பேராவூரணி, அக். 26:
தஞ்சாவூர் மாவட்டம், வல்லம் அடைக்கல மாதா கல்லூரி சமூகப் பணித்துறை சார்பில், நகர்ப்புற மக்களுக்கான முதியோர் மனநலம் குறித்த விழிப்புணர்வு நிகழ்ச்சி டிஎம்எஸ்எஸ்எஸ் மஹாலில் நடைபெற்றது.
நிகழ்ச்சியின் தொடக்கமாகக் குத்துவிளக்கேற்றி, தமிழ்த்தாய் வாழ்த்து பாடப்பட்டது. தொடர்ந்து, அடைக்கல மாதா கல்லூரி சமூகப் பணித்துறை முதலாம் ஆண்டு மாணவர் அடைக்கலம் வரவேற்றுப் பேசினார்.
தஞ்சாவூர் தூய அந்தோனியார் மேல்நிலைப்பள்ளித் தலைமை ஆசிரியர் அருட்தந்தை முனைவர் ஜேசுராஜ் நிகழ்ச்சிக்குத் தலைமை வகித்தார். தஞ்சாவூர் புனித வின்சென்ட் தே பவுல் சபையின் ஓசானாம் முதியோர் இல்லத் தலைவர் ஆல்பர்ட் குமார், முதியோர் மனநலத்தின் முக்கியத்துவம் குறித்து கருத்துரை வழங்கினார்.
தஞ்சாவூர் தூய இருதய பெண்கள் மேல்நிலைப்பள்ளி வளாகத்தில் இயங்கி வரும் தூய இருதய குழந்தைகள் காப்பகத்தின் சமூகப் பணியாளர் ஜூலியா, தஞ்சாவூர் புனித சூசையப்பர் பெண்கள் மேல்நிலைப்பள்ளித் தலைமை ஆசிரியர் அருட்சகோதரி பூங்கோதை மற்றும் தஞ்சாவூர் மாநகராட்சி முன்னாள் கண்காணிப்பாளர் கிளமெண்ட் ஆகியோர் வாழ்த்துரை வழங்கினர்.
முதியோரின் மனநலத்தைப் பாதுகாப்பதன் அவசியம் குறித்து பொதுமக்களிடையே விழிப்புணர்வு ஏற்படுத்தும் வகையில் நடனம், நாடகம் மற்றும் பாடல்கள் நிகழ்ச்சியில் இடம்பெற்றன. இதில் நகர்ப்புற மக்கள் கலந்து கொண்டனர்.
நிகழ்ச்சியை சமூகப் பணித்துறை மாணவர் எரோமியாஸ்தமஸ்கு தொகுத்து வழங்கினார். இறுதியில், முதலாம் ஆண்டு சமூகப் பணித்துறை மாணவி மரிய பிரவீனா நன்றி கூறினார்.
அடைக்கல மாதா கல்லூரி சமூகப் பணித்துறைப் பேராசிரியர்கள் முனைவர் முத்துக்குமார், வனிதா, கோபி மற்றும் வனஜா ஆகியோரின் வழிகாட்டுதலின்படி, முதலாம் ஆண்டு சமூகப் பணித்துறை மாணவர்கள் நிகழ்ச்சிக்கான ஏற்பாடுகளைச் செய்திருந்தனர்.