ஈரோடு, அக்டோபர்
ஈரோடு மாநகராட்சி 36-வது வார்டு கவுன்சிலரும், வரி மற்றும் மேல்முறையீட்டுக் குழு மற்றும் பணிகள் நிலைக்குழு உறுப்பினருமான பழனியப்பா நா. செந்தில்குமார், ஆண்டுதோறும் தீபாவளி பண்டிகையை முன்னிட்டு ஏழை, எளிய மக்களுக்கும் தூய்மைப் பணியாளர்களுக்கும் தனது சொந்த நிதியில் இருந்து நல உதவிகளை வழங்கி வருகிறார்.
அதன்படி, இந்த ஆண்டு தீபாவளி பண்டிகையை முன்னிட்டு, 36-வது வார்டில் பணியாற்றும் தூய்மைப் பணியாளர்கள், ஊராட்சிக்கோட்டை குடிநீர்த் திட்டப் பணியாளர்கள், ஓட்டுநர்கள், சுகாதார ஆய்வாளர்கள், மேற்பார்வையாளர்கள், தெருவிளக்கு பராமரிப்பாளர்கள், கொசு ஒழிப்புப் பணியாளர்கள் உள்ளிட்ட பல்வேறு பிரிவுகளைச் சேர்ந்த பணியாளர்களுக்கு நல உதவிகள் வழங்கும் நிகழ்ச்சி நடைபெற்றது.
இந்நிகழ்ச்சியில், பணியாளர்களுக்கு பட்டாசுப் பெட்டிகள், புத்தாடைகள் மற்றும் இனிப்புப் பெட்டிகள் வழங்கப்பட்டன. மேலும், 36-வது வார்டு பகுதியில் வசிக்கும் பொதுமக்களின் வீடுகளுக்குச் நேரில் சென்று தீபாவளி நல உதவிகளும் வழங்கப்பட்டன.
இந்நிகழ்ச்சியில் தொழிலதிபர்கள், முக்கியப் பிரமுகர்கள், கவுன்சிலரின் குடும்பத்தினர் மற்றும் உறவினர்கள் உள்ளிட்ட பலர் கலந்து கொண்டனர். நிகழ்ச்சிக்கான ஏற்பாடுகளையும் ஒருங்கிணைப்புப் பணிகளையும் உதவியாளர் கௌதம் மேற்கொண்டார்.