முத்துப்பேட்டை., நவ.19-
திருவாரூர் மாவட்டத்தில் குறுவை சாகுபடி போதிய தண்ணீரின்றி பாதிக்கப்பட்ட நிலையில், தற்போது சம்பா சாகுபடியும் தண்ணீர் பற்றாக்குறையால் பாதிக்கப்பட்டுள்ளது. வயல்களில் தண்ணீரின்றி கருகி வரும் நெற்பயிர்களைக் காப்பாற்றுவதற்காக, விவசாயிகள் வாய்க்கால்களில் தேங்கியுள்ள தண்ணீரை குடங்களில் எடுத்துச் சென்று பயிர்களுக்கு தெளித்து வருகின்றனர்.
ஆண்டுதோறும் ஜூன் 12-ந் தேதி மேட்டூர் அணையில் இருந்து குறுவை சாகுபடிக்காக தண்ணீர் திறக்கப்படுவது வழக்கம். ஆனால், இந்த ஆண்டு போதிய நீர் இருப்பு இல்லாததால் மேட்டூர் அணையில் இருந்து தண்ணீர் திறக்கப்படவில்லை. இதனால் திருவாரூர் மாவட்டம் மன்னார்குடி, திருத்துறைப்பூண்டி, முத்துப்பேட்டை உள்ளிட்ட பகுதிகளில் குறுவை சாகுபடி மேற்கொள்ள முடியாமல் விவசாயிகள் பாதிக்கப்பட்டனர்.
இதற்கிடையே, சம்பா சாகுபடியையாவது மேற்கொள்ளலாம் என்ற நம்பிக்கையில் செப்டம்பர் 1-ந் தேதி மேட்டூர் அணையில் இருந்து தண்ணீர் திறக்கப்பட்டது. இதனைத் தொடர்ந்து விவசாயிகள் தங்களது விளைநிலங்களை உழுது நேரடி நெல் விதைப்பில் ஈடுபட்டனர். அவ்வப்போது பெய்த மழையால் நெல் விதைகள் முளைத்து பயிர்கள் வளரத் தொடங்கின.
ஆனால், மேட்டூரில் இருந்து திறக்கப்பட்ட தண்ணீர் ஆறுகள் மற்றும் பாசன வாய்க்கால்கள் வழியாக கடைமடை பகுதிகளுக்குப் போதிய அளவில் சென்றடையவில்லை. இதனால் கடைமடை பகுதிகளில் பாசனத்துக்கு தண்ணீர் கிடைக்காமல் விவசாயிகள் தவித்து வருகின்றனர்.
குறிப்பாக முத்துப்பேட்டை அருகே சித்தமல்லி, புத்தகரம், செருகளத்தூர், ராமகிருஷ்ணாபுரம் உள்ளிட்ட கிராமங்களில் பயிரிடப்பட்டுள்ள சம்பா நெற்பயிர்கள் தண்ணீரின்றி கருகத் தொடங்கியுள்ளன. 40 முதல் 60 நாட்களைக் கடந்துள்ள பயிர்களைக் காப்பாற்ற முடியாமல் விவசாயிகள் வேதனையடைந்துள்ளனர். வடகிழக்கு பருவமழையும் போதிய அளவில் பெய்யாததால் பயிர்களின் வளர்ச்சி பாதிக்கப்பட்டுள்ளதாக விவசாயிகள் தெரிவிக்கின்றனர்.
குடங்களில் தண்ணீர்
வயல்களுக்கு தண்ணீர் பாய்ச்சுவதற்கு வழியில்லாததால், விவசாயிகள் வாய்க்கால்களில் தேங்கியுள்ள தண்ணீரை குடங்களில் எடுத்துச் சென்று கருகத் தொடங்கியுள்ள நெற்பயிர்கள் மீது தெளித்து வருகின்றனர். ஏக்கர் கணக்கில் பயிரிட்ட நெற்பயிர்களைக் காப்பாற்ற குடம் குடமாக தண்ணீர் சுமந்து செல்லும் விவசாயிகளின் நிலை அப்பகுதியில் சோகத்தை ஏற்படுத்தியுள்ளது.
குறுவை சாகுபடியை இழந்த நிலையில், சம்பா சாகுபடியும் பாதிக்கப்பட்டுள்ளதால் இந்த ஆண்டும் பெரும் பொருளாதார இழப்பைச் சந்திக்க வேண்டிய நிலை ஏற்படும் என விவசாயிகள் கவலை தெரிவிக்கின்றனர்.
வறட்சி மாவட்டமாக அறிவிக்க கோரிக்கை
எனவே, தமிழக அரசு உயர் மட்டக் குழுவை காவிரி டெல்டா மாவட்டங்களுக்கு அனுப்பி, தண்ணீரின்றி கருகி வரும் சம்பா பயிர்களை நேரில் ஆய்வு செய்ய வேண்டும். பாதிக்கப்பட்ட பகுதிகளை வறட்சி பாதித்த மாவட்டங்களாக அறிவித்து அரசிதழில் வெளியிட வேண்டும்.
மேலும், பாதிக்கப்பட்ட விவசாயிகளுக்கு உரிய நிவாரணம் வழங்குவதுடன், வறட்சி நிவாரணப் பணிகளைத் தீவிரப்படுத்த வேண்டும். இதற்குத் தேவையான நிதியை மத்திய அரசிடம் இருந்து பெற தமிழக அரசு உரிய நடவடிக்கை எடுக்க வேண்டும் என்று விவசாயிகள் கோரிக்கை விடுத்துள்ளனர்.