பெரம்பலூர் மாவட்டம் 147- பெரம்பலூர் (தனி) மற்றும் 148- குன்னம் ஆகிய இரண்டு சட்டமன்ற தொகுதிகளை உள்ளடக்கியதாகும் இந்திய தேர்தல் ஆணையத்தின் உத்தரவின்படி 4/11/2025 முதல் வாக்காளர் பட்டியல் சிறப்பு தீவிர திருத்த பணிகள் நடைபெற்று வருகிறது.
அதற்கான கணக்கீட்டுப் படிவங்கள் அனைத்து வாக்காளர்களுக்கும் வாக்குச்சாவடி நிலை அலுவலர்களால் வீடு வீடாக சென்று வழங்கப்பட்ட நிலையில், படிவங்கள் முறையாக பூர்த்தி செய்யப்பட்டு திரும்ப பெறப்பட்டு இந்திய தேர்தல் ஆணையத்தின் பிரத்யேக செயலியில் பதிவேற்றும் பணிகளும் முழு வீச்சில் நடைபெற்று வருகிறது.
இப்பணிகளை செய்து முடிக்க 11.12.2025 கடைசி நாளாகும்.
(30.11.2025) மாலை நிலவரப்படி பெரம்பலூர் மாவட்டத்தில் இரண்டு சட்டமன்ற தொகுதிகளையும் சேர்த்து சுமார் 90.21% பணிகள் முழுமையாக நிறைவு பெற்றுள்ளது. மீதமுள்ள 10 சதவீத பணிகளை துரிதப்படுத்துவதற்காக மாவட்ட நிர்வாகத்தின் சார்பில் பல்வேறு நடவடிக்கைகள் எடுக்கப்பட்டு வருகின்றது.
இதுவரை படிவங்களை பூர்த்தி செய்து வழங்காத வாக்காளர்களுக்கு நினைவூட்டுவது, வாக்குச்சாவடி மையங்களில் வாக்காளர்களுக்கான உதவி மையங்கள் அமைத்து அவர்களுக்கான சந்தேகங்களை நிவர்த்தி செய்து படிவங்களை பூர்த்தி செய்வது உள்ளிட்ட பல்வேறு முன்னெடுப்புகள் எடுக்கப்பட்டுள்ளது.
அதன் ஒரு பகுதியாக சிறப்பு தீவிர திருத்தம் குறித்த முக்கியத்துவத்தை படிவங்களை வழங்காத வாக்காளர்களுக்கு விளக்கிடும் வகையில், முழுவதும் செயற்கை நுண்ணறிவு தொழில்நுட்பத்தின் உதவியோடு உருவாக்கப்பட்டுள்ள விழிப்புணர்வு வீடியோவை மாவட்ட ஆட்சித்தலைவர் / மாவட்ட தேர்தல் அலுவலர் மிருணாளினி, சமூகவளைதளப் பக்கங்களில் வெளியிட்டுள்ளார்.