செங்கல்பட்டு: செங்கல்பட்டு மாவட்டம், பாபுராயன்பேட்டையில் அமைந்துள்ள எஸ்.ஆர்.எம். வேளாண்மை அறிவியல் கல்லூரி சார்பில், விவசாயிகளின் வாழ்வாதாரத்தை மேம்படுத்தவும், நவீன வேளாண் தொழில்நுட்பங்கள் மற்றும் அரசு நலத்திட்டங்கள் குறித்த விழிப்புணர்வை ஏற்படுத்தவும் சிறப்புப் பயிற்சி முகாம் நடைபெற்றது.
மொரப்பாக்கம் ஊராட்சி சமுதாய நலக்கூடத்தில் நடைபெற்ற இம்முகாமில், நான்கு துறை சார்ந்த சிறப்பு வல்லுநர்கள் கலந்து கொண்டு விவசாயிகளுக்குப் பயனுள்ள தொழில்நுட்பங்கள் மற்றும் செயல்விளக்கப் பயிற்சிகளை வழங்கினர்.
இதில், பேராசிரியர் டாக்டர் கணேசமூர்த்தி உயிரி எரிவாயு (Biogas) உற்பத்தி மற்றும் அதன் பயன்பாடுகள் குறித்தும், பேராசிரியர் டாக்டர் சந்திரசேகர் பயிர் வளர்ச்சி ஊக்கி (Crop Booster – Nutritera) மற்றும் அதன் பயன்பாடுகள் குறித்தும் விளக்கினர்.
தொடர்ந்து, பேராசிரியர் டாக்டர் கார்த்திகேயன் கால்நடை வளர்ப்பு மற்றும் கோழிப்பண்ணை மேலாண்மை குறித்துப் பயிற்சி அளித்தார். பேராசிரியர் டாக்டர் ஷியாம் சுந்தர் மத்திய, மாநில அரசுகளின் விவசாய நலத்திட்டங்கள், மானியங்கள் மற்றும் அவற்றைப் பெறுவதற்கான வழிமுறைகள் குறித்து எடுத்துரைத்தார்.
இப்பயிற்சி முகாமின் மூலம் விவசாயிகள் நவீன வேளாண் தொழில்நுட்பங்களைப் பயன்படுத்தி விவசாய உற்பத்தியைப் பெருக்கவும், கூடுதல் வருமானம் ஈட்டவும் தேவையான பயனுள்ள விழிப்புணர்வைப் பெற்றனர்.
இம்முகாமிற்கான ஏற்பாடுகளை கேன் சைன் குழு மாணவர்கள் மேற்கொண்டனர். இதில் ஸ்ரீ, சுதிர், அஷ்வின், லோகேஷ், விக்னேஷ், ஆகாஷ், புவனேஷ்வரன், சிவன்ராஜ், அரிதாஸ், கலைவாணன், வீரேந்திரன், தினேஷ்பாபு உள்ளிட்ட மாணவர்கள் கலந்து கொண்டு சிறப்பித்தனர்.
மேலும், இப்பயிற்சி முகாம் சிறப்பாக நடைபெற வழிகாட்டி, ஊக்கமளித்து பயிற்சி வழங்கிய பேராசிரியர்களுக்கும், முழு ஒத்துழைப்பு அளித்த விவசாயிகளுக்கும் கேன் சைன் குழு மாணவர்கள் தங்களது மனமார்ந்த நன்றியைத் தெரிவித்துக் கொண்டனர்.
“விவசாயிகளின் முன்னேற்றமே நாட்டின் முன்னேற்றம்” என்ற உயரிய நோக்கத்தை வலியுறுத்தும் வகையில் இப்பயிற்சி முகாம் அமைந்தது.