உள்பிரகாரத்தில் வலம் வந்த செங்கமலத்தாயார் – திரளான பக்தர்கள் பங்கேற்பு

மன்னார்குடி, ஆக.15

திருவாரூர் மாவட்டம் மன்னார்குடியில் பிரசித்தி பெற்ற ராஜகோபால சுவாமி கோவிலில் ஆடி உற்சவத்தை முன்னிட்டு ஸ்ரீ செங்கமலத்தாயார் திருத்தேரோட்டம் இன்று மாலை வெகு விமரிசையாக நடைபெற்றது. கோவில் உள்பிரகாரத்தில் நடைபெற்ற இந்த பிரம்மாண்ட தேரோட்டத்தில் ஏராளமான பக்தர்கள் கலந்து கொண்டு தேரை வடம் பிடித்து இழுத்தனர்.

10 நாள் உற்சவம்

மன்னார்குடி ராஜகோபால சுவாமி கோவிலில் ஸ்ரீ செங்கமலத்தாயாருக்கு ஆண்டுதோறும் ஆடி மாதத்தை முன்னிட்டு தனியாக 10 நாட்கள் உற்சவம் நடைபெறுவது வழக்கம். அதன்படி இந்த ஆண்டும் சிறப்பு பூஜைகள் மற்றும் பல்வேறு நிகழ்ச்சிகளுடன் உற்சவம் சிறப்பாக நடைபெற்றது.

உற்சவத்தின் ஒவ்வொரு நாளும் இரவு ஸ்ரீ செங்கமலத்தாயார் பல்வேறு வாகனங்களில் சிறப்பு அலங்காரத்தில் எழுந்தருளி கோவில் உள்பிரகாரத்தில் வீதி உலா வந்து பக்தர்களுக்கு அருள்பாலித்தார். இதனை தொடர்ந்து உற்சவத்தின் நிறைவு நாளான இன்று பிரம்மாண்டமான திருத்தேரோட்டம் நடைபெற்றது.

சர்வ அலங்காரத்தில் செங்கமலத்தாயார்

தேரோட்டத்தை முன்னிட்டு ஸ்ரீ செங்கமலத்தாயாருக்கு சிறப்பு அபிஷேகம் மற்றும் பூஜைகள் நடைபெற்றன. தொடர்ந்து தாயார் பல்வேறு ஆபரணங்கள் அணிவிக்கப்பட்டு, மலர் மாலைகளால் அலங்கரிக்கப்பட்டு சர்வ அலங்காரத்தில் பக்தர்களுக்கு அருள்பாலித்தார்.

பின்னர் சிறப்பு பூஜைகள் செய்யப்பட்டு, அலங்கரிக்கப்பட்ட திருத்தேரில் ஸ்ரீ செங்கமலத்தாயார் எழுந்தருளினார். இதையடுத்து மாலை சுமார் 3 மணியளவில் தேரோட்டம் தொடங்கியது.

பக்தர்கள் வடம் பிடித்து இழுத்தனர்

தேரோட்டத்தில் நன்னிலம் சட்டமன்ற உறுப்பினர் ஆர். காமராஜ், மன்னார்குடி சட்டமன்ற உறுப்பினர் எஸ். காமராஜ், கோவில் அறங்காவலர் கருடா இளவரசன், கோவில் நிர்வாக அதிகாரி மற்றும் கோவில் பணியாளர்கள், முக்கிய பிரமுகர்கள் உள்ளிட்டோர் கலந்து கொண்டு தேரின் வடத்தைப் பிடித்து இழுத்தனர்.

அவர்களுடன் ஏராளமான பக்தர்களும் பக்தி பரவசத்துடன் தேரை வடம் பிடித்து இழுத்தனர். தேரில் எழுந்தருளியிருந்த ஸ்ரீ செங்கமலத்தாயார் கோவில் உள்பிரகாரத்தை வலம் வந்து பக்தர்களுக்கு அருள்பாலித்தார்.

படிதாண்டா பத்தினி

மன்னார்குடி ராஜகோபால சுவாமி கோவிலில் எழுந்தருளியுள்ள ஸ்ரீ செங்கமலத்தாயாருக்கு தனிச்சிறப்பான வழிபாட்டு மரபு உள்ளது. தாயார் எந்த ஒரு உற்சவத்தின் போதும் கோவிலின் ராஜகோபுரத்தை கடந்து வெளியே செல்வது கிடையாது.

இதன் காரணமாக ஸ்ரீ செங்கமலத்தாயார் பக்தர்களால் “படிதாண்டா பத்தினி” என்று போற்றப்பட்டு வருகிறார். இதனால் தாயாரின் உற்சவங்கள் அனைத்தும் கோவில் உள்பிரகாரத்திலேயே நடைபெறுவது வழக்கம்.

அந்த வகையில் இன்று நடைபெற்ற பிரம்மாண்ட திருத்தேரோட்டமும் கோவில் உள்பிரகாரத்திலேயே நடைபெற்றது பக்தர்களிடையே சிறப்பு கவனம் பெற்றது.

திரண்ட பக்தர்கள்

தேரோட்டத்தை முன்னிட்டு மன்னார்குடி மற்றும் சுற்றுவட்டார பகுதிகளை சேர்ந்த ஏராளமான பக்தர்கள் கோவில் வளாகத்தில் திரண்டனர். பெண்கள், குழந்தைகள், முதியவர்கள் என பல்வேறு தரப்பினரும் கலந்து கொண்டு தாயாரை வழிபட்டனர்.

தேரோட்டம் நடைபெற்றபோது பக்தர்கள் பக்தி கோஷங்களை எழுப்பியதுடன், தாயாரை தரிசனம் செய்து வழிபட்டனர். கோவில் வளாகம் முழுவதும் பக்தர்களின் கூட்டத்தால் களைகட்டியது.

உள்பிரகாரத்தில் பிரம்மாண்ட தேர்

தமிழகத்தில் கோவில் உள்பிரகாரத்திற்குள் பிரம்மாண்டமான திருத்தேர் ஓடும் சிறப்பு மன்னார்குடி ராஜகோபால சுவாமி கோவிலுக்கு மட்டுமே உரிய தனிச்சிறப்பாகக் கருதப்படுகிறது.

வெளிப்புற வீதிகளில் தேரோட்டம் நடைபெறாமல், கோவில் உள்பிரகாரத்திலேயே பிரம்மாண்டமான தேரில் செங்கமலத்தாயார் எழுந்தருளி பக்தர்களுக்கு அருள்பாலித்த காட்சி பக்தர்களை பரவசத்தில் ஆழ்த்தியது.

இதனை தொடர்ந்து சிறப்பு பூஜைகள் மற்றும் தீபாராதனை நடைபெற்றது. திரளான பக்தர்கள் கலந்து கொண்டு ஸ்ரீ செங்கமலத்தாயாரை தரிசனம் செய்து அருள் பெற்றனர்.