பேராவூரணி, நவ.16 –
தஞ்சாவூர் மாவட்டம்,
பேராவூரணி வட்டம், செங்கமங்கலம் ஊராட்சியில் உள்ள பெத்தபெருமாள் கோவில் வளாகத்தில், தமிழ்நாடு அரசு கால்நடை பராமரிப்புத் துறையின் சார்பில் சிறப்பு கால்நடை மருத்துவ நலம் மற்றும் விழிப்புணர்வு முகாம் நடைபெற்றது.
முகாமில் சுற்றுவட்டார கிராமங்களைச் சேர்ந்த கால்நடை வளர்ப்போர் தங்களது மாடுகளை அழைத்து வந்திருந்தனர். முகாமில் 300 மாடுகளுக்கு அம்மை நோய் தடுப்பூசி போடப்பட்டது. மேலும் மாடுகளுக்கு சினை ஊசி, சினை பரிசோதனை மற்றும் குடற்புழு நீக்கப் பணிகள் மேற்கொள்ளப்பட்டன.
கால்நடைகளை சிறந்த முறையில் பராமரித்து வரும் வளர்ப்போர் மற்றும் சிறந்த பசுங்கன்றுகளுக்கு பரிசுகள் வழங்கப்பட்டன. அத்துடன் கால்நடை வளர்ப்போருக்கு தாது உப்புக் கலவை மற்றும் தீவன விதைகள் வழங்கப்பட்டன.
முகாமில் கூட்டுறவுத் துறையின் சார்பில் கால்நடை வளர்ப்போருக்கு வழங்கப்படும் பராமரிப்புக் கடன் குறித்து விரிவாக விளக்கம் அளிக்கப்பட்டது. கால்நடை வளர்ப்பில் கடைபிடிக்க வேண்டிய சுகாதார முறைகள், நோய் தடுப்பு முறைகள் குறித்தும் விழிப்புணர்வு ஏற்படுத்தப்பட்டது.
இந்த முகாமில், தனித் துணை ஆட்சியர் (முத்திரைத்தாள்) கலியமூர்த்தி, கால்நடை பராமரிப்புத் துறை உதவி இயக்குநர் வீரமணி, வட்டாட்சியர் பாலசுப்பிரமணியன், கால்நடை மருத்துவர்கள் செழியன், பார்த்தசாரதி, சண்முகநாதன் உள்ளிட்டோர் கலந்து கொண்டனர்.
முகாமிற்கான ஏற்பாடுகளை கால்நடை பராமரிப்புத் துறை அலுவலர்கள் செய்திருந்தனர்.
பேராவூரணி த. நீலகண்டன் .