புதுச்சேரி : வில்லியனூரில் இன்று காவல்துறை சார்பில் கிராமப்புற பொதுமக்களின் குறைகளைக் கேட்டறியும் சிறப்பு முகாம் நடைபெற்றது.
இந்த முகாமில் வில்லியனூர் மற்றும் சுற்றுவட்டார கிராமங்களைச் சேர்ந்த ஏராளமான பொதுமக்கள் கலந்து கொண்டு, தங்களது குறைகள் மற்றும் கோரிக்கைகளை காவல்துறை அதிகாரிகளிடம் நேரடியாகத் தெரிவித்தனர்.
முகாமில் கலந்து கொண்ட காவல்துறை உயர் அதிகாரியான எஸ்.எஸ்.பி. திரு. கலைவாணன் ஐ.பி.எஸ். ஹெலோன்டோ அவர்கள், பொதுமக்களிடமிருந்து பெறப்படும் புகார்கள் மற்றும் பிரச்சினைகளை காவல்துறையினர் எவ்வாறு அணுகி, உரிய முறையில் கையாள வேண்டும் என்பது குறித்து பல்வேறு ஆலோசனைகளையும் அறிவுரைகளையும் வழங்கினார்.
மேலும், பொதுமக்களின் குறைகளுக்கு உரிய முக்கியத்துவம் அளித்து, அவர்களின் பிரச்சினைகளைச் சட்டப்படி தீர்ப்பதற்கான நடவடிக்கைகளை மேற்கொள்ள வேண்டும் என்றும் அறிவுறுத்தினார்.
இந்நிகழ்ச்சியில் மேற்கு காவல் கண்காணிப்பாளர் எஸ்.பி. அனுரா சோப்ரா, வில்லியனூர் காவல் ஆய்வாளர் கலைச்செல்வன், உதவி ஆய்வாளர் திருமுருகன், மேற்கு காவல் ஆய்வாளர், உதவி ஆய்வாளர்கள் மற்றும் காவல்துறையினர் கலந்து கொண்டனர்.
பொதுமக்களுக்கும் காவல்துறையினருக்கும் இடையே நல்லுறவை மேம்படுத்தி, மக்களின் குறைகளை நேரடியாகக் கேட்டறியும் வகையில் இந்த முகாம் நடைபெற்றது.