கரூர் மாவட்டம், கடவூர்:
கரூர் மாவட்டம் கடவூர் வட்டாட்சியர் அலுவலகத்தில் விவசாயிகள் அளிக்கும் மனுக்களுக்கு உரிய நடவடிக்கை எடுக்காமல் காலதாமதம் செய்து அலைக்கழிப்பதாகக் கூறி, மனுக்களைப் பெற்றுக்கொண்டதற்கான ரசீது வழங்க வேண்டும் உள்ளிட்ட கோரிக்கைகளை வலியுறுத்தி தமிழ்நாடு விவசாயிகள் சங்கத்தினர் ஒன்றிணைந்து காத்திருப்புப் போராட்டத்தில் ஈடுபட்டனர்.
இந்தப் போராட்டத்திற்கு மாவட்டத் தலைவர் கந்தசாமி, கே. சக்திவேல், மாவட்டச் செயலாளர் சுப்பிரமணி, மாவட்டப் பொறுப்பாளர் மற்றும் மாவட்ட விவசாயிகள் சங்கத் தலைவர் வேல்முருகன் ஆகியோர் தலைமை தாங்கினர். இதில் 60-க்கும் மேற்பட்ட விவசாயிகள் கலந்து கொண்டு தங்களது கோரிக்கைகளை வலியுறுத்தினர்.
போராட்டத்தின் ஒரு பகுதியாக, கடவூர் வட்டாட்சியர் அலுவலக வளாகத்திலேயே சமையல் செய்து, தொடர்ந்து காத்திருப்புப் போராட்டத்தில் ஈடுபட்டனர்.
விவசாயிகள் அளிக்கும் மனுக்களுக்கு உடனடியாகப் பெறுதல் ரசீது வழங்க வேண்டும். மனுக்கள் மீது காலதாமதமின்றி உரிய நடவடிக்கை எடுக்க வேண்டும் என்பன உள்ளிட்ட கோரிக்கைகளை வலியுறுத்தினர்.
மேலும், வட்டாட்சியர் நேரடியாக வந்து விவசாயிகளின் கோரிக்கைகளைக் கேட்டு, உடனடியாக நடவடிக்கை எடுப்பதாக உறுதியளிக்கும் வரை காத்திருப்புப் போராட்டத்தைத் தொடர்வோம் எனப் போராட்டத்தில் ஈடுபட்ட விவசாயிகள் தெரிவித்தனர்.
இதனால் கடவூர் வட்டாட்சியர் அலுவலக வளாகத்தில் பரபரப்பு நிலவியது.