நவீன மருத்துவ உபகரணங்கள் மற்றும் தொழில்நுட்பங்கள் குறித்த 200-க்கும் மேற்பட்ட அரங்குகள் – மூன்று நாட்கள் நடைபெறும் கண்காட்சிக்கு அனுமதி இலவசம்!
கோவை: கோவையில் செயல்பட்டு வரும் பயாண்ட் (BUOYANT) மீடியா நிறுவனம் சார்பில் பல்வேறு துறைகள் சார்ந்த கண்காட்சிகள் தொடர்ந்து நடத்தப்பட்டு வருகின்றன. இதன் ஒரு பகுதியாக, மருத்துவத் துறையில் பயன்படுத்தப்படும் நவீன உபகரணங்கள் மற்றும் தொழில்நுட்பங்களை ஒரே இடத்தில் காட்சிப்படுத்தும் வகையில், நான்காவது முறையாக மெடிக்கான் எக்ஸ்போ மருத்துவ உபகரணங்கள் கண்காட்சி கோவை கொடிசியா வளாகத்தில் இன்று தொடங்கியது.
நவம்பர் 20, 21, 22 ஆகிய தேதிகளில் மூன்று நாட்கள் நடைபெற உள்ள இக்கண்காட்சியின் தொடக்க விழா, பயாண்ட் மீடியா நிறுவனத்தின் நிர்வாக இயக்குநர்கள் சுந்தரமூர்த்தி மற்றும் ஹேமா சுந்தரமூர்த்தி ஆகியோர் தலைமையில் நடைபெற்றது.
இதில், கே.ஜி. மருத்துவமனை தலைவர் டாக்டர் கே.ஜி. பக்தவத்சலம், பி.எஸ்.ஜி. மருத்துவமனை இயக்குநர் டாக்டர் புவனேஸ்வரன், இந்திய மருத்துவக் கழகத்தின் தேர்வு செய்யப்பட்ட மாநிலத் தலைவர் டாக்டர் ரவிக்குமார், தலைவர் கோஷல் ராம் ஆகியோர் சிறப்பு விருந்தினர்களாகக் கலந்து கொண்டு ரிப்பன் வெட்டி கண்காட்சியைத் தொடங்கி வைத்தனர்.
இந்தக் கண்காட்சியில் மருத்துவத் துறையில் அறிமுகமாகி வரும் நவீன உபகரணங்கள், அதிநவீன தொழில்நுட்பங்கள் மற்றும் புதுமையான மருத்துவக் கண்டுபிடிப்புகள் தொடர்பாக 200-க்கும் மேற்பட்ட அரங்குகள் அமைக்கப்பட்டுள்ளன.
மருத்துவத் துறையில் ஏற்பட்டு வரும் தொழில்நுட்ப வளர்ச்சிகள், புதிய மருத்துவ சாதனங்கள் மற்றும் உபகரணங்கள் குறித்து மருத்துவர்கள், மருத்துவமனை நிர்வாகிகள், உற்பத்தியாளர்கள் மற்றும் மருத்துவத் துறை சார்ந்த நிபுணர்கள் ஒரே இடத்தில் அறிந்து கொள்ளும் வகையில் இந்தக் கண்காட்சி ஏற்பாடு செய்யப்பட்டுள்ளது.
மேலும், மருத்துவ உபகரண உற்பத்தியாளர்கள் மற்றும் தொழில் வல்லுநர்கள் இடையே வர்த்தகத் தொடர்புகளை மேம்படுத்தவும், புதிய தொழில்நுட்பங்களை அறிமுகப்படுத்தவும், எதிர்கால தொழில் வாய்ப்புகளை உருவாக்கவும் இக்கண்காட்சி சிறந்த தளமாக அமையும் என கண்காட்சி ஒருங்கிணைப்பாளர்கள் தெரிவித்தனர்.
தொடக்க விழாவில் மருத்துவ நிபுணர்கள் ஸ்ரீ ராமலிங்கம், பரமேஸ்வரன், கார்த்திகேயன், ராஜு, யுவராஜன், அன்னபூரணி, பாலாஜி, லியோ பெர்னார்ட் உள்ளிட்ட பல்வேறு மருத்துவர்கள் மற்றும் சிறப்பு விருந்தினர்கள் கலந்து கொண்டனர்.
தினமும் காலை 10.30 மணி முதல் மாலை 6 மணி வரை நடைபெறும் இக்கண்காட்சியை பொதுமக்கள் மற்றும் மருத்துவத் துறையினர் இலவசமாகப் பார்வையிடலாம் என ஏற்பாட்டாளர்கள் தெரிவித்துள்ளனர்.