தூத்துக்குடி: தூத்துக்குடி ஸ்டெர்லைட் போராட்டத்தின்போது நடைபெற்ற துப்பாக்கிச்சூடு சம்பவம் தொடர்பாக அரசு அதிகாரிகள் மீது நடவடிக்கை எடுக்கத் தேவையில்லை என நீதிமன்றத்தில் தமிழக அரசு தெரிவித்ததற்கு எதிர்ப்பு தெரிவித்து மார்க்சிஸ்ட் கம்யூனிஸ்ட் கட்சி சார்பில் தூத்துக்குடியில் ஆர்ப்பாட்டம் நடைபெற்றது.
ஆர்ப்பாட்டத்திற்கு மார்க்சிஸ்ட் கம்யூனிஸ்ட் கட்சியின் மாவட்டச் செயலாளர் ஆறுமுகம் தலைமை தாங்கினார். அரசியல் தலைமைக்குழு உறுப்பினர் பாலகிருஷ்ணன், அர்ஜுனன் உள்ளிட்டோர் கண்டன உரையாற்றினர். கட்சி நிர்வாகிகள் மற்றும் தொண்டர்கள் திரளாக கலந்து கொண்டனர்.
இதைத்தொடர்ந்து செய்தியாளர்களிடம் மார்க்சிஸ்ட் கம்யூனிஸ்ட் கட்சியின் அரசியல் தலைமைக்குழு உறுப்பினர் பாலகிருஷ்ணன் கூறியதாவது:
“தூத்துக்குடி மக்களின் வாழ்வாதாரத்தை பாதிக்கக்கூடிய ஸ்டெர்லைட் ஆலைக்கு எதிரான போராட்டத்தின்போது போலீசார் நடத்திய துப்பாக்கிச்சூட்டில் 13 பேர் உயிரிழந்தனர். 160-க்கும் மேற்பட்டோர் காயமடைந்தனர். இந்த சம்பவம் தொடர்பாக மார்க்சிஸ்ட் கம்யூனிஸ்ட் கட்சி சார்பில் பல்வேறு போராட்டங்கள் நடத்தப்பட்டதுடன், நீதிமன்றத்திலும் வழக்கு தொடரப்பட்டது.
அப்போதைய தமிழக முதலமைச்சர் எடப்பாடி பழனிசாமி, துப்பாக்கிச்சூடு சம்பவத்தை தொலைக்காட்சியில் பார்த்துதான் தெரிந்து கொண்டதாக கூறியது ஏற்கத்தக்கதல்ல.
ஓய்வுபெற்ற உயர்நீதிமன்ற நீதிபதி அருணா ஜெகதீசன் தலைமையில் அமைக்கப்பட்ட விசாரணை ஆணையம், இந்த சம்பவம் தொடர்பாக விரிவாக விசாரணை நடத்தியது. விசாரணை அறிக்கையில், துப்பாக்கிச்சூட்டின்போது கடைபிடிக்க வேண்டிய முன்னெச்சரிக்கை நடவடிக்கைகள் முறையாக மேற்கொள்ளப்படவில்லை என்று குறிப்பிடப்பட்டுள்ளது.
கூட்டத்தைக் கலைந்து செல்லுமாறு அறிவுறுத்துதல், வானத்தை நோக்கி சுடுதல், கண்ணீர்ப்புகை பயன்படுத்துதல் உள்ளிட்ட நடைமுறைகள் கடைபிடிக்கப்படாமல், பொதுமக்களை நோக்கி நேரடியாக துப்பாக்கிச்சூடு நடத்தப்பட்டதாக அறிக்கையில் தெரிவிக்கப்பட்டுள்ளது.
இந்த சம்பவத்தில் யார் யார் பொறுப்புடையவர்கள் என்பதையும் விசாரணை ஆணையம் சுட்டிக்காட்டியுள்ளது. வருவாய்த்துறை அதிகாரிகள், மாவட்ட ஆட்சியர், மாவட்ட காவல் கண்காணிப்பாளர், அப்போதைய ஐ.ஜி., டி.ஐ.ஜி. உள்ளிட்ட அதிகாரிகள் மீது நடவடிக்கை எடுக்க வேண்டும் என அறிக்கையில் பரிந்துரைக்கப்பட்டுள்ளது.
அதிமுக ஆட்சியிலும் அரசு அதிகாரிகள் மீது உரிய நடவடிக்கை எடுக்கப்படவில்லை. திமுக ஆட்சியிலும் அதே நிலை தொடர்ந்தது. மாற்றத்தை கொண்டு வருவோம் என்று கூறி ஆட்சிக்கு வந்த தமிழக வெற்றிக்கழக அரசும் தற்போது அதிகாரிகளுக்கு ஆதரவான நிலைப்பாட்டை எடுத்துள்ளது. அதிகாரிகள் மீது நடவடிக்கை எடுக்கத் தேவையில்லை என தற்போதைய தமிழக அரசு நீதிமன்றத்தில் தெரிவித்துள்ளது.
நடிகராக இருந்தபோது துப்பாக்கிச்சூட்டில் பாதிக்கப்பட்டவர்களை நேரில் சந்தித்து ஆறுதல் தெரிவித்ததாக கூறிய தமிழக முதலமைச்சர் விஜய், ஆட்சிக்கு வந்த பின்னர் அரசு அதிகாரிகளுக்கு ஆதரவாக நிலைப்பாடு எடுத்துள்ளார். இது இரட்டை நிலைப்பாடாகும்.
வரவிருக்கும் இடைத்தேர்தலில் மார்க்சிஸ்ட் கம்யூனிஸ்ட் கட்சி தனித்துப் போட்டியிடுகிறது. தற்போதைக்கு எந்தக் கூட்டணியிலும் நாங்கள் இல்லை. தமிழக வெற்றிக்கழக கூட்டணியிலும் இல்லை; திமுக கூட்டணியிலும் இல்லை.”
இவ்வாறு பாலகிருஷ்ணன் தெரிவித்தார்.