நகராட்சி ஆணையர் நந்தினி தொடங்கி வைத்தார் – 100-க்கும் மேற்பட்ட பள்ளி மாணவிகள் பங்கேற்பு
ஸ்ரீபெரும்புதூர்: காஞ்சிபுரம் மாவட்டம், ஸ்ரீபெரும்புதூர் நகராட்சியில் நிலத்தடி நீர்மட்டத்தை உயர்த்தவும், மழைநீர் சேகரிப்பின் அவசியம் குறித்து பொதுமக்களிடம் விழிப்புணர்வு ஏற்படுத்தவும் பள்ளி மாணவிகள் பங்கேற்ற விழிப்புணர்வு பேரணி நடைபெற்றது.
ஸ்ரீபெரும்புதூர் நகராட்சியில் 15 வார்டுகள் உள்ள நிலையில், 3 லட்சத்துக்கும் மேற்பட்ட மக்கள் வசித்து வருகின்றனர். இப்பகுதியில் மழைநீரை முறையாக சேமித்து நிலத்தடி நீர்மட்டத்தை உயர்த்தும் நோக்கில், நகராட்சி நிர்வாகம் சார்பில் இந்த விழிப்புணர்வு நிகழ்ச்சிக்கு ஏற்பாடு செய்யப்பட்டிருந்தது.
இதில் தனியார் பள்ளிகளைச் சேர்ந்த 100-க்கும் மேற்பட்ட மாணவிகள் கலந்து கொண்டு, மழைநீர் சேகரிப்பின் அவசியத்தை வலியுறுத்தும் பதாகைகளை ஏந்தியவாறு பேரணியாகச் சென்றனர். அதில், “ஒரு துளி மழைநீர்கூட வீணாக்கக் கூடாது”, “மழைநீர் சேமிப்பு – மண்ணுக்கிங்கே அவசியமே”, “வான் தரும் மழையை வீணாக்குவது நம் பிழை” உள்ளிட்ட விழிப்புணர்வு வாசகங்கள் இடம்பெற்றிருந்தன.
ஸ்ரீபெரும்புதூர் நகராட்சி அலுவலகம் எதிரே தொடங்கிய இந்தப் பேரணியை, நகராட்சி ஆணையர் நந்தினி கொடியசைத்து தொடங்கி வைத்தார். தொடர்ந்து, காந்தி சாலை, தேரடி சாலை வழியாகச் சென்ற மாணவிகள், முக்கிய வீதிகளில் பொதுமக்களிடம் மழைநீர் சேகரிப்பின் முக்கியத்துவம் குறித்து விழிப்புணர்வு ஏற்படுத்தினர். பின்னர் ஸ்ரீபெரும்புதூர் பேருந்து நிலையத்தில் பேரணி நிறைவடைந்தது.
இந்த நிகழ்ச்சியில் நகராட்சி அதிகாரிகள், பள்ளி ஆசிரியர்கள் உள்ளிட்ட பலர் கலந்து கொண்டனர்.
ஒவ்வொரு வீட்டிலும் மழைநீர் சேகரிப்பு கட்டமைப்புகளை ஏற்படுத்தி, மழைநீரை வீணாக்காமல் சேமிக்க வேண்டும் என்றும், இதன் மூலம் நிலத்தடி நீர்மட்டத்தை உயர்த்தி எதிர்கால நீர்த் தேவையைப் பாதுகாக்க முடியும் என்றும் நிகழ்ச்சியில் வலியுறுத்தப்பட்டது.