கோவை: கோவை இந்துஸ்தான் கலை மற்றும் அறிவியல் கல்லூரி சார்பில், கல்வி மற்றும் தொழில்துறை நிறுவனங்களுக்கு இடையேயான உறவை வலுப்படுத்தும் வகையில் PACT-2026 என்ற தொழில்துறை கூட்டாண்மை நிகழ்ச்சி கல்லூரி வளாகத்தில் உள்ள பாரதியார் அரங்கில் நடைபெற்றது.
‘இணைவோம், ஒத்துழைப்போம், தாக்கத்தை உருவாக்குவோம்’ என்ற மையக்கருத்தில் நடைபெற்ற இந்நிகழ்ச்சியில், இந்துஸ்தான் கல்வி நிறுவனங்களின் நிர்வாக அறங்காவலர் டாக்டர் டி.ஆர். சரஸ்வதி கண்ணையன், செயல் செயலாளர் டாக்டர் பிரியா கே., கல்லூரி முதல்வர் டாக்டர் ஏ. பொன்னுசாமி மற்றும் பல்வேறு துறைத் தலைவர்கள் கலந்து கொண்டனர்.
இந்த நிகழ்ச்சியில் 150-க்கும் மேற்பட்ட தொழில்துறை நிறுவனங்களின் பிரதிநிதிகள் பங்கேற்றனர். மாணவர்களின் கல்வி அறிவுடன் தொழில்துறைக்குத் தேவையான நடைமுறைத் திறன்களையும் மேம்படுத்தி, வேலைவாய்ப்புக்குத் தகுதியான பட்டதாரிகளை உருவாக்குவதே இந்நிகழ்ச்சியின் முக்கிய நோக்கமாக அமைந்தது.
இதன் ஒரு பகுதியாக, தொழில்துறை வல்லுநர்களின் வழிகாட்டுதல், சிறப்புப் பயிற்சி வகுப்புகள், தொழிற்சாலைப் பார்வைகள் மற்றும் உள்ளகப் பயிற்சிகளுக்கான வாய்ப்புகளை மாணவர்களுக்கு ஏற்படுத்துவது குறித்தும் ஆலோசிக்கப்பட்டது.
தொடர்ந்து செய்தியாளர்களிடம் பேசிய கல்லூரி முதல்வர் டாக்டர் ஏ. பொன்னுசாமி, தொழில்துறை கூட்டாண்மை நிகழ்வுகள் மூலம் மாணவர்களின் திறன்களை மேம்படுத்துவதுடன், அவர்களுக்குச் சிறந்த வேலைவாய்ப்புகளை உருவாக்கவும் முடியும் எனத் தெரிவித்தார்.
மேலும், வேகமாக வளர்ந்து வரும் தொழில்நுட்ப உலகில் ஏற்படும் புதிய மாற்றங்களுக்கு ஏற்ப மாணவர்கள் தங்களது அறிவையும் திறன்களையும் தொடர்ந்து மேம்படுத்திக் கொள்வது அவசியம் என்றும், இதற்கு தொழில்துறை நிறுவனங்களுடனான புரிந்துணர்வு ஒப்பந்தங்கள் பெரிதும் உதவும் என்றும் கூறினார்.
தொழில்துறையின் எதிர்பார்ப்புகளை அறிந்து, அதற்கேற்ப மாணவர்களைத் தயார்படுத்துவதே இத்தகைய கூட்டாண்மைகளின் முக்கிய நோக்கம் என்றும் அவர் தெரிவித்தார்.
கல்வி நிறுவனங்களுக்கும் தொழில்துறை நிறுவனங்களுக்கும் இடையேயான ஒத்துழைப்பை வலுப்படுத்தி, மாணவர்களின் திறன் மேம்பாடு மற்றும் வேலைவாய்ப்புகளை அதிகரிக்கும் முக்கிய முயற்சியாக PACT-2026 நிகழ்ச்சி அமைந்தது.