காரைக்காலில் 50க்கும் மேற்பட்ட உணவகங்களுக்கு ஹைஜீனிக் மற்றும் RUCO சான்றிதழ்கள் வழங்கல்

காரைக்கால்: புதுச்சேரி மாநிலம் காரைக்காலில் பொதுமக்களுக்கு தரமான, பாதுகாப்பான மற்றும் சுகாதாரமான உணவு கிடைப்பதை உறுதி செய்யும் நோக்கில், உணவு பாதுகாப்புத் துறை, FEDCOT INDIA Consumer Movement – Puducherry Karaikal மற்றும் காரைக்கால் சேம்பர் ஆஃப் காமர்ஸ் ஆகியவை இணைந்து கடந்த ஒரு வருடமாக உணவக உரிமையாளர்கள் மற்றும் பணியாளர்களுக்கு பல்வேறு விழிப்புணர்வு மற்றும் பயிற்சி நிகழ்ச்சிகளை நடத்தி வருகின்றன.

இதன் தொடர்ச்சியாக, உணவகங்களை சுத்தமாகவும் சுகாதாரமாகவும் பராமரித்தல், உணவு தயாரிக்கும் முறைகளில் பாதுகாப்பு விதிகளை கடைப்பிடித்தல், வாடிக்கையாளர்களுக்கு பாதுகாப்பான உணவு வழங்குதல் உள்ளிட்ட பல்வேறு அம்சங்கள் குறித்து பயிற்சிகள் வழங்கப்பட்டன.

மேலும், சமையலுக்கு பயன்படுத்தப்படும் எண்ணெயை மீண்டும் மீண்டும் அதிக வெப்பத்தில் சூடாக்கி பயன்படுத்துவதைத் தவிர்க்க வேண்டும் என்றும், பயன்படுத்தப்படும் சமையல் எண்ணெயில் Total Polar Compounds (TPC) அளவை நிர்ணயிக்கப்பட்ட வரம்பிற்குள் வைத்திருக்க வேண்டும் என்றும் விழிப்புணர்வு ஏற்படுத்தப்பட்டது. பயன்படுத்தத் தகுதியற்ற சமையல் எண்ணெயை மீண்டும் உணவு தயாரிப்பில் பயன்படுத்தாமல், அதை முறையாக சேகரித்து RUCO திட்டத்தின் மூலம் பயோடீசல் தயாரிப்பிற்காக மறுசுழற்சி செய்வதன் அவசியம் குறித்தும் விளக்கப்பட்டது.

300க்கும் மேற்பட்டோர் பங்கேற்பு

காரைக்காலில் நடைபெற்ற ஹைஜீனிக் மற்றும் RUCO சான்றிதழ் வழங்கும் விழாவில் துணை மாவட்ட ஆட்சியர் P. பாலு @ பக்கிரிசாமி, உணவு பாதுகாப்புத் துறை நியமன அலுவலர் முனைவர் S. D. பாலகிருஷ்ணன் Ph.D, FEDCOT தலைவர் வழக்கறிஞர் S. திருமுருகன், FEDCOT செயலாளர் S. சிவக்குமார், வர்த்தக சபை தலைவர் N. பாலகிருஷ்ணன், உணவு பாதுகாப்பு அலுவலர் O. பவித்ரா, ஹோட்டல் உரிமையாளர் சங்கத் தலைவர் முகமது ஜாபர், காயத்ரி ராகேஷ், CFO, காரைக்கால் ஐயங்கார், மணிகண்டன், புவனேஸ்வரன் உள்ளிட்ட உணவக உரிமையாளர்கள் மற்றும் பணியாளர்கள் என 300க்கும் மேற்பட்டோர் கலந்து கொண்டனர்.

துணை மாவட்ட ஆட்சியர் வலியுறுத்தல்

நிகழ்ச்சியில் சிறப்புரையாற்றிய துணை மாவட்ட ஆட்சியர் P. பாலு @ பக்கிரிசாமி, உணவகங்களில் பொதுமக்களின் உடல்நலத்திற்கு பாதிப்பு ஏற்படுத்தாத வகையில் அரசு அனுமதித்த தரமான பொருட்களை மட்டுமே பயன்படுத்த வேண்டும் என்றும், முடிந்தவரை வாழை இலையைப் பயன்படுத்தி உணவு பரிமாறும் நடைமுறையை ஊக்குவிக்க வேண்டும் என்றும் வலியுறுத்தினார்.

மேலும், உணவக உரிமையாளர்கள் மற்றும் வணிகர்களின் நலனுக்காக மாவட்ட நிர்வாகம் முடிந்த அளவு தேவையான ஒத்துழைப்பையும் ஆதரவையும் வழங்கும் என உறுதியளித்தார்.

உணவு பாதுகாப்புத் துறை உறுதி

உணவு பாதுகாப்புத் துறை நியமன அலுவலர் முனைவர் S. D. பாலகிருஷ்ணன் பேசுகையில், காரைக்கால் மாவட்டம் உணவு பாதுகாப்பு மற்றும் சுகாதார நடைமுறைகளில் முன்னோடியாகத் திகழும் வகையில் தொடர்ந்து நடவடிக்கைகள் மேற்கொள்ளப்படும் என்றும், காரைக்கால் மாவட்ட வணிகர்களுக்கு உணவு பாதுகாப்புத் துறை தொடர்ந்து உறுதுணையாக இருக்கும் என்றும் தெரிவித்தார்.

மேலும், உணவு பாதுகாப்பு தொடர்பான பல்வேறு பயிற்சி வகுப்புகள் காரைக்காலில் தொடர்ந்து சிறப்பாக நடத்தப்படும் என்றும் தெரிவித்தார்.

FEDCOT செயலாளர் சிவக்குமார் பேச்சு

FEDCOT செயலாளர் S. சிவக்குமார் பேசுகையில், “வாடிக்கையாளர்களுக்கு தரமான, பாதுகாப்பான மற்றும் சுகாதாரமான உணவு வழங்குவதே நமது முக்கிய குறிக்கோள். பயன்படுத்தப்பட்ட சமையல் எண்ணெயை மீண்டும் மீண்டும் உணவு தயாரிப்பில் பயன்படுத்தாமல், அதை முறையாக சேகரித்து பயோடீசல் தயாரிப்பிற்காக வழங்கும் நடைமுறையை 200க்கும் மேற்பட்ட உணவக உரிமையாளர்கள் பின்பற்றி வருவது மகிழ்ச்சி அளிக்கிறது. இந்த நல்ல நடைமுறை மேலும் பல உணவகங்களிலும் தொடர்ந்து செயல்படுத்தப்பட வேண்டும்” என்று கேட்டுக்கொண்டார்.

வர்த்தக சபை தலைவர் பாலகிருஷ்ணன் வலியுறுத்தல்

வர்த்தக சபை தலைவர் N. பாலகிருஷ்ணன் பேசுகையில், “காரைக்கால் மாவட்டத்தில் பெரும்பாலான உணவகங்களில் சமையல் எண்ணெயை ஒரு முறை அல்லது இரண்டு முறை மட்டுமே பயன்படுத்தும் நடைமுறை பின்பற்றப்பட்டு வருகிறது. இந்த நடைமுறையை தொடர்ந்து கடைப்பிடிக்க வேண்டும். நமது கடைகளுக்கு வரும் வாடிக்கையாளர்கள் ஆரோக்கியமாக இருக்க வேண்டும் என்பதே நமது நோக்கம். எனவே, உணவக உரிமையாளர்கள் அனைவரும் தொடர்ந்து பாதுகாப்பான சமையல் எண்ணெய் பயன்பாட்டை கடைப்பிடிக்க வேண்டும்” என்று வலியுறுத்தினார்.

FEDCOT தலைவர் திருமுருகன் கருத்து

FEDCOT தலைவர் வழக்கறிஞர் S. திருமுருகன் பேசுகையில், காரைக்கால் மாவட்டத்தில் உணவு பாதுகாப்புத் துறை அதிகாரிகள், வணிகர்கள் மற்றும் சம்பந்தப்பட்ட பொறுப்பாளர்கள் அனைவரும் ஒருங்கிணைந்து சிறப்பாக செயல்பட்டு வருவது பாராட்டுக்குரியது என்றும், இதுபோன்ற ஒருங்கிணைந்த நடவடிக்கைகள் தொடர்ந்து மேற்கொள்ளப்பட்டால் காரைக்கால் மாவட்டம் உணவு பாதுகாப்பில் மேலும் சிறந்து விளங்கும் என்றும் தெரிவித்தார்.

காயத்ரி ராகேஷ் வலியுறுத்தல்

காயத்ரி ராகேஷ், CFO, காரைக்கால் ஐயங்கார் பேசுகையில், உணவக உரிமையாளர்கள் மற்றும் பணியாளர்களுக்கு தொடர்ந்து பயிற்சி வகுப்புகள் நடத்தப்பட வேண்டும் என்றும், சமையலுக்கு பயன்படுத்தப்பட்ட எண்ணெயை மீண்டும் மீண்டும் பயன்படுத்தாமல் முறையாக சேகரித்து பயோடீசல் தயாரிப்பிற்காக வழங்கும் நடைமுறையை ஊக்குவிக்க வேண்டும் என்றும் தெரிவித்தார்.

மேலும், சமையல் எண்ணெயை மீண்டும் மீண்டும் பயன்படுத்துவதால் ஏற்படக்கூடிய பாதிப்புகள் குறித்து உணவக உரிமையாளர்கள் மற்றும் பணியாளர்களுக்கு தொடர்ந்து விழிப்புணர்வு ஏற்படுத்த வேண்டும் என்றும் வலியுறுத்தினார்.

ஹோட்டல் உரிமையாளர் சங்க தலைவர் முகமது ஜாபர் வாழ்த்து

நிகழ்ச்சியின் இறுதியில் ஹோட்டல் உரிமையாளர் சங்கத் தலைவர் முகமது ஜாபர் பேசுகையில், “இன்றைய நிகழ்வு காரைக்கால் மாவட்டத்திற்கு வரலாற்றுச் சிறப்புமிக்க ஒரு தருணமாகும். இந்த நிகழ்ச்சியில் கலந்து கொண்டு சிறப்பித்த தலைவர்கள், அரசு அதிகாரிகள், வணிகப் பொறுப்பாளர்கள், உணவக உரிமையாளர்கள் மற்றும் பயிற்சியில் பங்கேற்று சான்றிதழ்களைப் பெற்ற அனைவருக்கும் எனது வாழ்த்துகளைத் தெரிவித்துக்கொள்கிறேன்” என்று கூறி நிகழ்ச்சியை நிறைவு செய்தார்.

50க்கும் மேற்பட்ட உணவகங்களுக்கு சான்றிதழ்கள்

நிகழ்ச்சியின் நிறைவாக, ஹைஜீனிக் மற்றும் RUCO பயிற்சி வகுப்புகளில் பங்கேற்று தேவையான சுகாதார மற்றும் பாதுகாப்பு நடைமுறைகளைப் பின்பற்றிய 50க்கும் மேற்பட்ட உணவகங்களுக்கு ஹைஜீனிக் மற்றும் RUCO சான்றிதழ்கள் வழங்கப்பட்டன.

இந்நிகழ்ச்சியின் ஒருங்கிணைப்பாளராக ஜோதி @ புஷ்பவல்லி செயல்பட்டார்.

“தரமான உணவு – பாதுகாப்பான உணவு – சுகாதாரமான உணவகம்” என்ற நோக்கத்துடன் உணவு பாதுகாப்புத் துறை, FEDCOT INDIA மற்றும் காரைக்கால் சேம்பர் ஆஃப் காமர்ஸ் இணைந்து மேற்கொண்டு வரும் விழிப்புணர்வு மற்றும் பயிற்சி நடவடிக்கைகள் தொடர்ந்து நடைபெறும் என தெரிவிக்கப்பட்டது.