புதுச்சேரி: தேசிய பத்திரிகையாளர்கள் தினத்தை முன்னிட்டு, புதுச்சேரி பத்திரிகையாளர்கள் சங்கம் ஆல் இந்தியா பிரசன்ட் மீடியா பீப்பிள் அசோசியேஷன் ஸ்ரீ சிவசக்தி தர்ம அறக்கட்டளை இணைந்து வில்லியனூர் கேலக்ஸி ஆங்கில உயர்நிலைப் பள்ளியில் மாணவ, மாணவிகளுக்கான இலவச மருத்துவ முகாமை நடத்தின.

மாணவர்களின் உடல்நலனைப் பாதுகாக்கும் நோக்கில் நடைபெற்ற இம்முகாமிற்கு, ஆல் இந்தியா பிரஸ் அண்ட் மீடியா பீப்பிள் அசோசியேஷன் புதுச்சேரி மாநிலத் தலைவர் ராஜாராம் குமார், ஆலோசனைக் குழு உறுப்பினர் வேல்முருகன் ஆகியோர் தலைமை வகித்தனர். புதுச்சேரி பத்திரிகையாளர் சங்க நிறுவனர் அட்வகேட் மனோகர், தலைமைச் செயல் அலுவலர் ஹரிதாஸ் ஆகியோர் முன்னிலை வகித்தனர்.
பள்ளியின் தாளாளர் ரமேஷ் அனைவரையும் வரவேற்றார்
முகாமில் மாணவ, மாணவிகளுக்கு இலவச கண் பரிசோதனை, பல் மருத்துவப் பரிசோதனை மற்றும் பொது மருத்துவப் பரிசோதனைகள் மேற்கொள்ளப்பட்டன. பரிசோதனையின் அடிப்படையில் மருத்துவர்கள் உரிய ஆலோசனைகளையும் தேவையான சிகிச்சைகளையும் வழங்கினர்.
புதுச்சேரி ஜோதி கண் மருத்துவமனை, வெஸ்ட்மென்ட் பொது மருத்துவமனை மற்றும் டாக்டர் பேட்ரிக் பல் மருத்துவமனை ஆகியவற்றைச் சேர்ந்த மருத்துவர்கள் பங்கேற்று மாணவர்களுக்கு மருத்துவச் சேவைகளை வழங்கினர்.
இந்நிகழ்ச்சியில் புதுச்சேரி பத்திரிகையாளர் சங்க கௌரவத் தலைவர் வில்லியனூர் தளபதி ராஜ்குமார், துணைத் தலைவர் வெங்கடேச பெருமாள், நிர்வாகிகள் இளம்பரிதி, சுப்பராயன் உள்ளிட்ட சங்க நிர்வாகிகள் பலர் கலந்து கொண்டனர்.
தேசிய பத்திரிகையாளர்கள் தினத்தை முன்னிட்டு சமூக அக்கறையுடன் மாணவர்களின் நலனைக் கருத்தில் கொண்டு ஏற்பாடு செய்யப்பட்ட இந்த இலவச மருத்துவ முகாம், மாணவர்கள், பெற்றோர்கள் மற்றும் பள்ளி நிர்வாகத்தினரிடையே பெரும் வரவேற்பைப் பெற்றது.