குண்டடத்தில் தீபாவளி விழிப்புணர்வு பேரணி – காவல்துறையினருடன் இணைந்து மாணவர்கள் பங்கேற்பு!

தாராபுரம் செய்தியாளர் பிரபு
செல்:9715328420

குண்டடம்,

திருப்பூர் மாவட்டம், குண்டடம் பகுதியில் இன்று (நவம்பர் 6) தீபாவளிப் பண்டிகையை முன்னிட்டு சுற்றுச்சூழல் பாதுகாப்பு மற்றும் பாதுகாப்பான தீபாவளி கொண்டாடுவது குறித்த விழிப்புணர்வுப் பேரணி சிறப்பாக நடைபெற்றது.

குண்டடம் காவல்துறையினருடன் இணைந்து நடைபெற்ற இப்பேரணியில் தரண், கிரி, கௌதம், ஹரிஷ், கவிபிரியன், லோகித், மெய்யழகன், நிஷாந்த், ராம்கிஷோர், சஞ்சீவ் மற்றும் விக்னேஷ் ஆகிய 11 மாணவர்கள் தலைமையேற்று விழிப்புணர்வு ஏற்படுத்தினர்.

இந்நிகழ்ச்சியில் சிறப்பு விருந்தினராக குண்டடம் காவல் ஆய்வாளர் திரு. விவேக் அவர்கள் கலந்து கொண்டார். மேலும், குண்டடம் காவல் நிலைய காவலர்கள் அனைவரும் பங்கேற்று நிகழ்ச்சியைச் சிறப்பித்தனர்.

இப்பேரணியின் முக்கிய நோக்கம் தீபாவளிப் பண்டிகையை பாதுகாப்பான முறையிலும், சுற்றுச்சூழலுக்கு பாதிப்பு ஏற்படாத வகையிலும் கொண்டாடுவது குறித்து பொதுமக்களிடையே விழிப்புணர்வு ஏற்படுத்துவதாகும்.

பட்டாசுகள் வெடிப்பதால் ஏற்படும் காற்று மற்றும் ஒலி மாசுபாடு குறித்தும், இதனால் மனிதர்கள், விலங்குகள் மற்றும் இயற்கைச் சூழலுக்கு ஏற்படும் பாதிப்புகள் குறித்தும் பொதுமக்களுக்கு எடுத்துரைக்கப்பட்டது.

மேலும், பட்டாசு வெடிப்பதைத் தவிர்த்து, சுற்றுச்சூழலைப் பாதுகாக்கும் வகையில் மாசில்லா தீபாவளியைக் கொண்டாட வேண்டும் என விழிப்புணர்வு ஏற்படுத்தப்பட்டது.

இப்பேரணியில், “புகையில்லா தீபாவளியைக் கொண்டாடுவோம்! மாசில்லா தீபாவளியை வரவேற்போம்!”, “பட்டாசு வெடிப்பதைத் தவிர்ப்போம்! சுற்றுச்சூழலைப் பாதுகாப்போம்!” உள்ளிட்ட விழிப்புணர்வு வாசகங்கள் மூலம் பொதுமக்களுக்கு அறிவுறுத்தப்பட்டது.