தூத்துக்குடி: தூத்துக்குடி மாநகராட்சிப் பகுதிகளில் பொதுமக்கள் மற்றும் வியாபாரிகளின் நலனைக் கருத்தில் கொண்டு பல்வேறு வளர்ச்சித் திட்டங்கள் செயல்படுத்தப்பட்டு வருவதாக மாநகராட்சி மேயர் ஜெகன் பெரியசாமி தெரிவித்தார்.
தூத்துக்குடி மாநகராட்சிப் பகுதியில் நடைபெற்று வரும் பேவர் பிளாக் கற்கள் பதிக்கும் பணிகளை மேயர் ஜெகன் பெரியசாமி நேரில் பார்வையிட்டு ஆய்வு செய்தார்.
அப்போது அவர் கூறியதாவது:
தமிழகத்தில் பல்வேறு மாநகராட்சிகள் இருந்தாலும், தூத்துக்குடி மாநகராட்சி அனைத்து தரப்பு மக்களும் ஏற்றுக்கொள்ளும் வகையில் பொதுமக்கள், வியாபாரிகள் என அனைவருக்குமான திட்டங்களை உருவாக்கி படிப்படியாகச் செயல்படுத்தி வருகிறது.
நான் பொறுப்பேற்பதற்கு முன்பு இருந்த தூத்துக்குடிக்கும், தற்போதைய தூத்துக்குடிக்கும் இடையே பல்வேறு மாற்றங்கள் ஏற்பட்டுள்ளன. மாநகராட்சிப் பகுதியில் போக்குவரத்துக்கும், பொதுமக்களின் அன்றாடப் பயன்பாட்டுக்கும் இடையூறாக இருந்த தேவையற்ற ஆக்கிரமிப்புகள் மற்றும் தடைகள் அகற்றப்பட்டு வருகின்றன.
நாளுக்கு நாள் அதிகரித்து வரும் மக்கள் தொகை மற்றும் வாகனப் பெருக்கத்தைக் கருத்தில் கொண்டு, மாநகரின் பிரதான சாலைகள் அனைத்தும் முறைப்படுத்தப்பட்டுள்ளன. சாலைகளில் மணல் திட்டுகள் தேங்காமல் இருப்பதற்கும், போக்குவரத்துக்கு ஏற்ற வகையில் சாலைகளை மேம்படுத்துவதற்கும் ‘என் டூ என் டூ’ திட்டத்தின் அடிப்படையில் பணிகள் மேற்கொள்ளப்பட்டு வருகின்றன.
குறிப்பாக, வி.இ. ரோடு, வி.வி.டி. ரோடு, ஜெயராஜ் ரோடு உள்ளிட்ட முக்கிய சாலைகளின் இருபுறங்களிலும் பேவர் பிளாக் சாலைகள் அமைக்கப்பட்டுள்ளன. இதன் மூலம் பொதுமக்கள் வாகனங்களை நிறுத்துவதற்கும், எளிதாக நடந்து செல்வதற்கும் வசதிகள் ஏற்படுத்தப்பட்டுள்ளன.
அதேபோல், 3-வது மைல் முதல் பழைய துறைமுகம் வரை சாலையின் இருபுறங்களிலும் பேவர் பிளாக் அமைக்கும் பணிகள் நடைபெற்று வருகின்றன. இதனால் வியாபாரிகளுக்கும், பொதுமக்களுக்கும் பயனுள்ளதாக இருக்கும். பொதுமக்கள் எளிதில் வந்து சென்று, இருசக்கர மற்றும் இலகுரக வாகனங்களை நிறுத்தி, தங்களுக்குத் தேவையான பொருட்களை வாங்கிச் செல்லும் வகையில் வசதிகள் மேம்படுத்தப்பட்டு வருகின்றன.
முன்னாள் முதலமைச்சர் மு.க.ஸ்டாலின் வழங்கிய அறிவுரையின்படி, எனது பதவிக்காலம் முழுவதும் மக்களின் நலனுக்காகப் பல்வேறு நல்ல திட்டங்களைச் செயல்படுத்த வேண்டும் என்ற கடமை உணர்வுடன் பணியாற்றி வருகிறேன்.
இவ்வாறு மேயர் ஜெகன் பெரியசாமி தெரிவித்தார்.
இந்த ஆய்வின்போது அதிமுக முன்னாள் அரசு வழக்கறிஞர் சேகர், முன்னாள் கவுன்சிலர் ரவீந்திரன், போல்பேட்டை பகுதி பிரதிநிதி ஜேஸ்பர் ஆகியோர் உடனிருந்தனர்.