வி.எல்.பி. ஜானகியம்மாள் கல்லூரியில் பாரம்பரிய உற்சாகத்துடன் ஓணம் கொண்டாட்டம்

கோவை

வி.எல்.பி. ஜானகியம்மாள் கல்லூரியில் பாரம்பரிய உற்சாகத்துடன் ஓணம் கொண்டாட்டம் நடைபெற்றது.

கேரளாவின் அறுவடைத் திருநாளான ஓணத்தை முன்னிட்டு,
கோவைப்புதூரில் உள்ள வி.எல்.பி. ஜானகியம்மாள் கல்லூரியில் “ஓண மேளம் 2026” என்ற பெயரில் ஓணம் கொண்டாட்டம் வெகு விமரிசையாக நடைபெற்றது. இதில் கல்லூரி மாணவ, மாணவிகள், பேராசிரியர்கள் மற்றும் நிர்வாகத்தினர் உற்சாகமாகப் பங்கேற்றனர்.

விழா, எஃப்.சி.ஐ.ஏ.எல். நிறுவனத்தின் நிர்வாக இயக்குநர் மனோஜ் மனயத்தோடி வழங்கிய பாரம்பரிய வரவேற்புரையுடன் தொடங்கியது. கலாச்சாரப் பாரம்பரியத்தை பாதுகாப்பதன் முக்கியத்துவம் குறித்தும், இதுபோன்ற விழாக்கள் மூலம் சமூக நல்லிணக்கத்தை வளர்ப்பதன் அவசியம் குறித்தும் அவர் பேசினார்.

கல்லூரி முதல்வர் முனைவர் என். குமார் தலைமையுரையாற்றினார். கல்விசார் சிறப்புடன் மாணவர்களின் கலாச்சார விழுமியங்களையும் வளர்ப்பதில் கல்வி நிறுவனங்களின் பங்கு முக்கியமானது எனக் குறிப்பிட்ட அவர், இந்தியாவின் பன்முகத்தன்மை கொண்ட பாரம்பரியங்களை மாணவர்கள் அறிந்து கடைப்பிடிக்க வேண்டும் என வலியுறுத்தினார்.

வி.எல்.பி. அறக்கட்டளையின் தலைவரும் நிர்வாக அறங்காவலருமான என். சூர்யகுமார் சிறப்புரையாற்றினார். ஒற்றுமை, அனைவரையும் உள்ளடக்கிய தன்மை மற்றும் கூட்டு கொண்டாட்டங்களின் முக்கியத்துவத்தை எடுத்துரைத்த அவர், பல்வேறு கலாச்சாரங்களையும் தலைமுறைகளையும் இணைக்கும் பாலமாக திருவிழாக்கள் திகழ்கின்றன என்றார்.

சிறப்பு விருந்தினராக கேரள வன ஆராய்ச்சி நிறுவனத்தின் விரிவாக்கம் மற்றும் பயிற்சிப் பிரிவின் தலைவரும் மூத்த முதன்மை விஞ்ஞானியுமான டாக்டர் ஏ.வி. ரகு கலந்து கொண்டார். பாரம்பரியத் திருவிழாக்களின் சுற்றுச்சூழல் மற்றும் கலாச்சார முக்கியத்துவம் குறித்து பேசிய அவர், பூர்வீக அறிவு மற்றும் நிலையான நடைமுறைகளை பாதுகாக்க வேண்டியதன் அவசியத்தை வலியுறுத்தினார்.

கேரள கலால் துறையின் உதவி கலால் ஆய்வாளர் எம்.என். சுரேஷ் பாபுவும் விழாவில் உரையாற்றினார். மாணவர்கள் பொறுப்புள்ள குடிமக்களாகவும், கலாச்சார விழுமியங்களின் தூதர்களாகவும் திகழ்ந்து சமூகத்திற்கு ஆக்கப்பூர்வமான பங்களிப்பை வழங்க வேண்டும் என அவர் அறிவுறுத்தினார்.

விழாவில் செண்டை மேளம், கஜ மேளம், மாவலி தம்புரானின் பிரம்மாண்ட வருகை, பூக்கோலம் போட்டி, திருவாதிரக்களி, சிங்காரி மேளம், ஓணச் சக்கரம், கண்ணாடி நடனம், கேரள பாரம்பரிய ஆடை அலங்கார நிகழ்ச்சி, காவடி ஆட்டம், குதிரை அணிவகுப்பு உள்ளிட்ட பல்வேறு கலை மற்றும் பாரம்பரிய நிகழ்ச்சிகள் நடைபெற்றன.

மேலும், உறியடி, கயிறு இழுத்தல் உள்ளிட்ட விளையாட்டுப் போட்டிகளும் நடைபெற்றன.

ஓணம் பண்டிகையின் சிறப்பம்சமான பாலாடா பாயசம் பங்கேற்பாளர்களுக்கு பரிமாறப்பட்டது.விழாவின் இறுதியில் பிரமாண்டமான வாணவேடிக்கை நடைபெற்றது.

விழா ஏற்பாடுகளை ‘வி-கல்ட்’ அமைப்பு மேற்கொண்டது. அமைப்பின் ஒருங்கிணைப்பாளர் முனைவர் டி. ஜான்சன் நன்றியுரை வழங்கினார்.