குமரகுரு பன்முக கலை மற்றும் அறிவியல் கல்லூரி சார்பில் 2050-ஆம் ஆண்டில் காந்தியச் சிந்தனையை மறுவடிவமைத்தல் என்ற தலைப்பில் கருத்தரங்கம் நடைபெற்றது
குமரகுரு பன்முக கலை மற்றும் அறிவியல் கல்லூரியின் பொருளாதாரம் மற்றும் அரசியல் அறிவியல் சார்பில், ‘2050-ஆம் ஆண்டில் காந்தியச் சிந்தனையை மறுவடிவமைத்தல்: காந்தியக் கொள்கைகள் மற்றும் மாற்றத்தை உருவாக்கும் பொருளாதார நடைமுறைகள் மூலம் நிலையான எதிர்காலம்’ என்ற தலைப்பில் நடைபெற்ற கருத்தரங்கில் தலைமையுரையாற்றிய அவர் இதனைத் தெரிவித்தார்.
இந்தியாவின் எதிர்காலத்திற்கான ஐந்து முக்கிய முன்னுரிமைகளை அவர் எடுத்துரைத்தார். சுதந்திரம் மற்றும் ஜனநாயகத்தைப் பாதுகாத்தல், அரசியலமைப்பைப் போற்றுதல், நாட்டின் பன்முகத்தன்மையைப் பேணுதல், நாட்டின் வளர்ச்சியில் அனைவரையும் உள்ளடக்கிப் பங்கேற்கச் செய்தல், அன்பு மற்றும் கருணை போன்ற அடிப்படை மனிதநேயப் பண்புகளைப் பாதுகாத்தல் ஆகியவை அவை.
இந்தியாவின் சுதந்திரமும் ஜனநாயகமும் நீண்ட போராட்டத்தின் மூலம் பெறப்பட்டவை என்றும், அவற்றை ஒருபோதும் சாதாரணமாக எடுத்துக்கொள்ளக் கூடாது என்றும் அவர் கூறினார். நாட்டின் பன்முகத்தன்மைக்கு மதிப்பளிப்பதும் அரசியலமைப்பின் மாண்பைக் காப்பதும் எதிர்கால வளர்ச்சிக்கு இன்றியமையாதவை எனக் குறிப்பிட்டார்.
காந்தியப் பொருளாதாரக் கொள்கைகளை விளக்கிய அவர், நேர்மையான வழிகளில் செல்வத்தை உருவாக்குதல், அதனைச் சமமாகப் பகிர்ந்தளித்தல், இயற்கைக்கு பாதிப்பில்லாத வளர்ச்சியை உறுதிசெய்தல் ஆகியவையே அதன் அடிப்படை என்றார். பொருளாதார வளர்ச்சி என்பது வெறும் வருமானப் பெருக்கமாக இல்லாமல், மனித நலன், நிலைத்தன்மை, நீடித்த அமைதி மற்றும் மகிழ்ச்சியை மையமாகக் கொண்டிருக்க வேண்டும் என வலியுறுத்தினார்.
‘தகுதியானவர்கள் மட்டுமே வாழ முடியும்’ என்ற அணுகுமுறைக்கு மாறாக, அனைவரும் முன்னேறுவதற்கான வாய்ப்புகளை உருவாக்குவதே காந்தியச் சிந்தனையின் நோக்கம் என்றும் தெரிவித்தார். பொருளாதார வளர்ச்சியை மட்டும் அளவுகோலாகக் கொள்ளாமல், சமத்துவம் மற்றும் சமூகப் பொறுப்புணர்வின் அடிப்படையிலும் வளர்ச்சியை மதிப்பிட வேண்டும் எனப் பொருளாதார வல்லுநர்கள் மற்றும் கொள்கை வகுப்பாளர்களைக் கேட்டுக்கொண்டார்.
பல்வேறு பகுதிகளிலிருந்து பங்கேற்ற அறிஞர்கள் மற்றும் ஆய்வாளர்கள், காந்தியச் சிந்தனைகளை இன்றைய அரசியல், பொருளாதார மற்றும் சமூகச் சூழல்களுடன் தொடர்புபடுத்தி ஆராய வேண்டும் என்றும் அவர் வலியுறுத்தினார்.
மேலும் பேசுகையில், ஜனநாயகத்தைப் பாதுகாப்பது, அரசியலமைப்பின் மாண்பைக் காப்பது, இந்தியாவின் பன்முகத்தன்மையைப் பேணுவது மற்றும் நாட்டின் வளர்ச்சியில் அனைவரையும் பங்கேற்கச் செய்வது உள்ளிட்ட சமகாலச் சவால்களுக்குத் தீர்வுகாண காந்திய வழிமுறைகள் இன்றும் பொருத்தமானவையாக உள்ளன என்று குமரகுரு கல்வி நிறுவனங்களின் தலைவர் டாக்டர் பி.கே. கிருஷ்ணராஜ் வானவராயர் தெரிவித்தார்.
இந்தக் கருத்தரங்கில் காந்தியச் சிந்தனைகள், பொருளாதாரம், அரசியல் அறிவியல், அமைதி மற்றும் நிலைத்தன்மை தொடர்பான பல்வேறு கருத்துகள் பகிரப்பட்டன. சுயராஜ்ஜியம், சர்வோதயம், அகிம்சை மற்றும் அறநெறி சார்ந்த பொருளாதாரம் ஆகிய காந்தியக் கொள்கைகள் எதிர்காலச் சமூகத்தை உருவாக்குவதில் வகிக்கும் பங்கு குறித்தும் விவாதிக்கப்பட்டது.