பா வடிவேல் அரியலூர் செய்தியாளர்
அரியலூர் மாவட்டம் ஆண்டிமடம் அருகே உள்ள தாவடநல்லூர் கிராமத்தில் உயர் அழுத்த மின்கம்பி அமைக்கும் பணியை எதிர்த்து விவசாயிகள் போராட்டத்தில் ஈடுபட்டதால் மூன்று மணி நேரத்திற்கு மேலாக பரபரப்பு நிலவியது.
தாவடநல்லூர் கிராமத்தில் ஏற்கனவே தாழ்வு அழுத்த மின்கம்பி பயன்பாட்டில் உள்ளது. அந்த மின்கம்பம் கிராம விவசாயிகளின் பட்டா நிலம் வழியாக அமைக்கப்பட்டுள்ளதாக கூறப்படுகிறது. இந்நிலையில், அதே மின்கம்பத்தில் உயர் அழுத்த மின்கம்பியை இணைக்கும் பணியை மின்துறை அதிகாரிகள் மேற்கொள்ள உள்ளதாக தகவல் வெளியாகியது. இதனை அறிந்த விவசாயிகள் உடனடியாக எதிர்ப்பு தெரிவித்து பணிகளை தற்காலிகமாக நிறுத்தினர்.
இது குறித்து விவசாயிகள் கூறுகையில், தாழ்வு அழுத்த மின்கம்பி செல்லும் கம்பத்துடன் உயர் அழுத்த மின்கம்பியை இணைப்பது பாதுகாப்பு ரீதியாக ஆபத்தானது. மேலும், உயர் அழுத்த மின்கம்பிக்காக சாலையின் எதிர்புறத்தில் தனி கம்பம் அமைத்து, கிராமத்தின் பிற பகுதிகளில் உள்ளதுபோல் சாலையின் இருபுறங்களிலும் தனித்தனி கம்பங்கள் மூலம் மின்கம்பியை கொண்டு செல்ல வேண்டும் என வலியுறுத்தினர்.
மேலும், தங்கள் பட்டா நிலம் வழியாக உயர் அழுத்த மின்கம்பி கொண்டு செல்லப்படுவது நில உரிமை மீறலாகும் என்றும், எதிர்காலத்தில் விவசாய பணிகளுக்கும், மரக்கன்றுகள் வளர்ப்புக்கும் இடையூறு ஏற்படும் என்றும் அவர்கள் கவலை தெரிவித்தனர்.
இந்நிலையில், மின்துறை அதிகாரிகள் திட்டமிட்டபடி பணிகளை முன்னெடுக்க முயன்றதாக கூறப்படுகிறது. இதனால் கிராம மக்கள் மற்றும் அதிகாரிகள் இடையே கடும் வாக்குவாதம் ஏற்பட்டது. ஒரு கட்டத்தில், கிராம மக்கள் அதிகாரிகளை முற்றுகையிட்டு தங்கள் கோரிக்கைகளை வலியுறுத்தினர். பாதுகாப்பு மற்றும் நில உரிமைகள் தொடர்பாக இருதரப்பினரும் தீவிர விவாதத்தில் ஈடுபட்டதால், கிராமத்தில் பதற்றமான சூழ்நிலை நிலவியது.
தகவல் அறிந்த உள்ளூர் முக்கியஸ்தர்கள் மற்றும் பொதுமக்கள் பிரதிநிதிகள் சம்பவ இடத்துக்கு வந்து சமரச பேச்சுவார்த்தை நடத்தினர். விவசாயிகளின் கோரிக்கைகளை மேலதிகாரிகளிடம் எடுத்துச் சென்று பரிசீலிப்பதாக மின்துறை அதிகாரிகள் உறுதியளித்ததையடுத்து, போராட்டம் கைவிடப்பட்டது.
பின்னர், பாதுகாப்பு அம்சங்கள் மற்றும் மாற்று வழிகள் குறித்து ஆலோசனை நடத்தப்பட்டதாக கூறப்படுகிறது. சம்பவம் காரணமாக தாவடநல்லூர் மற்றும் சுற்றுவட்டார பகுதிகளில் சுமார் மூன்று மணி நேரத்திற்கு மேலாக பரபரப்பு நிலவியது.
இந்த சம்பவம், கிராமப்புறங்களில் மின்சார உள்கட்டமைப்பு மேம்பாட்டு பணிகள் மேற்கொள்ளப்படும் போது, பாதுகாப்பு மற்றும் நில உரிமைகள் தொடர்பான விழிப்புணர்வு மற்றும் முன் ஆலோசனை அவசியம் என்பதை மீண்டும் ஒருமுறை வெளிப்படுத்தியுள்ளது.