பிரான்ஸ் நாட்டைச் சேர்ந்த சர்வதேச புகழ்பெற்ற அழகு நிலைய நிறுவனமான ‘ஜீன் லூயிஸ் டேவிட்’ தனது புதிய கிளையை கோவை சாய்பாபா காலனி பகுதியில் தொடங்கியுள்ளது.
கடந்த 1961-ம் ஆண்டு பாரிஸ் நகரில் தொடங்கப்பட்ட இந்நிறுவனம், தற்போது உலகம் முழுவதும் 20-க்கும் மேற்பட்ட நாடுகளில் 750-க்கும் அதிகமான அழகு நிலையங்களுடன் செயல்பட்டு வருகிறது.
65 ஆண்டுகால பிரெஞ்சு அழகுக்கலை பாரம்பரியத்தைக் கொண்ட இந்நிறுவனம், இந்தியாவில் தனது அடுத்தகட்ட விரிவாக்கத்தின் ஒரு பகுதியாக கோவையில் தனது புதிய கிளையைத் திறந்துள்ளது. தமிழகத்தில் இதுவே முதல் கிளையாகவும், இந்தியாவில் இரண்டாவது கிளையாகவும் அமைந்துள்ளது.
மேலும், இந்தியாவிற்கான இந்நிறுவனத்தின் பிராண்ட் ஆலோசனை மற்றும் மக்கள் தொடர்பு பணிகளை, இத்துறையில் 15 ஆண்டுகளுக்கும் மேலான அனுபவம் கொண்ட கங்கா தேவராஜன் மற்றும் அவரது குழுவினர் மேற்கொள்கின்றனர்.
இதில் சிறப்பு விருந்தினர்களாக கார்த்திபுரம் நிர்வாக இயக்குநர் கே. நவீன், ஜீன் லூயிஸ் டேவிட் இந்திய மாஸ்டர் ஃபிரான்சைஸ் நிர்வாகிகள் சோனியா மற்றும் நிதின், சி.எஸ்.ஆர். குழும நிர்வாக இயக்குநர் சி. மிதேஷ் ரெட்டி மற்றும் பிரபல யூடியூபர் திருப்பூர் மோகன் ஆகியோர் கலந்துகொண்டு புதிய கிளையைத் திறந்து வைத்து வாழ்த்தினர்.
நிகழ்ச்சியில் கோவை கிளையின் உரிமையாளர் சூர்யபிரகாஷ் செய்தியாளர்களிடம் கூறியதாவது:
“அழகுக்கலைத் துறையில் உலக அளவில் தனித்துவமான அடையாளத்தைப் பெற்றுள்ள ஜீன் லூயிஸ் டேவிட் நிறுவனத்தை கோவைக்கு அறிமுகப்படுத்துவதில் மிகுந்த மகிழ்ச்சி அடைகிறோம். வாடிக்கையாளர்களின் முக அமைப்பு, தனித்துவம் மற்றும் வாழ்க்கை முறைக்கு ஏற்ற வகையில் சிகை அலங்காரங்களை உருவாக்குவது இந்நிறுவனத்தின் சிறப்பம்சமாகும். மேலும், ஒரே மாதிரியான பயிற்சி முறையில் உருவாக்கப்பட்ட கலைஞர்கள் மூலம் சர்வதேச தரத்திலான சேவையை வழங்குவது இதன் தனிச்சிறப்பாகும்.
கோவையில் தொடங்கப்பட்டுள்ள இந்த மையத்தில் உலகத்தரம் வாய்ந்த அழகு மற்றும் சிகை அலங்காரச் சேவைகளை உள்ளூர் மக்களும் எளிதில் பெறும் வகையில் சிறப்பான ஏற்பாடுகள் செய்யப்பட்டுள்ளன. ஆடம்பரமான அழகு நிலைய அனுபவம் என்பது ஒரு சிலருக்கு மட்டுமே என்ற நிலையை மாற்றி, தரமான அழகு சேவைகளை அனைவரும் பெறும் வகையில் செயல்படுவதே எங்களது முக்கிய நோக்கம். தொழில்முனைவுத் துறையில் எனது அனுபவத்துடன், சர்வதேச நிறுவனத்தின் பாரம்பரியத்தையும் இணைத்து கோவையில் இப்புதிய முயற்சியைத் தொடங்கியுள்ளோம்.
எதிர்காலத்தில் இந்தியாவின் மற்ற முக்கிய நகரங்களிலும் இந்நிறுவனத்தின் சேவையை விரிவுபடுத்துவதே எங்களது இலக்கு” என்றார்.
இந்நிகழ்ச்சியில் நிறுவனத்தின் இந்திய நிர்வாகிகள், முக்கியப் பொறுப்பாளர்கள் மற்றும் வாடிக்கையாளர்கள் பலர் கலந்து கொண்டனர்.