பிலிப்பைன்ஸ் குல்லாஸ் மருத்துவக் கல்லூரியில் பிரம்மாண்ட பட்டமளிப்பு விழா:

​பிலிப்பைன்ஸ் நாட்டின் செபு நகரில் அமைந்துள்ள குல்லாஸ் மருத்துவக் கல்லூரியில் (Gullas College of Medicine) நடைபெற்ற பிரம்மாண்ட பட்டமளிப்பு விழாவில், 1006 மருத்துவ மாணவர்கள் MD (Doctor of Medicine) பட்டத்தைப் பெற்றனர். இதில் 700-க்கும் மேற்பட்டோர் இந்திய மாணவர்கள் என்பது குறிப்பிடத்தக்கது. இதன் மூலம் பிலிப்பைன்ஸில் நடைபெற்ற இந்த விழா, இந்திய மருத்துவ பட்டதாரிகள் பெருமளவில் பங்கேற்ற ஒரு முக்கிய நிகழ்வாக அமைந்ததுடன், பிலிப்பைன்ஸில் மருத்துவக் கல்வியைத் தேர்வு செய்து பயின்று வரும் இந்திய மாணவர்களின் குறிப்பிடத்தக்க பங்களிப்பையும் ஆர்வத்தையும் வெளிப்படுத்துகிறது. மீதமுள்ள பட்டதாரிகள் நேபாளம், நைஜீரியா, இலங்கை உள்ளிட்ட பல்வேறு நாடுகளைச் சேர்ந்தவர்கள் என்பதால், இது கல்லூரியின் சர்வதேசத் தன்மையை எடுத்துக்காட்டுகிறது.

​இவ்விழாவில் தவோ நகர மேயர் திரு. எட்வின் ஜூபாஹிப் சிறப்பு விருந்தினராகக் கலந்து கொண்டு, MD பட்டம் பெற்ற மாணவர்களுக்கு வாழ்த்துகளைத் தெரிவித்து, மருத்துவத் துறையில் தங்களது தொழில்முறைப் பயணத்தைத் தொடங்கும் இளம் மருத்துவர்களுக்குத் தனது நல்வாழ்த்துகளையும் வழங்கினார்.

கிங்ஸ் இன்டர்நேஷனல் மெடிக்கல் அகாடமி நிறுவனத்தின் சேர்மன் டாக்டர் டேவிட் கே பிள்ளை கலந்து கொண்டு பேசுகையில், “மருத்துவம் என்பது தொழில் மட்டுமல்ல, சமூகத்தின் மீதான பொறுப்புணர்வுடன் மேற்கொள்ள வேண்டிய சேவை. தொடர்ந்து கற்றுக்கொள்வது, தொழில்முறைத் திறனை மேம்படுத்திக் கொள்வது மற்றும் நோயாளிகளிடம் அக்கறையுடனும் மனிதநேயத்துடனும் செயல்படுவது ஆகியவை ஒரு மருத்துவரின் பயணத்தில் முக்கியமானவை” என வலியுறுத்தினார்.

​மேலும், குல்லாஸ் மருத்துவக் கல்லூரியின் துணை தலைமை செயல் ஆலோசகர் கத்ரீனா கே பிள்ளை மற்றும் சென்னையின் மியாட் மருத்துவமனையின் கல்லீரல் மாற்று அறுவை சிகிச்சை மயக்கவியல் மற்றும் தீவிர சிகிச்சைப் பிரிவின் திட்ட இயக்குநரும், சிறப்புமிக்க இந்திய மருத்துவ நிபுணருமான டாக்டர் கார்த்திக் ராஜ் மனோகரன் ஆகியோரும் கலந்து கொண்டு, பட்டம் பெற்ற மாணவர்களுக்குத் தங்களது மனமார்ந்த வாழ்த்துகளைத் தெரிவித்தனர். பல ஆண்டுகளாக மேற்கொண்ட மருத்துவக் கல்வியை நிறைவு செய்து, பெருமைமிகு தருணத்தை அடைந்துள்ள புதிய மருத்துவர்கள், தங்களது தொழில்முறைப் பயணத்தின் அடுத்த கட்டத்தை நோக்கி முன்னேறிய நிலையில், அறிவையும் மனிதநேயத்தையும் இணைத்து சமூகத்திற்குச் சிறந்த மருத்துவ சேவை வழங்க வேண்டும் என்ற எதிர்பார்ப்புடன் விழா இனிதே நிறைவடைந்தது.