மன்னார்குடி., ஆக.20
திருவாரூர் மாவட்டம் கோட்டூர் அருகே கணவர் வீட்டில் இளம்பெண் தூக்கிட்டு உயிரிழந்த சம்பவத்தில் சந்தேகம் இருப்பதாக கூறி, அவரது உறவினர்கள் உடலை பெற்றுக்கொள்ள மறுத்ததால் பரபரப்பு ஏற்பட்டது. வருவாய் கோட்டாட்சியர் விசாரணை நடத்தி உரிய நடவடிக்கை எடுக்கப்படும் என போலீசார் உறுதியளித்ததை தொடர்ந்து உறவினர்கள் உடலை பெற்றுச் சென்றனர்.
திருவாரூர் மாவட்டம் கோட்டூர் அருகே உள்ள செல்லத்தூர் கிராமத்தைச் சேர்ந்தவர் சிந்துபைரவி. சிங்கமங்கலம் கிராமத்தைச் சேர்ந்த சுபாஷ் என்பவரை சிந்துபைரவி காதலித்து திருமணம் செய்து கொண்டதாக கூறப்படுகிறது. இவர்களுக்கு மாதேஷ் என்ற 4 வயது மகன் உள்ளார்.
சுபாஷ் கட்டிட வேலை செய்து குடும்பத்தை நடத்தி வந்துள்ளார். அவருக்கு குடிப்பழக்கம் இருந்ததாகவும், இதனால் கணவன்–மனைவி இடையே அடிக்கடி குடும்பத் தகராறு ஏற்பட்டு வந்ததாகவும் உறவினர்கள் தெரிவித்துள்ளனர்.
இந்த நிலையில், கணவரின் குடிப்பழக்கத்தை நிறுத்த வேண்டும் என்ற நோக்கத்தில் சிந்துபைரவி, சுபாஷை அழைத்துக்கொண்டு அருகில் உள்ள கோவிலுக்கு சென்றதாக கூறப்படுகிறது. அங்கு வழிபாடு செய்து முடி கயிறு கட்டி வந்ததாகவும் தெரிவிக்கப்பட்டுள்ளது.
இதற்கிடையே நேற்று மதியம் வீட்டில் 4 வயது மகன் மாதேஷ் தூங்கிக் கொண்டிருந்தபோது, சிந்துபைரவி வீட்டுக்குள் தூக்கிட்டு உயிரிழந்ததாக கூறப்படுகிறது. இதனைத் தொடர்ந்து சம்பவம் குறித்து தகவல் அறிந்த உறவினர்கள் அங்கு விரைந்து சென்று சிந்துபைரவியின் உடலை மீட்டனர்.
பின்னர் அவரது உடல் பிரேதப் பரிசோதனைக்காக மன்னார்குடியில் உள்ள அரசு மாவட்ட தலைமை மருத்துவமனைக்கு அனுப்பி வைக்கப்பட்டது.
சாவில் சந்தேகம் – உடலை வாங்க மறுத்த உறவினர்கள்
இந்த நிலையில், சிந்துபைரவியின் உயிரிழப்பில் சந்தேகம் இருப்பதாக அவரது உறவினர்கள் தெரிவித்தனர். குறிப்பாக, பட்டப்பகலில் சம்பவம் நடைபெற்றதாக கூறப்படும் நிலையில், சிறிய வீட்டில் கணவர் இருந்தபோது சிந்துபைரவி எவ்வாறு தனியாக தூக்கிட்டு உயிரிழக்க முடியும் என அவர்கள் கேள்வி எழுப்பினர்.
மேலும், சிந்துபைரவியின் மரணம் தொடர்பாக முழுமையான விசாரணை நடத்த வேண்டும் என்றும், அவரது உயிரிழப்புக்கான உண்மையான காரணத்தை கண்டறிய வேண்டும் என்றும் உறவினர்கள் வலியுறுத்தினர்.
இதனால் பிரேதப் பரிசோதனை முடிந்த பின்னரும் சிந்துபைரவியின் உடலை பெற்றுக்கொள்ள உறவினர்கள் மறுத்தனர். இதன் காரணமாக அரசு மருத்துவமனை வளாகத்தில் சிறிது நேரம் பரபரப்பு நிலவியது.
போலீசார் உறுதி
இதுகுறித்து தகவல் அறிந்த போலீசார் சம்பவம் தொடர்பாக விசாரணை மேற்கொண்டனர். சிந்துபைரவியின் உயிரிழப்பு குறித்து வருவாய் கோட்டாட்சியர் விசாரணை நடத்தி, உரிய முறையில் விசாரணை செய்து நடவடிக்கை எடுக்கப்படும் என உறவினர்களிடம் உறுதியளித்ததாக கூறப்படுகிறது.
போலீசாரின் உறுதியைத் தொடர்ந்து சமாதானமடைந்த சிந்துபைரவியின் உறவினர்கள், அவரது உடலை பெற்றுக்கொண்டு சென்றனர்.
கணவரின் குடிப்பழக்கத்தால் குடும்பத்தில் ஏற்பட்ட பிரச்சினை காரணமாக சிந்துபைரவி தற்கொலை செய்து கொண்டாரா? அல்லது அவரது உயிரிழப்புக்கு வேறு ஏதேனும் காரணம் உள்ளதா? என்பது குறித்து போலீசார் மற்றும் வருவாய் கோட்டாட்சியர் விசாரணை நடத்தி வருகின்றனர்.
சிறிய வீட்டில் பட்டப்பகலில் நடைபெற்ற இந்த உயிரிழப்பு சம்பவத்தில் உறவினர்கள் எழுப்பியுள்ள சந்தேகங்கள் காரணமாக, சம்பவம் அந்த பகுதியில் பரபரப்பை ஏற்படுத்தியுள்ளது. விசாரணையின் முடிவிலேயே சிந்துபைரவியின் உயிரிழப்புக்கான முழுமையான காரணம் தெரியவரும் என எதிர்பார்க்கப்படுகிறது.