பொதுமக்களின் சிரமங்களைப் போக்க அதிகாரிகள், ஒப்பந்ததாரருக்கு அதிரடி உத்தரவு – இரண்டு மாதங்களுக்குள் பணிகள் நிறைவடையும் என உறுதி
தூத்துக்குடி மாநகராட்சிக்கு உட்பட்ட பகுதிகளில் நடைபெற்று வரும் பக்கீல் ஓடை விரிவாக்கப் பணிகளால் பொதுமக்கள் பல்வேறு சிரமங்களைச் சந்தித்து வருவதாக மாநகராட்சி மேயர் ஜெகனிடம் தொடர்ந்து புகார்கள் தெரிவிக்கப்பட்டு வந்தன. குறிப்பாக, பணிகள் நடைபெறும் பகுதிகளில் சாலைகள் அடைக்கப்பட்டுள்ளதால் இருசக்கர வாகனங்களில் செல்வோர் பெரும் சிரமத்திற்கு உள்ளாவதாகவும் பொதுமக்கள் நேரில் சந்தித்து கோரிக்கை விடுத்தனர்.
இதையடுத்து, பொதுமக்களின் புகார்களைத் தொடர்ந்து பக்கீல் ஓடை விரிவாக்கப் பணிகள் நடைபெறும் இடங்களை நேரில் பார்வையிட்டு ஆய்வு செய்ய மேயர் ஜெகன் முடிவு செய்தார். அதன்படி, சம்பந்தப்பட்ட மாநகராட்சி அதிகாரிகள் மற்றும் ஒப்பந்ததாரர்களை பணிகள் நடைபெறும் இடத்திற்கு வரவழைத்து ஆய்வு மேற்கொண்டார்.
முதற்கட்டமாக மடத்தூர் பகுதியில் நடைபெற்று வரும் பக்கீல் ஓடை விரிவாக்கப் பணிகளைப் பார்வையிட்ட மேயர் ஜெகன், பணிகளின் தற்போதைய நிலை மற்றும் மேற்கொள்ள வேண்டிய அடுத்தகட்ட நடவடிக்கைகள் குறித்து அதிகாரிகள், ஒப்பந்ததாரர்களிடம் கேட்டறிந்தார். தொடர்ந்து, இருசக்கர வாகனத்தில் பயணம் செய்து ராஜீவ் நகர் ரவுண்டானா, மில்லர்புரம், அண்ணா நகர், பர்மா காலனி உள்ளிட்ட பகுதிகளில் நடைபெற்று வரும் பணிகளை ஒவ்வொரு இடமாகச் சென்று ஆய்வு செய்தார்.
ஆய்வின்போது, பல்வேறு இடங்களில் சாலைகள் அடைக்கப்பட்டிருப்பதால் பொதுமக்கள் போக்குவரத்துக்கு சிரமப்படுவது தெரியவந்தது. இதையடுத்து, பக்கீல் ஓடைப் பணிகளை விரைந்து முடித்து, அடைக்கப்பட்டுள்ள சாலைகளை உடனடியாகச் சீரமைத்து வாகனப் போக்குவரத்துக்கு ஏற்ற வகையில் திறந்துவிட வேண்டும் என்று அதிகாரிகள் மற்றும் ஒப்பந்ததாரர்களுக்கு மேயர் உத்தரவிட்டார்.
மேலும், சில இடங்களில் மின்கம்பங்களை அகற்றி மாற்றுவதில் தாமதம் ஏற்படுவதாக ஒப்பந்ததாரர் தெரிவித்தார். இதனைத் தொடர்ந்து, மேயர் ஜெகன் மின்வாரிய அதிகாரிகளிடம் உடனடியாகப் பேசி, மின்கம்பங்களை மாற்றுவதற்கான நடவடிக்கைகளை விரைவுபடுத்தினார்.
மடத்தூர் முதல் நான்காம் ரயில்வே கேட் வரையிலான பக்கீல் ஓடை விரிவாக்கப் பணிகளில் உள்ள பிரச்சினைகள் குறித்து அதிகாரிகள் மற்றும் ஒப்பந்ததாரர்களிடம் விரிவாகக் கேட்டறிந்ததுடன், சம்பந்தப்பட்ட துறை அதிகாரிகளிடம் பேசி உடனடியாகத் தீர்வு காணவும் நடவடிக்கை மேற்கொண்டார்.
தற்போது மழை இல்லாத சூழலைப் பயன்படுத்தி பணிகளை விரைவாக முடிக்க வேண்டும் என்றும், பணிகள் நடைபெறும் இடங்களில் பொதுமக்களுக்கு எவ்வித இடையூறும் ஏற்படாத வகையில் பாதுகாப்பான முறையில் பணிகளை மேற்கொள்ள வேண்டும் என்றும் அதிகாரிகளுக்கு அறிவுறுத்தினார்.
இதுகுறித்து மேயர் ஜெகன் கூறுகையில்:
“கடந்த திமுக ஆட்சிக் காலத்தில் தூத்துக்குடி மாநகர மக்களுக்கு எவ்வித பாதிப்பும் ஏற்படக்கூடாது என்ற நோக்கத்தில், அப்போதைய தமிழக முதலமைச்சர் மு.க.ஸ்டாலின், நகராட்சி நிர்வாகத்துறை அமைச்சர் கே.என்.நேரு, தூத்துக்குடி நாடாளுமன்ற உறுப்பினர் கனிமொழி ஆகியோரின் முயற்சியால் பக்கீல் ஓடை விரிவாக்கப் பணிகளுக்கு நிதி ஒதுக்கீடு செய்யப்பட்டு பணிகள் நடைபெற்று வருகின்றன.
இந்தப் பணிகளால் பொதுமக்கள் சிரமப்படுவதாக புகார்கள் வந்ததைத் தொடர்ந்து, நேரில் சென்று ஆய்வு செய்தேன். பணிகள் ஏன் தாமதமாகின்றன என்பதையும் கேட்டறிந்தேன். பொதுமக்களுக்கு இடையூறு ஏற்படாத வகையில் பணிகளை மேற்கொள்ளவும், போக்குவரத்துக்கு சிரமம் உள்ள இடங்களில் சாலைகளை உடனடியாகச் சீரமைக்கவும் அதிகாரிகள் மற்றும் ஒப்பந்ததாரர்களுக்கு உத்தரவிட்டுள்ளேன்.
மடத்தூர் முதல் நான்காம் ரயில்வே கேட் வரையிலான பக்கீல் ஓடை விரிவாக்கப் பணிகள் இன்னும் இரண்டு மாத காலத்திற்குள் நிறைவடையும்” என்றார்.
மடத்தூர் முதல் நான்காம் ரயில்வே கேட் வரை சுமார் இரண்டு மணி நேரம் இருசக்கர வாகனத்தில் பயணம் செய்த மேயர் ஜெகன், ஒவ்வொரு பகுதியாகச் சென்று பணிகளை ஆய்வு செய்தார். அப்போது அப்பகுதி பொதுமக்கள் தங்களது பகுதிகளில் உள்ள குறைகளையும் கோரிக்கைகளையும் தெரிவித்தனர். அவற்றைப் பரிசீலித்து வரும் காலங்களில் உரிய நடவடிக்கை எடுத்து சரிசெய்து தருவதாக மேயர் ஜெகன் உறுதியளித்தார்.