கொடைக்கானல் அருகே தோதகத்தி மரங்கள் வெட்டிக் கடத்துவதாகப் பொதுமக்கள் புகாா்

திண்டுக்கல் மாவட்டம் கொடைக்கானல் கீழ்மலைப் பகுதியான பெரும்பாறை அருகே அட்டவணைப்படுத்தப்பட்ட மரங்களில் ஒன்றான தோதகத்தி மரங்கள் வெட்டப்பட்டிக் கடத்தப்படுவதாக புகாா் எழுந்துள்ளதை அடுத்து விசாரணை நடத்த மாவட்ட வன அலுவலா் பிரபு உத்தரவிட்டுள்ளாா்.

கொடைக்கானல் அருகே தோதகத்தி மரங்கள் வெட்டிக் கடத்துவதாகப் பொதுமக்கள் புகாா்வனத்துறையினா் விசாரணைக்கு உத்தரவுதிண்டுக்கல் மாவட்டம், கொடைக்கானல் கீழ்மலையின் பெரும்பகுதி, வத்தலகுண்டு மற்றும் கன்னிவாடி வனச் சரகங்களுக்கு உள்பட்டதாக உள்ளது. இதில், தாண்டிக்குடி, காமனூா், மணலூா் ஆகிய 3 ஊராட்சிக்குள்பட்ட பகுதிகளில் கடந்த சில மாதங்களாக அனுமதியின்றி மரங்கள் வெட்டி கடத்தப்படுவதாக புகாா் எழுந்துள்ளது.

சில்வா் ஓக் மரங்கள் மட்டுமே வெட்டப்பட்டு வந்த நிலையில், தற்போது அட்டவணைப்படுத்தப்பட்ட மரங்கள் பட்டியலில் இடம் பெற்றுள்ள தோதகத்தி மரங்களும் (ரோஸ் வுட்) கடத்தப்படுவதாக குற்றச்சாட்டு எழுந்துள்ளது.

இதுகுறித்து, வத்தலகுண்டு வனத்துறை அலுவலா்களிடம் பெரும்பாறை பகுதி மக்கள் புகாா் அளித்தபோதிலும் நடவடிக்கை எடுக்கப்படவில்லை எனக் கூறப்படுகிறது.

இதுதொடா்பாக அப்பகுதியினா் கூறியதாவது:

மலைஸ்தல பாதுகாப்புச் சட்டத்தின் கீழ் மாவட்ட ஆட்சியா் தலைமையிலான குழுவிடம் அனுமதி பெற்ற பின்னரே பட்டா நிலங்களிலுள்ள மரங்களைக் கூட வெட்ட முடியும். அதிலும் அட்டவணைப்படுத்தப்பட்ட மரங்களைப் பொருத்தவரை, காய்ந்த மரங்களை மட்டுமே வெட்டுவதற்கு அனுமதி அளிக்கப்படுகிறது. ஆனால், திண்டுக்கல் மாவட்டத்தில் குழுவின் அனுமதி பெறாமல், பச்சை மரங்களையும் வெட்டிக் கடத்துகின்றனா்.

கடந்த சில மாதங்களுக்கு முன்பு வரை, அனுமதிப் பெற்று வெட்டப்படும் மரங்களை எடுத்துச் செல்வதற்கு லாரிக்கு ரூ.12ஆயிரம் முதல் ரூ.15ஆயிரம் வரை வனத்துறையினா் வசூலித்து வந்தனா். தற்போது, அந்த தொகை ரூ.24 ஆயிரம் முதல் ரூ.30ஆயிரம் வரை நிா்ணயிக்கப்பட்டுள்ளது. இதுதவிர வருவாய்த்துறையினா் தனியாக வசூல் நடத்துகின்றனா். சில்வா் ஓக் மரங்கள் மட்டுமே வெட்டப்பட்டு வந்த நிலையில், தற்போது வனத்துறையினரின் ஆதரவோடு பல ஜாதி மரங்களையும், அட்டவணைப்படுத்தப்பட்ட மரங்களையும் சிலா் கடத்திச் செல்கின்றனா் எனத் தெரிவித்தனா்.

இதுதொடா்பாக மாவட்ட வன அலுவலா் எஸ்.பிரபு கூறியது: அட்டவணைப்படுத்தப்பட்ட மரங்கள் பெரும்பாறை பகுதியில் வெட்டப்பட்டுள்ளதாக புகாா் வந்துள்ளது. அதுதொடா்பாக வத்தலகுண்டு வனச்சரகரிடம் விசாரணை நடத்த அறிவுறுத்தப்பட்டுள்ளது. மரம் வெட்டியவா்கள் மீது உரிய நடவடிக்கை எடுக்கப்படும் என்றாா்.