மன்னார்குடி, ஆக. 14:

“கர்நாடகாவில் நடைபெறும் போராட்டங்கள் அனைத்தும் திட்டமிட்டு, அம்மாநில துணை முதலமைச்சர் டி.கே.சிவக்குமார் தூண்டுதலின் பேரில் நடைபெறுகின்றன” என தமிழக அனைத்து விவசாய சங்கங்களின் ஒருங்கிணைப்புக் குழுத் தலைவர் பி.ஆர்.பாண்டியன் குற்றம்சாட்டினார்.

திருவாரூர் மாவட்டம் மன்னார்குடியில் செய்தியாளர்களை சந்தித்த அவர் கூறியதாவது:

தமிழக காவிரி டெல்டா பாசனப் பகுதிகள் தற்போது வறண்டு கிடக்கின்றன. குறுவை சாகுபடியை இழந்துள்ள நிலையில், சம்பா சாகுபடியும் கேள்விக்குறியாகியுள்ளது. இந்நிலையில், கேரள மாநிலம் வயநாடு பகுதிகளில் பெய்து வரும் கனமழையால் குடகு வழியாக கபினி உள்ளிட்ட நீர்த்தேக்கங்களுக்கு நீர்வரத்து அதிகரித்து, காவிரி நீர் தமிழகத்தை நோக்கி வந்து கொண்டிருக்கிறது.

ஆனால், தமிழகத்திற்கு வழங்க வேண்டிய காவிரி நீரின் அளவை கர்நாடக அரசு குறைத்துள்ளது. காவிரி நீர் பங்கீட்டு ஒழுங்காற்றுக் குழு நாளொன்றுக்கு 1 டி.எம்.சி. வீதம் 15 நாட்களுக்கு தமிழகத்திற்கு தண்ணீர் திறக்க பரிந்துரை செய்துள்ளது. இந்தப் பரிந்துரையை ஏற்ற காவிரி நீர் மேலாண்மை ஆணையமும், தமிழகத்திற்கு தண்ணீர் திறக்க கர்நாடக அரசுக்கு உத்தரவிட்டுள்ளது.

இந்நிலையில், தண்ணீர் திறக்க முடியாது என கர்நாடக அரசு உச்சநீதிமன்றத்தில் மேல்முறையீடு செய்துள்ளது. இதுதொடர்பாக தமிழக அரசு தொடர்ந்த வழக்கும் உச்சநீதிமன்றத்தில் விசாரணைக்கு வர உள்ளது.

முழு அடைப்புப் போராட்டம் சட்டவிரோதமானது

இந்த சூழ்நிலையில் கர்நாடகாவில் நடைபெறும் முழு அடைப்புப் போராட்டம் சட்டவிரோதமானது. இந்தப் போராட்டம் கர்நாடக துணை முதலமைச்சர் டி.கே.சிவக்குமார் தூண்டுதலின் பேரில் நடைபெறுவதாக பி.ஆர்.பாண்டியன் குற்றம்சாட்டினார்.

கர்நாடக மாநில பொதுமக்கள் மற்றும் விவசாயிகள் இந்தப் போராட்டத்தை புறக்கணித்துள்ளதாகவும், மேகதாட்டு அணைக்கு எதிராக கர்நாடக விவசாயிகள் ஒன்றிணைந்து இருப்பதாகவும் அவர் தெரிவித்தார்.

மேலும், கர்நாடகாவைச் சேர்ந்த நீரியல் வல்லுநர்கள் மற்றும் பேராசிரியர்கள், பெங்களூருவின் குடிநீர் தேவைக்கு மாற்று வழிகளில் தண்ணீரைப் பெற முடியும் என்பதால், மேகதாட்டில் அணை கட்ட வேண்டிய அவசியமில்லை என கருத்து தெரிவித்து வருவதாகவும் அவர் கூறினார்.

தமிழக அரசு வழக்குத் தொடர வேண்டும்

தமிழர்களுக்கும், கர்நாடக மக்களுக்கும் இடையே இன உணர்வைத் தூண்டும் வகையில் செயல்படுவதாக குற்றம்சாட்டிய பி.ஆர்.பாண்டியன், இதுதொடர்பாக டி.கே.சிவக்குமார் மீது தமிழக அரசு உச்சநீதிமன்றத்தில் வழக்குத் தொடர வேண்டும் என வலியுறுத்தினார்.

மேலும், கர்நாடகாவில் நடைபெறும் முழு அடைப்புப் போராட்டம் தொடர்பாக மத்திய அரசு உடனடியாக நடவடிக்கை எடுக்க வேண்டும் என்றும் அவர் கோரிக்கை விடுத்தார்.

. ராசிமணல் அணை திட்டத்தை செயல்படுத்த வேண்டும்

தமிழக–கர்நாடக விவசாயிகள் இணைந்து பயன்பெறும் வகையில் ராசிமணல் பகுதியில் அணை கட்டும் திட்டத்தை செயல்படுத்த நடவடிக்கை எடுக்க வேண்டும் என்றும் பி.ஆர்.பாண்டியன் வலியுறுத்தினார். இதற்கான விரிவான திட்ட அறிக்கையை தயாரித்து, அணை கட்டுமானப் பணிகளை விரைந்து தொடங்க வேண்டும் எனவும் அவர் கோரிக்கை விடுத்தார்.

தொடர்ந்து கர்நாடக அரசு தமிழகத்திற்கு காவிரி நீரை திறக்க மறுத்தால், காவிரி டெல்டா விவசாயிகள் ஒன்றிணைந்து திருச்சி–சென்னை தேசிய நெடுஞ்சாலையில் போராட்டத்தில் ஈடுபட்டு, போராட்டத்தை தீவிரப்படுத்துவோம் என அவர் எச்சரிக்கை விடுத்தார்.

கர்நாடகாவில் நடைபெறும் போராட்டங்களால் தமிழக–கர்நாடக எல்லைப் பகுதிகளில் பொதுமக்கள் மற்றும் விவசாயிகள் பாதிக்கப்பட்டுள்ளதாகவும், குறிப்பாக ஓசூர், சத்தியமங்கலம் பகுதிகளில் மக்கள் சிரமங்களை எதிர்கொண்டு வருவதாகவும் கூறிய பி.ஆர்.பாண்டியன், இதுதொடர்பாக மத்திய அரசு விரைந்து நடவடிக்கை எடுக்க வேண்டும் என வலியுறுத்தினார்.