பேராவூரணி, நவ. 14:
தஞ்சாவூர் மாவட்டம், பேராவூரணி அருகே உள்ள கரிசவயல் அரசு மேல்நிலைப் பள்ளியில், தேசிய கல்வி தினத்தை முன்னிட்டு 12-ஆம் வகுப்பு மாணவர்களுக்கான உயர்கல்வி மற்றும் வேலைவாய்ப்பு வழிகாட்டுதல் நிகழ்ச்சி நடைபெற்றது.
ஈச்சங்கோட்டை டாக்டர் எம்.எஸ். சுவாமிநாதன் வேளாண்மைக் கல்லூரி மற்றும் ஆராய்ச்சி நிலையத்தின் கிராமப்புற வேளாண் பணி அனுபவத் திட்ட மாணவிகள் சார்பில் இந்நிகழ்ச்சி ஏற்பாடு செய்யப்பட்டிருந்தது.
இதில், 12-ஆம் வகுப்பு முடித்த பின்னர் மாணவர்கள் தேர்வு செய்யக்கூடிய கலை மற்றும் அறிவியல் படிப்புகள், பொறியியல், மருத்துவம், வேளாண்மை உள்ளிட்ட தொழில்முறைப் படிப்புகள், அவற்றுக்கான சேர்க்கை நடைமுறைகள் மற்றும் வேலைவாய்ப்பு வாய்ப்புகள் குறித்து விரிவாக எடுத்துரைக்கப்பட்டது.
நிகழ்ச்சியில் வேளாண்மைக் கல்லூரி முதல்வர் முனைவர் கு. இரா. ஜெகன்மோகன் கலந்து கொண்டு மாணவர்களுக்கு உயர்கல்வி மற்றும் எதிர்கால வேலைவாய்ப்புகள் குறித்து வழிகாட்டுதல் வழங்கினார்.
நிகழ்ச்சிக்கான ஏற்பாடுகளை பள்ளித் தலைமை ஆசிரியர் முனைவர் க. வினோத்குமார் செய்திருந்தார்.
இந்நிகழ்ச்சி மூலம் மாணவர்கள் உயர்கல்வி குறித்த பல்வேறு வாய்ப்புகளை அறிந்து கொண்டு, தங்களது எதிர்காலக் கல்வி மற்றும் தொழில் வாழ்க்கையைத் திட்டமிடுவதற்கான விழிப்புணர்வைப் பெற்றனர்.