தேனி: தேனி மாவட்ட ஆட்சியர் அலுவலகத்தில் நடைபெற்ற மக்கள் குறைதீர்க்கும் நாள் கூட்டத்தில், மாவட்ட ஆட்சியர் வ. சிவ கிருஷ்ணமூர்த்தி பொதுமக்களிடமிருந்து 373 கோரிக்கை மனுக்களைப் பெற்றுக்கொண்டார்.
இக்கூட்டத்தில் முதியோர் உதவித்தொகை, புதிய வீட்டுமனைப் பட்டா, வேலைவாய்ப்பு உள்ளிட்ட பல்வேறு கோரிக்கைகள் தொடர்பாக பொதுமக்கள் மனுக்களை அளித்தனர். பொதுமக்களிடமிருந்து பெறப்பட்ட 373 மனுக்களையும் சம்பந்தப்பட்ட துறை அலுவலர்களிடம் வழங்கிய மாவட்ட ஆட்சியர், மனுக்கள் மீது உரிய விசாரணை மேற்கொண்டு, குறித்த காலத்திற்குள் விரைந்து நடவடிக்கை எடுக்குமாறு உத்தரவிட்டார்.
முன்னதாக, மாற்றுத்திறனாளிகளிடமிருந்து கோரிக்கை மனுக்களை மாவட்ட ஆட்சியர் நேரில் பெற்றுக்கொண்டார்.
இக்கூட்டத்தில் மாவட்ட வருவாய் அலுவலர் ப. ராஜகுமார், பெரியகுளம் சார் ஆட்சியர் தவலேந்து, ஊரக வளர்ச்சித் திட்ட இயக்குநர் துஷார் ஸ்ரீஹரி ஷிண்டே, கூடுதல் காவல் கண்காணிப்பாளர் கலைக்கதிரவன், மகளிர் திட்ட இயக்குநர் வீராச்சாமி, மாவட்ட ஆட்சியரின் நேர்முக உதவியாளர் இராமகிருஷ்ணன், பொது தனித்துணை ஆட்சியர் ச.பா.தி. கவிதா, மாவட்ட செய்தி மக்கள் தொடர்பு அலுவலர் பாண்டி உள்ளிட்ட பல்வேறு அரசுத் துறை அலுவலர்கள் கலந்து கொண்டனர்.