ஒளியின் திருவிழாவான தீபாவளி, இருளை அகற்றி ஒளியை ஏற்றும் மகிழ்ச்சியின் திருநாளாகும். தீமையின் மீது நன்மையும், அறியாமையின் மீது அறிவும், வெறுப்பின் மீது அன்பும் வெற்றி பெற வேண்டும் என்ற உயரிய வாழ்வியல் செய்தியை இத்திருநாள் நமக்கு உணர்த்துகிறது. இந்த இனிய நன்னாளில், தமிழக மக்கள் அனைவருக்கும், குறிப்பாக நமது அன்பு இந்து சமய சகோதர சகோதரிகள் அனைவருக்கும் இதயம் கனிந்த தீபாவளி நல்வாழ்த்துகளைத் தெரிவித்துக்கொள்கிறேன்.
தீபாவளி என்பது இல்லங்களை மட்டுமல்ல,இதயங்களையும் ஒளிரச் செய்யும் திருநாளாக அமைய வேண்டும். நமது சமூகத்தில் நிலவும் அறியாமை, வெறுப்பு, பகைமை, பாகுபாடு போன்ற இருள்களை அகற்றி, அன்பு, அமைதி,நீதி, சமத்துவம், சகோதரத்துவம் ஆகிய நற்பண்புகளை நம் வாழ்வில் ஒளிரச் செய்வதே இத்திருநாளின் உண்மையான மகிழ்ச்சியாகும்.
பல சமயங்கள், மொழிகள், இனங்கள், கலாச்சாரங்கள் இணைந்து வாழும் இந்தியத் திருநாட்டின் தனித்துவமான பெருமை அதன் பன்முகத்தன்மையிலும் மத நல்லிணக்கத்திலும்தான் அடங்கியுள்ளது. பிறருடைய சமய நம்பிக்கைகளையும் வழிபாட்டு மரபுகளையும் மதித்து ஏற்றுக்கொள்வதும், வேறுபாடுகளைக் கடந்து ஒருவரையொருவர் புரிந்துகொள்வதும் நமது சமூகக் கடமையாகும். சமயங்களுக்கு இடையிலான உரையாடல் என்பது வெறும் கருத்துப் பரிமாற்றம் மட்டுமல்ல அது பரஸ்பர மரியாதை, நம்பிக்கை, நட்பு, புரிதல் ஆகியவற்றின் வழியாக அமைதியான சமூகத்தைக் கட்டியெழுப்பும் பாலமாகும்.
இன்றைய உலகில் வெறுப்புணர்வு, மதவாதம், வன்முறை, பிரிவினை போன்ற சக்திகள் மனித உறவுகளைச் சிதைக்க முற்படும் சூழலில், அனைத்து சமயத் தலைவர்களும், சமூக ஆர்வலர்களும், பொதுமக்களும் இணைந்து அமைதியையும் நல்லிணக்கத்தையும் வளர்க்க முன்வர வேண்டும். நமது சமய நம்பிக்கைகள் நம்மைப் பிரிப்பதற்காக அல்ல மாறாக மனிதநேயத்திலும் அன்பிலும் நம்மை ஒன்றிணைப்பதற்காக அமைய வேண்டும். குறிப்பாக, தமிழகத்தின் நீண்டகால சமய நல்லிணக்க மரபையும் சமூக ஒற்றுமையையும் எதிர்காலத் தலைமுறைகளுக்குக் பகிர்தளிப்பது நம் அனைவரின் கூட்டுப் பொறுப்பாகும்.
இந்தத் தீபாவளித் திருநாளில், ஒவ்வொரு இல்லத்திலும் மகிழ்ச்சியும் அமைதியும் நிறையட்டும் குடும்ப உறவுகள் அன்பால் வலுப்பெறட்டும் ஏழை எளியோரின் வாழ்வில் நம்பிக்கையின் ஒளி ஏற்றப்படட்டும். நம் இதயங்களில் ஏற்றப்படும் அன்பின் தீபம், சமூகத்தில் நிலவும் வெறுப்பு மற்றும் பிரிவினையின் இருளை அகற்றட்டும். சமய நல்லிணக்கம், சகோதரத்துவம், மனிதநேயம் ஆகியவை நமது சமூகத்தின் அடையாளங்களாகத் திகழட்டும்.
ஒளி ஏற்றும் இத்திருநாள், உள்ளங்களில் அன்பையும், உறவுகளில் நல்லிணக்கத்தையும், சமூகத்தில் அமைதியையும், நாட்டில் ஒற்றுமையையும் மலரச் செய்யட்டும்!
என மதுரை உயர்மறை மாவட்ட கத்தோலிக்க பேராயர் அந்தோணிசாமி சவரிமுத்து தீபாவளி வாழ்த்து தெரிவித்துள்ளார்….