மாவட்ட ஆட்சியர் வ. சிவகிருஷ்ணமூர்த்தி கொடியசைத்துத் தொடங்கி வைத்தார் – 400-க்கும் மேற்பட்ட பணியாளர்கள் பங்கேற்பு
தேனி: தேனி மாவட்டம், தேனி அல்லிநகரம் நகராட்சியில் ஒருங்கிணைந்த குழந்தைகள் வளர்ச்சித் திட்டப் பணிகள் சார்பில், ஊட்டச்சத்து குறித்த விழிப்புணர்வு மற்றும் டெங்கு ஒழிப்பு விழிப்புணர்வுப் பேரணி நடைபெற்றது.
இந்தப் பேரணிக்கு மாவட்ட ஆட்சியர் வ. சிவகிருஷ்ணமூர்த்தி தலைமை வகித்து, கொடியசைத்துத் தொடங்கி வைத்தார். இதில் ஒருங்கிணைந்த குழந்தைகள் வளர்ச்சித் திட்டப் பணியாளர்கள் 400-க்கும் மேற்பட்டோர் பங்கேற்றனர்.
ஊட்டச்சத்துக் குறைபாட்டால் குழந்தைகளுக்கு ஏற்படும் பாதிப்புகள், குழந்தைகளுக்கு சத்தான உணவு வழங்குவதன் அவசியம் ஆகியவை குறித்தும், தற்போது பெய்து வரும் சாரல் மற்றும் கனமழையால் டெங்கு காய்ச்சல் பரவாமல் தடுக்க மேற்கொள்ள வேண்டிய முன்னெச்சரிக்கை நடவடிக்கைகள் குறித்தும் பொதுமக்களுக்கு விழிப்புணர்வு ஏற்படுத்தப்பட்டது.
இதற்காக விழிப்புணர்வு வாசகங்கள் அடங்கிய பதாகைகளை ஏந்தியபடி பேரணியில் பங்கேற்றவர்கள், தேனி நகரின் முக்கிய வீதிகள் வழியாகச் சென்றனர். பங்களாமேட்டில் தொடங்கிய பேரணி, நேரு சிலை வழியாகச் சென்று பழைய பேருந்து நிலையத்தில் நிறைவடைந்தது.
இந்நிகழ்ச்சியில் மாவட்ட குழந்தைகள் வளர்ச்சித் திட்ட அலுவலர் ரேவதி, தேனி அல்லிநகரம் நகராட்சி ஆணையாளர் எஸ். பார்கவி, மேலாளர் ஜெயந்தி மற்றும் பல்வேறு அரசுத் துறை அலுவலர்கள் கலந்து கொண்டனர்.