பெரியசாமி (27)s/o தவசி. கூலி வேலை செய்து வருகிறார் மற்றும் அவருடைய கூட்டாளி மணிகண்டன் (26)s/o பரமசிவம் கூலி வேலை செய்து வந்த நிலையில் குண்டடம் அருகே இருவரும் வழிப்பறியில் ஈடுபட்டது தெரியவந்தது.

இதற்கிடையே, இருவரும் மதுரை ரயில் நிலையம் வழியாக வெளியூருக்குத் தப்பிச் செல்ல முயன்றபோது, அங்கு விரைந்து சென்ற தனிப்படை போலீசார் உதவி ஆய்வாளர் சரவணகுமார் மற்றும் ராமர் மதியழகன் சக்திவேல் தனிப்படை போலீசார் இருவரையும் அதிரடியாகக் கைது செய்தனர். பின்னர் அவர்களை குண்டடம் காவல் நிலையத்திற்கு அழைத்து வந்து விசாரணை மேற்கொண்டனர். விசாரணையில், வழிப்பறி செய்த பணத்தையும் போலீசார் கைப்பற்றினர்.

மேலும், கைது செய்யப்பட்ட இருவர் மீதும் மதுரை மற்றும் விருதுநகர் மாவட்டங்களில் பல்வேறு வழக்குகள் நிலுவையில் இருப்பதாக போலீசார் தெரிவித்தனர்.

இதையடுத்து, இருவரையும் தாராபுரம் நீதிமன்றத்தில் ஆஜர்படுத்திய போலீசார், நீதிமன்ற உத்தரவின்படி கோவை மத்திய சிறையில் அடைத்தனர்.

வழிப்பறி சம்பவம் தொடர்பாக விரைந்து செயல்பட்டு, குற்றவாளிகளைத் தேடிக் கண்டுபிடித்து கைது செய்த குண்டடம் தனிப்படை போலீசாரின் நடவடிக்கைக்கு அப்பகுதி பொதுமக்கள் பாராட்டு தெரிவித்தனர்.