கோவை சஹோதயா 10-வது வருடாந்திர விளையாட்டுப் போட்டியில் ஸ்டேன்ஸ் பள்ளி மாணவ, மாணவிகள் சாதனை படைத்துள்ளனர். தடகளப் போட்டியில் இப்பள்ளியின் மாணவ, மாணவிள் சிறப்பான தனிநபர் செயல்பாடுகளை வெளிப்படுத்தினர்.
12 ஆம் வகுப்பைச் சேர்ந்த பி.நினாத், 19 வயதுக்குட்பட்ட ஆண்கள் பிரிவில் 1,500 மீட்டர் மற்றும் 800 மீட்டர் ஓட்டம் ஆகிய இரண்டு போட்டிகளிலும் வெற்றி பெற்று சாதனை படைத்தார். 12 ஆம் வகுப்பைச் சேர்ந்த எஸ்.ஆஸ்வின் சாமுவேல், 19 வயதுக்குட்பட்ட ஆண்கள் பிரிவில் 100 மீட்டர் மற்றும் 200 மீட்டர் ஓட்டப் போட்டிகளிலும் சாதனை படைத்தார்.
11 ஆம் வகுப்பைச் சேர்ந்த ஜோஷிதா பி ஐயர், 19 வயதுக்குட்பட்ட பெண்கள் பிரிவில் வட்டு எறிதல் போட்டியில் வெற்றி பெற்றதுடன், ஈட்டி எறிதலில் மூன்றாம் இடத்தைப் பிடித்தார். 12 ஆம் வகுப்பைச் சேர்ந்த பி.ஹரிணி, 19 வயதுக்குட்பட்ட பெண்கள் பிரிவில் உயரம் தாண்டுதல் போட்டியில் சாதனை படைத்து வெற்றி பெற்றதுடன், 100 மீட்டர் தடை தாண்டும் போட்டிகளிலும் வெற்றி பெற்றார். அதோடு தனது சிறப்பான செயல்பாட்டிற்காக தனிநபர் சாம்பியன்ஷிப் விருதையும் அவர் பெற்றார்.
11 ஆம் வகுப்பைச் சேர்ந்த கிரேஸ் ஏஞ்சல், 19 வயதுக்குட்பட்டோர் பிரிவில் நீளம் தாண்டுதல் போட்டியில் முதலிடம் பிடித்து புதிய சாதனையை நிகழ்த்தினார்.
இப்பள்ளி தடகள வீரர்கள் சிறப்பான ஆட்டங்கள் மூலம் 19 வயதுக்குட்பட்டோர் பிரிவில் (ஆண்கள் மற்றும் பெண்கள் இரு பிரிவுகளிலும்) ‘ஒட்டுமொத்த சாம்பியன்’ பட்டத்தை வென்று அசத்தியது. இந்தச் சாதனை, மாணவர்கள் மற்றும் பயிற்சியாளர்களின் கடின உழைப்பு, ஒழுக்கம் மற்றும் உறுதியான மனப்பான்மையை வெளிப்படுத்தியது.
ஸ்டேன்ஸ் பள்ளி தொடர் ஓட்டப் போட்டிகளில் சிறப்பாகச் செயல்பட்டு, 19 வயதுக்குட்பட்ட ஆண்கள் மற்றும் பெண்கள் பிரிவுகளில் முதலிடத்தையும், 14 வயதுக்குட்பட்ட பெண்கள் பிரிவில் மூன்றாம் இடத்தையும் பிடித்தது.
பள்ளியின் விளையாட்டுச் சாதனைகளுக்கு மேலும் வலுசேர்க்கும் விதமாக, கோவையில் உள்ள எஸ்.எஸ்.வி.எம் வேர்ல்ட் பள்ளி நடத்திய கோவை சஹோதயா பள்ளிகளுக்கிடையேயான கூடைப்பந்துப் போட்டியில், 19 வயதுக்குட்பட்ட ஆண்கள் கூடைப்பந்து அணி இரண்டாம் இடத்தைப் பிடித்தது குறிப்பிடத்தக்கது.
வெற்றி பெற்ற ஸ்டேன்ஸ் பள்ளி மாணவ, மாணவிகளைப் பள்ளி நிர்வாகம் பாராட்டி கௌரவித்தது. நிகழ்ச்சியில் பேசிய ஐலீன் ஜெத்ரோ, ஸ்டேன்ஸ் பள்ளிக்குப் பெருமை சேர்த்த இளம் விளையாட்டு வீரர்கள், பயிற்சியாளர்கள் மற்றும் உடற்கல்வி ஆசிரியர்களுக்கு வாழ்த்து தெரிவித்தார். வெற்றி பெற்றவர்களுக்குப் பதக்கங்கள் மற்றும் கோப்பைகளை வழங்கி பாராட்டினார். மாணவர்களின் வெற்றிக்குக் காரணமாக இருந்த பயிற்சியாளர்கள் மற்றும் உடற்கல்வி ஆசிரியர்களையும் அவர் பாராட்டினார்.
19 வயதுக்குட்பட்டோர் ஆண்கள் மற்றும் பெண்கள் என இரு பிரிவுகளிலும் ஒட்டுமொத்த சாம்பியன் பட்டத்தை வென்றது ஒரு குறிப்பிடத்தக்க சாதனை மட்டுமல்ல, அது பள்ளிக்கு பெருமை தரும் சிறப்பைப் பிரதிபலிப்பதாக உள்ளது என்றும் பெருமிதம் தெரிவித்தார்.
பள்ளியின் குறிக்கோள் வாசகமான Excelsa Sequar உயர்ந்ததை நோக்கிச் செல்லுதல் என்பதைக் குறிப்பிட்ட அவர், அது வெறும் பலகையில் எழுதப்பட்ட வாசகமோ அல்லது நாட்குறிப்பில் உள்ள சொற்றொடரோ மட்டுமல்ல, மாணவர்கள் தங்கள் வாழ்நாள் முழுவதும் தங்கள் இதயத்தில் சுமந்து செல்ல வேண்டிய ஒரு கொள்கை என்று கூறினார்.
உண்மையான சாதனை என்பது பதக்கங்கள் மற்றும் சாம்பியன் பட்டங்களுக்கு மட்டும் மட்டுப்படுத்தப்பட்டதல்ல என்பதை வலியுறுத்திய அவர், மாணவர்கள் உயர்ந்த இலக்குகளை அடைய ஊக்குவித்தார். மாணவர்கள் வெளிப்படுத்திய ஒழுக்கம், உறுதிப்பாடு, குழுப்பணி மற்றும் துணிச்சல் ஆகியவை பாராட்டுக்குரியவை என்று அவர் குறிப்பிட்டார். வெற்றியைத் தாண்டி, அதற்குப் பின்னணியில் உள்ள கடின உழைப்பும் விடாமுயற்சியுமே மிக முக்கியமானவை என்று அவர் கூறினார். அதே பண்புகள் அவர்கள் வாழ்க்கையில் சவால்களை முறியடித்து வெற்றிபெற உதவும் என்றும் அவர் வாழ்த்து தெரிவித்தார்.
விளையாட்டுத் திறன்களை வளர்ப்பதைத் தாண்டி, இளம் விளையாட்டு வீரர்களின் ஆளுமையை வடிவமைப்பதிலும் அவர்களின் பங்களிப்பு முக்கிய பங்காற்றியது என்றும் சிறப்பானது தற்செயலாக அடையப்படுவதில்லை, மாறாக தொடர்ச்சியான முயற்சி, ஒழுக்கம் மற்றும் ஒருபோதும் கைவிடாத உறுதியின் மூலமே அடையப்படுகிறது என்றும் ஐலீன் ஜெத்ரோ வலியுறுத்தினார்.