மதுரை: தமிழ்நாடு நெடுஞ்சாலைத்துறை சாலைப் பணியாளர் சங்கத்தின் மதுரை வட்டம் சார்பில், 41 மாத பணிநீக்கக் காலத்தைப் பணிக்காலமாக முறைப்படுத்த வேண்டும் உள்ளிட்ட பல்வேறு கோரிக்கைகளை வலியுறுத்தி, நீதி தராசை உயர்த்திப் பிடித்து மவுனப் புரட்சி இயக்கம் நடைபெற்றது.
தமிழ்நாடு நெடுஞ்சாலைத்துறை சாலைப் பணியாளர் சங்கத்தின் 10-வது மாநிலப் பிரதிநிதித்துவப் பேரவையின் அறைகூவலின்படி, மதுரை கண்காணிப்புப் பொறியாளர் அலுவலகம் முன்பு நடைபெற்ற இந்த இயக்கத்துக்கு கோட்டத் தலைவர்கள் இரா. மாரி, வீ. மணிமாறன் ஆகியோர் தலைமை வகித்தனர். கோட்டத் துணைத் தலைவர்கள் வா. மாரியப்பன், மு. முனியசாமி ஆகியோர் முன்னிலை வகித்தனர். கோட்டப் பொருளாளர் பொ. மாணிக்கம் வரவேற்றார்.
கோட்டச் செயலாளர்கள் த. மனோகரன், மு. ராஜா ஆகியோர் கோரிக்கைகளை விளக்கிப் பேசினர். தமிழ்நாடு அரசு ஊழியர் சங்க மாநிலச் செயலாளர் க. நீதிராஜா தொடக்கவுரையாற்றினார். தமிழ்நாடு அரசு அனைத்துத்துறை ஓய்வூதியர் சங்க மாநிலச் செயலாளர் முனைவர் சு. கிருஷ்ணன் சிறப்புரையாற்றினார். பல்வேறு தோழமைச் சங்கங்களின் நிர்வாகிகள் வாழ்த்திப் பேசினர்.
இந்த இயக்கத்தின்போது, சென்னை உயர்நீதிமன்ற உத்தரவின்படி சாலைப் பணியாளர்களின் 41 மாத பணிநீக்கக் காலத்தைப் பணிக்காலமாக முறைப்படுத்த வேண்டும் என்றும், பணியின்போது உயிரிழந்த சாலைப் பணியாளர்களின் குடும்பத்தினருக்கு கருணை அடிப்படையில் வேலை வழங்கக் கோரி விண்ணப்பித்துக் காத்திருப்பவர்களுக்கு விரைந்து பணி நியமன ஆணை வழங்க வேண்டும் என்றும் வலியுறுத்தப்பட்டது.
சங்கத்தின் மாநிலப் பொருளாளர் இரா. தமிழ் நிறைவுரையாற்றினார். கோட்டப் பொருளாளர் கா. சதுரகிரி நன்றி கூறினார்.