கோவை
கோவை ஸ்டேன்ஸ் ஆங்கிலோ-&இந்தியன் மேல்நிலைப் பள்ளி, தனது நீண்டகாலக் கல்விப் பாரம்பரியம் மற்றும் மாணவர்களின் சாதனைகளை முன்னிலைப்படுத்தும் வகையில் தனது 164-வது ஆண்டு விழாவைக் கோலாகலமாகக் கொண்டாடியது. பள்ளிப் பாடலுடன் விழா தொடங்கியது.
மாணவர்களின் பல்வேறு கலை நிகழ்ச்சிகளுடன் களைகட்டிய இந்நிகழ்ச்சியில் ஸ்டேன்ஸ் கல்வி நிறுவனங்களின் தலைவர் மெர்சி ஓமன், தாளாளர் பிலிப் ஆர்.ஜே. ஃபவுலர், சுசிதா ராமச்சந்திரன் (நிர்வாகக்குழு உறுப்பினர்) தலைமை நிர்வாக அதிகாரி வி.எம்.ஜான், ஸ்டேன்ஸ் ஆங்கிலோ-இந்தியன் மேல்நிலைப் பள்ளி முதல்வர் பி.ஏ.ஜான் ஸ்டீபன், ஸ்டேன்ஸ் சிபிஎஸ்இ பள்ளி முதல்வர் ஐலீன் ஜெத்ரோ, ஸ்டேன்ஸ் ஐசிஎஸ்இ பள்ளி முதல்வர் ஜெனட் ஜெயப்பிரகாஷ் மற்றும் ஸ்டேன்ஸ் சர்வதேசப் பள்ளி முதல்வர் ஜார்ஜினா, முன்னாள் மாணவர் சங்கத் தலைவர் ராஜ்குமார், டி.ஸ்டேன்ஸ் அண்ட் கம்பெனியின் முழுநேர இயக்குநர் லட்சுமி நாராயணன் ஆகியோர் கலந்துகொண்டனர்.
கேஎம்சிஎச் மருத்துவமனையின் மூத்த மனநல ஆலோசகரும், நேர்மறை உளவியல் சிகிச்சை (Positive Psychotherapy) நிபுணருமான டாக்டர் சீனிவாசன் இந்நிகழ்ச்சியில் சிறப்பு விருந்தினராகக் கலந்துகொண்டார்.
நிகழ்வில் உரையாற்றிய அவர், மாணவர்களிடையே சுதந்திரம், ஒழுக்கம், உணர்வுசார் நல்வாழ்வு மற்றும் பொறுப்பான வளர்ச்சி ஆகியவற்றின் முக்கியத்துவம் குறித்து வலியுறுத்தினார்.
உண்மையான சுதந்திரம் என்பது விதிகள் மற்றும் கட்டுப்பாடுகள் இல்லாத நிலை அல்ல என்றும், அது வெளிப்புறக் கட்டுப்பாட்டிலிருந்து சுயக் கட்டுப்பாட்டை நோக்கிய மாற்றம் என்றும் டாக்டர் சீனிவாசன் கூறினார். சுதந்திரமானது பொறுப்புணர்வு மற்றும் சுய ஒழுக்கத்துடன் இணைந்து பயணிக்க வேண்டும் என்றும் அவர் வலியுறுத்தினார்.
குழந்தைகளுக்குத் தண்டனை அளிப்பதற்குப் பதிலாக அவர்களின் தவறுகளைத் திருத்துமாறு பெற்றோர்களுக்கும் ஆசிரியர்களுக்கும் அவர் அறிவுறுத்தினார். தண்டனை தற்காலிக முடிவுகளைத் தரக்கூடும் என்றாலும், நீண்ட கால அடிப்படையில் அது அதிருப்தி, பின்வாங்குதல், பழிவாங்கும் உணர்வு மற்றும் வெகுமதியை மட்டும் எதிர்பார்க்கும் மனப்பான்மை ஆகியவற்றுக்கு வழிவகுக்கக்கூடும் என்று அவர் எச்சரித்தார்.
இளம் தலைமுறையினர் எதிர்கொள்ளும் சவால்களைச் சுட்டிக்காட்டிய டாக்டர் சீனிவாசன், சுயமரியாதை, சுய மதிப்பு மற்றும் உணர்ச்சிகளைக் கையாளும் திறன் ஆகியவற்றின் முக்கியத்துவத்தை வலியுறுத்தினார். உணர்ச்சிகளைக் கையாள்வதில் உள்ள சிரமங்கள் இளைஞர்களைப் பாதிக்கும் முக்கியப் பிரச்சினைகளில் ஒன்றாக உள்ளன என்று அவர் கூறினார்.
குழந்தைகள் வார்த்தைகளை விடச் செயல்களையே அதிகம் பின்பற்றுவார்கள் என்பதால், பெற்றோர்கள் நேர்மறையான முன்மாதிரிகளாகத் திகழ வேண்டும் என்று அவர் கேட்டுக்கொண்டார். நேர்மறையான பண்புகளை வெளிப்படுத்தும் மனிதர்களிடமிருந்து உத்வேகம் பெறுவதோடு, மாணவர்கள் தங்களுக்குத் தாங்களே கதாநாயகர்களாகத் திகழக் கற்றுக்கொள்ள வேண்டும் என்றும் அவர் கூறினார்.
சமூகத் திறன்கள், விளையாட்டுப் போட்டிகளில் பங்கேற்பு மற்றும் மன உறுதி ஆகியவற்றின் முக்கியத்துவத்தை வலியுறுத்திய டாக்டர் சீனிவாசன், பின்னடைவுகளை எதிர்கொள்ளும் திறனை வளர்த்துக்கொள்ள, முறையான வழிகாட்டுதலின் கீழ் மாணவர்கள் கையாளக்கூடிய சவால்களை எதிர்கொள்ளும் வாய்ப்பைப் பெற வேண்டும் என்றும் குறிப்பிட்டார்.
மேலும், குழந்தைகளின் குறைகளைத் தொடர்ந்து சுட்டிக்காட்டுவதற்குப் பதிலாக, அவர்களின் பலம் மற்றும் திறமைகளில் கவனம் செலுத்துமாறு பெற்றோர்களையும் ஆசிரியர்களையும் அவர் கேட்டுக்கொண்டார்.
பரிசு வென்றவர்களையும் மாணவர்களையும் வாழ்த்திப் பேசிய சிறப்பு விருந்தினர் டாக்டர் சீனிவாசன், பள்ளிப் பருவத்தில் ஈட்டிய சாதனைகளும் உருவான நினைவுகளும் நீண்ட காலத்திற்குப் போற்றிப் பாதுகாக்கப்படும் என்றும் குறிப்பிட்டார்
நிகழ்வில், மாணவர்களின் கல்வித் திறன் மற்றும் சிறப்பான செயல்பாட்டிற்காக அவர்களுக்குப் பரிசுகள் வழங்கியது சிறப்பம்சமாக அமைந்தது. கல்வியில் சிறந்த செயல்பாட்டிற்கான ‘ஹவுஸ்’ விருதை ‘டைகர் ஹவுஸ்’ அணி வென்று அசத்தியது.
முன்னதாக பள்ளி முதல்வர் பி.ஏ.ஜான் ஸ்டீபன் வரவேற்புரையாற்றியதுடன், நடப்பாண்டில் பள்ளியின் செயல்பாடுகள் மற்றும் சாதனைகளை விவரிக்கும் ஆண்டு அறிக்கையையும் சமர்ப்பித்தார்.
இவ்விழாவில் முன்னாள் முதல்வர்கள், முன்னாள் ஆசிரியர்கள், முன்னாள் மாணவர்கள், பெற்றோர்கள் மற்றும் தற்போதைய மாணவர்கள் ஆகியோர் கலந்துகொண்டனர். தேசிய கீதத்துடன் விழா நிறைவடைந்தது.