புவனகிரி, நவம்பர் -14
கடலூர் மாவட்டம், புவனகிரி வட்டம், மருதூர் காவல் நிலைய எல்லைக்குட்பட்ட மஞ்சக்கொள்ளை பகுதியில், ஒருவரை இருசக்கர வாகனத்தில் அழைத்துச் சென்று தாக்கிய சம்பவம் தொடர்பாக போலீசார் வழக்குப்பதிவு செய்து ஒருவரைக் கைது செய்துள்ளனர்.
மஞ்சக்கொள்ளை மெயின் ரோடு பகுதியைச் சேர்ந்த மகாலிங்கம் என்பவரின் மகன் ராம்குமார் (33) என்பவரை, அதே பகுதியைச் சேர்ந்த சாமிதுரை என்பவரின் மகன் செல்லத்துரை (30) என்பவர் கடந்த 10.11.2026 அன்று மதியம் சுமார் 2.30 மணியளவில் இருசக்கர வாகனத்தில் அழைத்துச் சென்று தாக்கியதாகப் புகார் அளிக்கப்பட்டுள்ளது.
இந்தத் தாக்குதலில் ராம்குமாருக்கு தலையில் காயம் ஏற்பட்டு இரண்டு தையல்கள் போடப்பட்டதுடன், இடது காலிலும் வீக்கம் ஏற்பட்டுள்ளது.இதையடுத்து, அவர் முதலில் புவனகிரி அரசு மருத்துவமனையில் சிகிச்சை பெற்றார். பின்னர் மேல் சிகிச்சைக்காக கடலூர் அரசு தலைமை மருத்துவமனை மற்றும் அரசு மருத்துவக் கல்லூரி மருத்துவமனையில் அனுமதிக்கப்பட்டு சிகிச்சை பெற்று வருகிறார்.
இதுகுறித்து மருதூர் போலீசார் வழக்குப்பதிவு செய்து, செல்லத்துரையைக் கைது செய்து நீதிமன்றக் காவலுக்கு அனுப்பி வைத்தனர். இச்சம்பவம் தொடர்பாக போலீசார் தொடர்ந்து விசாரணை மேற்கொண்டு வருகின்றனர்.