திருவள்ளூர், மணவாள நகர்:
திருவள்ளூர் மாவட்டம், ஒண்டிக்குப்பம், மணவாள நகர் பகுதியில் ஸ்ரீ தர்மசாஸ்தா பக்த சேவா அறக்கட்டளையின் மணவாள நகர் கிளையின் கீழ் அமைந்துள்ள அருள்மிகு நீர்நிலைநாயகி பெண்ணின் நல்லாள் உடனாகிய கங்கை நாத சுவாமி திருக்கோயிலில் நேற்று அன்னாபிஷேக விழா வெகு சிறப்பாக நடைபெற்றது.
இவ்விழாவை முன்னிட்டு ஸ்ரீ தர்மசாஸ்தா பக்த சேவா அறக்கட்டளை சார்பில் பிரமாண்டமான அன்னதான நிகழ்ச்சி நடைபெற்றது. இதற்காக மணவாள நகர் கிளையின் சார்பில் பொதுமக்களுக்கு வழங்குவதற்காக 500 கிலோ அன்னதான உணவு தயாரிக்கப்பட்டது.
இந்நிகழ்ச்சியில் அறக்கட்டளையின் நிறுவனர் மற்றும் தேசியத் தலைவர் மு.ரா. அரவிந்தன், தேசியப் பொதுச் செயலாளர் நந்தகுமார் ஆகியோர் கலந்து கொண்டனர். திருவள்ளூர் மாவட்டத் தலைவர் ஏழுமலை, மாவட்டப் பொருளாளர் சுரேஷ்குமார் ஆகியோரின் தலைமையில், மணவாள நகர் கிளைத் தலைவர் ரமேஷ், கிளைச் செயலாளர் சந்தோஷ் ஆகியோரின் முன்னிலையில் நிகழ்ச்சி நடைபெற்றது.
அறக்கட்டளையின் திருவள்ளூர் மாவட்டம், மணவாள நகர் கிளை நிர்வாகிகள் மற்றும் உறுப்பினர்கள் நிகழ்ச்சியில் பங்கேற்று, அன்னதானப் பணிகளில் சிறப்பாகச் சேவையாற்றினர். ஏராளமான பக்தர்களும் பொதுமக்களும் கங்கை நாத சுவாமியை வழிபட்டு, அன்னதான நிகழ்ச்சியில் கலந்து கொண்டு உணவு அருந்தினர்.
இறை வழிபாட்டுடன் பொதுமக்களுக்கான அன்னதான சேவையையும் இணைத்து நடத்தப்பட்ட இந்நிகழ்ச்சி பக்தர்களிடையே சிறப்பான வரவேற்பைப் பெற்றது.