தூத்துக்குடி மாவட்டம் சாத்தான்குளம் அருகே உள்ள முதலூரில் இன்று அதிகாலை வீடு புகுந்து மர்ம நபர்கள் நடத்திய தாக்குதலில் மேரி ரெஜிலா (39) உயிரிழந்தார். அவரது கணவர் முத்துக்கிருஷ்ணன் (50), மகன் பிளஸெட் ராஜா (10) ஆகியோர் படுகாயமடைந்தனர். மேலும், இரு பெண் குழந்தைகள் மாயமான நிலையில், குற்றவாளி ஞானசேகர் கைது செய்யப்பட்டுள்ளார்.
இந்த தாக்குதலில் படுகாயமடைந்த முத்துக்கிருஷ்ணன் மற்றும் பிளஸெட் ராஜா ஆகியோர் திருநெல்வேலி அரசு மருத்துவக் கல்லூரி மருத்துவமனையில் தீவிர சிகிச்சை பெற்று வருகின்றனர்.
இந்நிலையில், திமுக துணைப் பொதுச்செயலாளரும், நாடாளுமன்ற திமுக குழுத் தலைவருமான கனிமொழி ராஜாத்தி கருணாநிதி எம்.பி., திருநெல்வேலி அரசு மருத்துவக் கல்லூரி மருத்துவமனைக்குச் சென்று, சிகிச்சை பெற்று வரும் முத்துக்கிருஷ்ணன் மற்றும் அவரது மகன் பிளஸெட் ராஜா நேரில் சந்தித்து நலம் விசாரித்தார். அப்போது செய்தியாளர்களை சந்தித்த பேசிய அவர், சாத்தான்குளம் அருகே ஆனந்தபுரத்தில் வசிக்கும் முத்துகிருஷ்ணன் அவர்களின் வீட்டிற்குள் புகுந்து, அவரையும் அவரது 10 வயது மகனையும் மிகக் கொடூரமாகத் தாக்கி, அவரது துணைவியாரைக் கொலை செய்ததுடன், இரண்டு பெண்களையும் கடத்திச் சென்றுள்ள அதிர்ச்சியளிக்கும் சம்பவம் மிகுந்த மனவேதனையை ஏற்படுத்துகிறது.
தாக்குதலுக்கு உள்ளாகி மருத்துவமனையில் சிகிச்சை பெற்று முத்துகிருஷ்ணன் அவர்களையும் அவரது மகனையும் சந்தித்தேன். அந்தச் சிறுவனின் விரல்கள் துண்டிக்கப்பட்டுள்ளதுடன், அவர் மிகக் கொடூரமாகத் தாக்கப்பட்டுள்ளார். அவரது தந்தைக்கும் உடலின் பல்வேறு இடங்களில் ஆழமான வெட்டுக் காயங்கள் ஏற்பட்டுள்ளன.
அவரது தாய் உயிரிழந்துள்ள நிலையில், தமிழ்நாட்டில் இத்தகைய குற்றச் சம்பவங்கள் தினந்தோறும் நடைபெற்று வருகின்றன. தூத்துக்குடி மாவட்டத்தில் ஒரே நாளில் நான்கு கொலைச் சம்பவங்கள் நடைபெறும் சூழல் நிலவுகிறது. தமிழ்நாட்டின் ஒவ்வொரு பகுதியிலும் கொடூரமான கொலைகளும், பெண்கள் , குழந்தைகளுக்கு எதிரான வன்முறைகளும் நாள்தோறும் தொடர்ந்து நடைபெற்று வருகின்றன.
தந்தையையும் மகனையும் சந்தித்தபோது,அச்சிறுவனின் எதிர்காலம் எப்படியிருக்கும் என்ற மிகப்பெரிய கேள்வி எழுகிறது. பெண்களுக்குப் பாதுகாப்பு இல்லாத சூழல் நிலவுகிறது. வீட்டிலிருந்து கடத்திச் செல்லப்பட்ட இரண்டு பெண்களும் பின்னர் மீட்கப்பட்டு, குற்றவாளி கைது செய்யப்பட்டுள்ளார். காலையிலிருந்து குற்றவாளி கைது செய்யப்பட்டாரா, இல்லையா என்பதே கேள்விக்குறியாக இருந்தது.
இத்தகைய சூழலில் மக்கள் மிகுந்த அச்சத்துடன் வாழ்ந்து வருகின்றனர். ஒரு வீட்டிற்குள் யார் வேண்டுமானாலும் புகுந்து, அங்கிருக்கும் தாயைக் கொலை செய்து, தந்தையைத் தாக்கி, பள்ளியில் படிக்கும் 10 வயதுச் சிறுவனையும் தாக்கி, இரண்டு பெண்களைக் கடத்திச் செல்ல முடியும் என்ற நிலை இருந்தால், வீட்டில் இருந்தாலும் வெளியே சென்றாலும் மக்களுக்குப் பாதுகாப்பு இல்லை என்பதுதான் இன்றைய தமிழ்நாட்டின் நிலை.
இத்தகைய சூழலில்தான் இன்று தமிழ்நாடு தள்ளப்பட்டுள்ளது. காவல்துறை முதலமைச்சரின் நேரடிக் கட்டுப்பாட்டில் உள்ளது. முதலமைச்சர் என்ன செய்து கொண்டிருக்கிறார் என்பது தெரியவில்லை.சட்டம் ஒழுங்கு சரியாக இருப்பதாக உங்களுக்குத் தோன்றுகிறதா? மனசாட்சியுள்ள யாருக்கும் தமிழ்நாட்டில் சட்டம் ஒழுங்கு எப்படியிருக்கிறது என்பது தெளிவாகத் தெரியும். ஒவ்வொரு நாளும் கொலைச் சம்பவங்கள் நடைபெறுகின்றன. ஒரே நாளில் பல்வேறு இடங்களில் 8 முதல் 10 குற்றச் சம்பவங்கள் நடைபெறுகின்றன. இன்றைக்குத் தூத்துக்குடி மாவட்டத்திலேயே நான்கு குற்றச் சம்பவங்கள் நடைபெற்றுள்ளன.
காவல்துறை முதல்வர் கட்டுப்பாட்டில் உள்ள இருக்கக்கூடிய துறை நான் குற்றச்சாட்டாகச் சொல்லவில்லை. அதுதான் உண்மை.
உண்மையில் காவல்துறை வேறு யாருடைய கட்டுப்பாட்டில் இருக்கிறது. ஆட்சிக்கு வந்து நான்கு மாதங்கள் ஆகிவிட்டன. குற்றச் சம்பவங்கள் குறைந்திருக்க வேண்டும் அல்லவா. ஆனால் எந்த நடவடிக்கையும் எடுக்காமல், ஒவ்வொரு நாளும் குற்றச் சம்பவங்கள் அதிகரித்துக் கொண்டே சென்றால் அதற்கு யார் பொறுப்பு. இதற்குக் காரணம் திறமையின்மையாக இருக்கலாம்; மற்றொரு காரணம் அக்கறையின்மை என்றார்.