பரமக்குடியில் தந்தை பெரியார் பிறந்தநாள் விழா

முதுகுளத்தூர் செய்தியாளர்
ஆர்.செந்தில்குமார்

பரமக்குடி: செப் 17,
தமிழக வெற்றிக் கழகம் ராமநாதபுரம் மேற்கு மாவட்டம் சார்பில் பரமக்குடியில்
தந்தை பெரியாரின் பிறந்தநாள் விழா சிறப்பாக நடைபெற்றது.

ராமநாதபுரம் மேற்கு மாவட்ட கழக செயலாளர் மதன் தலைமையில், பரமக்குடியில் அமைந்துள்ள தந்தை பெரியாரின் திருவுருவச் சிலைக்கு மாலை அணிவித்து மரியாதை செலுத்தப்பட்டது.
நிகழ்ச்சியில் பேசிய மாவட்ட செயலாளர் மதன், பெரியாரின் சுயமரியாதை, சாதி ஒழிப்பு, சமூக சமத்துவம், பகுத்தறிவு, பெண்கள் உரிமை மற்றும் கல்வி தொடர்பான சமூகச் சீர்திருத்தப் பணிகளை நினைவுகூர்ந்தார்.

மனிதர்களிடையே பிறப்பின் அடிப்படையில் ஏற்றத்தாழ்வுகள் இருக்கக்கூடாது என்றும், அனைவருக்கும் சம உரிமையும் சுயமரியாதையும் கிடைக்க வேண்டும் என்றும் பெரியார் தொடர்ந்து வலியுறுத்தியதாக அவர் குறிப்பிட்டார்.

மேலும், பெண்களுக்கு கல்வி, சொத்துரிமை உள்ளிட்ட உரிமைகள் கிடைக்க வேண்டும், மூடநம்பிக்கைகளை கேள்விக்குட்படுத்தி பகுத்தறிவு சிந்தனையை வளர்க்க வேண்டும் என்ற பெரியாரின் சமூகச் சீர்திருத்தக் கருத்துகளையும் அவர் எடுத்துரைத்தார்.

சமூக நீதிக்கும் சமத்துவத்திற்கும் பெரியார் ஆற்றிய பங்களிப்புகளை நினைவுகூரும் வகையில் நடைபெற்ற இந்நிகழ்வில், மாவட்ட, ஒன்றிய, நகர மற்றும் கிளை கழக நிர்வாகிகள், அணிகளின் பொறுப்பாளர்கள் மற்றும் கழகத் தொண்டர்கள் கலந்து கொண்டு திருவுருவச் சிலைக்கு மலர்மாலை அணிவித்து மரியாதை செலுத்தினர்.